Dharmasamuccaya · અધ્યાય 36

॥ ઇતિ રાજાવવાદવર્ગઃ પઞ્ચત્રિંશઃ ॥
(36) સ્તુતિવર્ગઃ
બુદ્ધસ્તુતિઃ
સમસત્ત્વાગ્રવેદાય સર્વસત્ત્વેષુ બન્ધવે ।
સન્માર્ગસાર્થવાહાય ભવબન્ધનભેદિને

(ના)નાદૃષ્ટિવિભેદાય સર્વસંશયમોચિને ।
સમ્યગ્દૃષ્ટિનિવેશાય નમઃ સઞ્જ્ઞાનચક્ષુષે

સર્વસઙ્કટભેદાય ત્રિદોષમલશોધિને ।
નમો નક્ષત્રભૂતાય સર્વબીજફલોરુહે

સર્વપ્રજ્ઞાકરાગ્રાય સર્વધ્યાનાગ્રવેદિને ।
સર્વરત્નોત્તમાર્યાય નમો ઽલાનાગ્રદર્શિને

ઇયં સા લોકનાશસ્ય વિપ્રયુક્તસ્ય તાપિનઃ ।
પ્રતિમા દૃશ્યતે શાન્તા મોક્ષમુદ્ઘાટ્યકારિકા

સમર્ચતીમાં નિત્યં (યઃ) પુરુષઃ શાન્તમાનસઃ ।
સ મુચ્યતે ભવભયાન્નિવૃત્તિં ચાધિગચ્છતિ

એતચ્છાન્તપદં રમ્યમેતન્નૈષ્ઠિકમુચ્યતે ।
યદયં ભાષતે ધર્મ નિર્વાણપુરદેશિકઃ

અસ્ય વાક્યં સમાલમ્બ્ય પુરુષાધીનવિક્રમાઃ ।
આકર્ષન્તિ પદં નિત્યં યદનન્તસુખાવહમ્

એતત્ પૂર્વ સમારુહય પુરુષાસ્તત્ત્વચિન્તકાઃ ।
ત્રિલોકૌઘાર્ણવં ઘોરં તરન્તિ ભવસાગરમ્

અયં સ ચક્ષુર્લોકસ્ય સમન્તાદ્ધિ વિચક્ષુષઃ ।
અયં જ્યોતિઃ પરં જ્યોતિર્યજ્જ્યોતિઃકાષ્ઠસમ્ભવમ્

કલ્પાન્તં પ્રાણિનાં ચિત્તે નૃણાં રાગાદિભિર્મલૈઃ ।
જ્ઞાનતોયેન મહતા શોધયત્યેવ વાઙ્નૃપઃ

યન્ન દૃષ્ટં પદં સર્વૈસ્તીર્થિકૈર્જ્ઞાનપાણિભિઃ ।
તત્પદં વિમલૈર્વાક્યૈસ્ત્વયા નૃણાં પ્રદર્શિતમ્

પ્રમાદપરમો ઽનાથો જનો ઽયં તારિતસ્ત્વયા ।
તીર્ણઃ પારગતો નાથસ્તારયત્યઘનાશનાત્

હિતાર્થ સર્વજગતસ્ત્વમેવૈકો વ્યવસ્થિતઃ ।
અહિતાનાં હિતાયૈવ ત્વમેવ પુરુષોત્તમઃ

અનાદિમતિ સંસારે નૃણાં ક્લેશાપહારકૈઃ ।
ત્વયા વિશોધિતો વાક્યૈસ્તમઃ સૂર્યોદયે યથા

અક્ષયઃ સર્વધર્માણાં જ્ઞાનલોકકરો મહાન્ ।
ત્વમેવૈકો જગન્નાથ લોકોત્તરગુણાર્ણવઃ