દેવીકાલોત્તરાગમ · શ્લોક 1-20

સર્વેષામપિ મુક્ત્યર્થં મુક્તિમાર્ગસ્ય દર્શનમ્
દેવેશ જ્ઞાનમાચારં કૃપયા કથયસ્વ મે ॥

જ્ઞાનાચારૌ વરારોહે કથયામિ તવાધુના
પ્રવિશન્તિ યતો મોક્ષં જ્ઞાનિનો ધ્વસ્તકલ્મષમ્ ॥

યેષાં બોધેન સંજાતં કાલજ્ઞાનં વરાનને
ન તેષાં જાયતે બોધઃ શાસ્ત્રકોટિશતૈરપિ ॥

અતો હિ નિર્ભયો વિદ્વાન્ નિઃશઙ્કો વિગતસ્પૃહઃ
જ્ઞાનોત્સાહપરો ભૂયાત્ શ્રદ્દદ્ધાનો નિરાકુલઃ ॥

નિર્મમઃ કરુણોપેતઃ સર્વભૂતાભયપ્રદઃ
ભજેત્ કાલોત્તરં દેવિ મુમુક્ષુર્યોગતત્પરઃ ॥

સ બ્રહ્મા સ શિવો વિષ્ણુઃ સ ઇન્દ્રઃ સ ષડાનનઃ
સ ગુરુઃ સર્વદેવાશ્ચ સ યોગી સ તપોધનઃ ॥

પણ્ડિતઃ સ મહાભાગઃ કૃતાર્થઃ પરમાર્થતઃ
ચલદ્વાયુસમં ચિત્તં ધ્રિયતે યેન નિશ્ચલમ્ ॥

સ ઉપાયો મિમોક્ષસ્ય સદુપાત્તગુણસ્તુ સઃ
સા પ્રજ્ઞા તદિહ સ્થૈર્યં તત્પુણ્યં વ્યવસાયિનામ્ ॥

તદેવ તીર્થં દાનં ચ સ તપશ્ચ ન સંશયઃ
યેનોપાયેન બધ્યેત વાયુભિશ્ચલનં મનઃ ॥

ચિત્તે ચલતિ સંસારો નિશ્ચલો મોક્ષ એવ તુ
તસ્માચ્ચિત્તં સ્થિરં કુર્યાત્ પ્રજ્ઞયા પરયા બુધઃ ॥

એકાન્તિકં સુખં યત્ર તથાઇવાત્યન્તિકં ભવેત્
નિષ્કર્મણિ પરે તત્ત્વે કો ન રજ્યેત પણ્ડિતઃ ॥

નિવૃત્તો વિષયજ્ઞાનાત્ નિષ્કલજ્ઞાનતત્પરઃ
અનિચ્છન્નપિ મેધાવી લભતે મોક્ષમક્ષયમ્ ॥

અસ્મિતાકલયા યુક્તં ચૈતન્યં સકલં સ્મૃતમ્
અસ્મિતારહિતં ચેતશ્ ચૈતન્યં શક્તિરુચ્યતે ॥

તથા પ્રકાશિતં વિશ્વં શક્તિધ્યાનમુદાહૃતમ્
સર્વાલમ્બવિનિર્મુક્તં નિષ્કલં જ્ઞાનમુચ્યતે ॥

અહમંશેન યચ્છૂન્યં ચિન્માત્રાલોકમદ્વયમ્
મુક્તિબીજં તદાખ્યાતં પરયોગપ્રવર્તકમ્ ॥

ચક્રાણિ નાડયઃ પદ્મ દેવતાબીજમણ્ડલમ્
રૂપમિત્યાદિકં કિઞ્ચિદ્ ધ્યેયં નૈવ કદાચન ॥

કુહકં મન્ત્રજાલં ચ પ્રાણાયામાદિ ધારણમ્
સર્વમેતન્ન કર્તવ્યં મોક્ષમક્ષયમિચ્છતા ॥

નાત્ર પૂજા નમસ્કારો ન જપો ધ્યાનમેવ ચ
કેવલં જ્ઞાનમિત્યુક્તં વેદિતવ્યં ન કિઞ્ચન ॥

બહિરાહિતચિત્તાનાં જાયન્તે બન્ધહેતવઃ
બહિશ્ચિત્તં નિવાર્યૈવ વિન્દન્ લોકે ન સીદતિ ॥

નાત્ર કિઞ્ચિદ્બહિર્નાન્તં ન મધ્યં નાપ્યધઃ ક્વચિત્
સર્વાકારં નિરાકારં સ્વસંવેદ્યં વિરાજતે ॥