દેવી ભાગવત પુરાણ · અધ્યાય 9.35

નાનાકર્મવિપાકફલકથનમ્
ધર્મરાજ ઉવાચ
દેવસેવાં વિના સાધ્વિ ન ભવેત્કર્મકૃન્તનમ્ ।
શુદ્ધકર્મ શુદ્ધબીજં નરકશ્ચ કુકર્મણા

પુંશ્ચલ્યન્નં ચ યો ભુઙ્ક્તે યોઽસ્યાં ગચ્છેત્પતિવ્રતે ।
સ દ્વિજઃ કાલસૂત્રં ચ મૃતો યાતિ સુદુર્ગમમ્

શતવર્ષં કાલસૂત્રે સ્થિરીભૂતો ભવેદ્‌ ધ્રુવમ્ ।
તત્ર જન્મનિ રોગી ચ તતઃ શુદ્ધો ભવેદ્‌ દ્વિજઃ

પતિવ્રતા ચૈકપતૌ દ્વિતીયે કુલટા સ્મૃતા ।
તૃતીયે ધર્ષિણી જ્ઞેયા ચતુર્થે પુંશ્ચલીત્યપિ

વેશ્યા ચ પઞ્ચમે ષષ્ઠે પુઙ્‌ગી ચ સપ્તમેઽષ્ટમે ।
તત ઊર્ધ્વં મહાવેશ્યા સાસ્પૃશ્યા સર્વજાતિષુ

યો દ્વિજઃ કુલટાં ગચ્છેદ્ધર્ષિણીં પુંશ્ચલીમપિ ।
પુઙ્‌ગીં વેશ્યાં મહાવેશ્યાં મત્સ્યોદે યાતિ નિશ્ચિતમ્

શતાબ્દં કુલટાગામી ધૃષ્ટાગામી ચતુર્ગુણમ્ ।
ષડ્ગુણં પુંશ્ચલીગામી વેશ્યાગામી ગુણાષ્ટકમ્

પુઙ્‌ગીગામી દશગુણં વસેત્તત્ર ન સંશયઃ ।
મહાવેશ્યાકામુકશ્ચ તતો દશગુણં વસેત્

તત્રૈવ યાતનાં ભુઙ્‌ક્તે યમદૂતેન તાડિતઃ ।
તિત્તિરિઃ કુલટાગામી ધૃષ્ટાગામી ચ વાયસઃ

કોકિલઃ પુંશ્ચલીગામી વેશ્યાગામી વૃકઃ સ્મૃતઃ ।
પુઙ્‌ગીગામી સૂકરશ્ચ સપ્તજન્મનિ ભારતે

મહાવેશ્યાપ્રગામી ચ જાયતે શાલ્મલીતરુઃ ।
યો ભુઙ્‌ક્તે જ્ઞાનહીનશ્ચ ગ્રહણે ચન્દ્રસૂર્યયોઃ

અરુન્તુદં સ યાત્યેવાપ્યન્નમાનાબ્દમેવ ચ ।
તતો ભવેન્માનવશ્ચાપ્યુદરે રોગપીડિતઃ

ગુલ્મયુક્તશ્ચ કાણશ્ચ દન્તહીનસ્તતઃ શુચિઃ ।
વાક્પ્રદત્તાં સ્વકન્યાં ચ યોઽન્યસ્મૈ પ્રદદાતિ ચ

સ વસેત્પાંસુકુણ્ડે ચ તદ્‍ભોજી શતવત્સરમ્ ।
તદ્દ્રવ્યહારી યઃ સાધ્વિ પાંસુવેષ્ટે શતાબ્દકમ્

નિવસેચ્છરશય્યાયાં મમ દૂતેન તાડિતઃ ।
ભક્ત્યા ન પૂજયેદ્વિપ્રઃ શિવલિઙ્‌ગં ચ પાર્થિવમ્

સ યાતિ શૂલિનઃ પાપાચ્છૂલપ્રોતં સુદારુણમ્ ।
સ્થિત્વા શતાબ્દં તત્રૈવ શ્વાપદઃ સપ્તજન્મસુ

તતો ભવેદ્દેવલશ્ચ સપ્તજન્મ તતઃ શુચિઃ ।
કરોતિ કુણ્ઠિતં વિપ્રં યદ્‌ભિયા કમ્પતે દ્વિજઃ

પ્રકમ્પને વસેત્સોઽપિ વિપ્રલોમાબ્દમેવ ચ ।
પ્રકોપવદના કોપાત્ સ્વામિનં યા ચ પશ્યતિ

કટૂક્તિં તં પ્રવદતિ સોલ્મુકં સમ્પ્રયાતિ હિ ।
ઉલ્કાં દદાતિ તદ્વક્ત્રે સતતં મમ કિઙ્‌કરઃ

દણ્ડેન તાડયેન્મૂર્ધ્નિ તલ્લોમાબ્દપ્રમાણકમ્ ।
તતો ભવેન્માનવી ચ વિધવા સપ્તજન્મસુ

સા ભુક્ત્વા ચૈવ વૈધવ્યં વ્યાધિયુક્તા તતઃ શુચિઃ ।
યા બ્રાહ્મણી શૂદ્રભોગ્યા ચાન્ધકૂપે પ્રયાતિ સા

તપ્તશૌચોદકે ધ્વાન્તે તદાહારી દિવાનિશમ્ ।
નિવસેદતિસન્તપ્તા મમ દૂતેન તાડિતા

શૌચોદકે નિમગ્ના સા યાવદિન્દ્રાશ્ચતુર્દશ ।
કાકી જન્મસહસ્રાણિ શતજન્માનિ સૂકરી

શૃગાલી શતજન્માનિ શતજન્માનિ કુક્કુટી ।
પારાવતી સપ્તજન્મ વાનરી સપ્તજન્મસુ

તતો ભવેત્સા ચાણ્ડાલી સર્વભોગ્યા ચ ભારતે ।
તતો ભવેચ્ચ રજકી યક્ષ્મગ્રસ્તા ચ પુંશ્ચલી

તતઃ કુષ્ઠયુતા તૈલકારી શુદ્ધા ભવેત્તતઃ ।
નિવસેદ્વેધને વેશ્યા પુઙ્‌ગી ચ દણ્ડતાડને

જલરન્ધ્રે વસેદ્વેશ્યા કુલટા દેહચૂર્ણકે ।
સ્વૈરિણી દલને ચૈવ ધૃષ્ટા ચ શોષણે તથા

નિવસેદ્યાતનાયુક્તા મમ દૂતેન તાડિતા ।
વિણ્મૂત્રભક્ષા સતતં યાવન્મન્વન્તરં સતિ

તતો ભવેદ્વિટ્કૃમિશ્ચ લક્ષવર્ષં તતઃ શુચિઃ ।
બ્રાહ્મણો બ્રાહ્મણીં ગચ્છેત્ક્ષત્રિયાં વાપિ ક્ષત્રિયઃ

વૈશ્યો વૈશ્યાં ચ શૂદ્રા વા શૂદ્રશ્ચાપિ વ્રજેદ્યદિ ।
સવર્ણપરદારૈશ્ચ કષાયં યાન્તિ તે જનાઃ

ભુક્ત્વા કષાયતપ્તોદં નિવસેદ્વા શતાબ્દકમ્ ।
તતો વિપ્રો ભવેચ્છુદ્ધસ્તતો વૈ ક્ષત્રિયાદયઃ

યોષિતશ્ચાપિ શુદ્ધ્યન્તીત્યેવમાહ પિતામહઃ ।
ક્ષત્રિયો બ્રાહ્મણીં ગચ્છેદ્વૈશ્યો વાપિ પતિવ્રતે

માતૃગામી ભવેત્સોઽપિ શૂર્પે ચ નરકે વસેત્ ।
શૂર્પાકારૈશ્ચ કૃમિભિર્બ્રાહ્મણ્યા સહ ભક્ષિતઃ

પ્રતપ્તમૂત્રભોજી ચ મમ દૂતેન તાડિતઃ ।
તત્રૈવ યાતનાં ભુઙ્ક્તે યાવદિન્દ્રાશ્ચતુર્દશ

સપ્તજન્મ વરાહશ્ચ છાગલશ્ચ તતઃ શુચિઃ ।
કરે ધૃત્વા તુ તુલસીં પ્રતિજ્ઞાં યો ન પાલયેત્

મિથ્યા વા શપથં કુર્યાત્સ ચ જ્વાલામુખં વ્રજેત્ ।
ગઙ્‌ગાતોયં કરે કૃત્વા પ્રતિજ્ઞાં યો ન પાલયેત્

શિલાં વા દેવપ્રતિમાં સ ચ જ્વાલામુખં વ્રજેત્ ।
દત્ત્વા દક્ષિણહસ્તં ચ પ્રતિજ્ઞાં યો ન પાલયેત્

સ્થિત્વા દેવગૃહે વાપિ સ ચ જ્વાલામુખં વ્રજેત્ ।
આસ્પૃશ્ય બ્રાહ્મણં ગાં ચ જ્વાલાવહ્નિં વ્રજેદ્‌ દ્વિજઃ

ન પાલયેત્પ્રતિજ્ઞાં ચ સ ચ જ્વાલામુખં વ્રજેત્ ।
મિત્રદ્રોહી કૃતઘ્નશ્ચ યશ્ચ વિશ્વાસઘાતકઃ

મિથ્યાસાક્ષ્યપ્રદશ્ચૈવ સ ચ જ્વાલામુખં વ્રજેત્ ।
એતે તત્ર વસન્ત્યેવ યાવદિન્દ્રાશ્ચતુર્દશ

તથાઙ્‌ગારપ્રદગ્ધાશ્ચ મમ દૂતેન તાડિતાઃ ।
ચાણ્ડાલસ્તુલસીં સ્પૃષ્ટ્વા સપ્તજન્મ તતઃ શુચિઃ

મ્લેચ્છો ગઙ્‌ગાજલસ્પર્શી પઞ્ચજન્મ તતઃ શુચિઃ ।
શિલાસ્પર્શી વિટ્કૃમિશ્ચ સપ્તજન્મસુ સુન્દરિ

અર્ચાસ્પર્શી બ્રહ્મકૃમિઃ સપ્તજન્મ તતઃ શુચિ ।
દક્ષહસ્તપ્રદાતા ચ સર્પશ્ચ સપ્તજન્મસુ

તતો ભવેદ્‌ બ્રહ્મહીનો માનવશ્ચ તતઃ શુચિઃ ।
મિથ્યાવાદી દેવગૃહે દેવલઃ સપ્તજન્મસુ

વિપ્રાદિસ્પર્શકારી ચ વ્યાઘ્રજાતિર્ભવેદ્‌ ધ્રુવમ્ ।
તતો ભવેચ્ચ મૂકઃ સ બધિરશ્ચ ત્રિજન્મનિ

ભાર્યાહીનો બન્ધુહીનો વંશહીનસ્તતઃ શુચિઃ ।
મિત્રદ્રોહી ચ નકુલઃ કૃતઘ્નશ્ચાપિ ગણ્ડકઃ

વિશ્વાસઘાતી વ્યાઘ્રશ્ચ સપ્તજન્મસુ ભારતે ।
મિથ્યાસાક્ષી ચ વક્તવ્યે મણ્ડૂકઃ સપ્તજન્મસુ

પૂર્વાન્સપ્તાપરાન્સપ્ત પુરુષાન્હન્તિ ચાત્મનઃ ।
નિત્યક્રિયાવિહીનશ્ચ જડત્વેન યુતો દ્વિજઃ

યસ્યાનાસ્થા વેદવાક્યે મન્દં હસતિ સંતતમ્ ।
વ્રતોપવાસહીનશ્ચ સદ્વાક્યપરનિન્દકઃ

ધૂમ્રાન્ધે ચ વસેત્સોઽપિ શતાબ્દં ધૂમ્રભક્ષકઃ ।
જલજન્તુર્ભવેત્સોઽપિ શતજન્મક્રમેણ ચ

તતો નાનાપ્રકારશ્ચ મત્સ્યજાતિસ્તતઃ શુચિઃ ।
યઃ કરોત્યુપહાસં ચ દેવબ્રાહ્મણયોર્ધને

પાતયિત્વા સ પુરુષાન્દશપૂર્વાન્દશાપરાન્ ।
સોઽયં યાતિ ચ ધૂમ્રાન્ધં ધૂમ્રધ્વાન્તસમન્વિતમ્

ધૂમ્રક્લિષ્ટો ધૂમ્રભોજી વસેત્તત્ર ચતુર્ગુણમ્ ।
તતો મૂષકજાતિશ્ચ સપ્તજન્મસુ ભારતે

તતો નાનાવિધાઃ પક્ષિજાતયઃ કૃમિજાતિભિઃ ।
તતો નાનાવિધા વૃક્ષા પશવશ્ચ તતો નરઃ

વિપ્રો દૈવજ્ઞજીવી ચ વૈદ્યજીવી ચિકિત્સકઃ ।
લાક્ષાલોહાદિવ્યાપારી રસાદિવિક્રયી ચ યઃ

સ યાતિ નાગવેષ્ટં ચ નાગૈર્વેષ્ટિતમેવ ચ ।
વસેત્સ લોમમાનાબ્દં તત્રૈવ નાગપાશિતઃ

તતો નાનાવિધાઃ પક્ષિજાતયશ્ચ તતો નરઃ ।
તતો ભવેત્સ ગણકો વૈદ્યશ્ચ સપ્તજન્મસુ

ગોપશ્ચ કર્મકારશ્ચ રઙ્‌ગકારસ્તતઃ શુચિઃ ।
પ્રસિદ્ધાનિ ચ કુણ્ડાનિ કથિતાનિ પતિવ્રતે

અન્યાનિ ચાપ્રસિદ્ધાનિ ક્ષુદ્રાણિ સન્તિ તત્ર વૈ ।
સન્તિ પાતકિનસ્તેષુ સ્વકર્મફલભોગિનઃ ।
ભ્રમન્તિ નાનાયોનિં ચ કિં ભૂયઃ શ્રોતુમિચ્છસિ

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં નવમસ્કન્ધે
નાનાકર્મવિપાકફલકથનં નામ પઞ્ચત્રિંશોઽધ્યાયઃ