દેવી ભાગવત પુરાણ · અધ્યાય 9.23

શઙ્‌ખચૂડવધવર્ણનમ્
શિવસ્તત્ત્વં સમાકર્ણ્ય તત્ત્વજ્ઞાનવિશારદઃ ।
યયૌ સ્વયં ચ સમરે સ્વગણૈઃ સહ નારદ

શઙ્‌ખચૂડઃ શિવં દૃષ્ટ્વા વિમાનાદવરુહ્ય ચ ।
નનામ પરયા ભક્ત્યા શિરસા દણ્ડવદ્‌ભુવિ

તં પ્રણમ્ય ચ વેગેન વિમાનમારુરોહ સઃ ।
તૂર્ણં ચકાર સન્નાહં ધનુર્જગ્રાહ દુર્વહમ્

શિવદાનવયોર્યુદ્ધં પૂર્ણમબ્દશતં પુરા ।
ન બભૂવતુરન્યોન્યં બ્રહ્મઞ્જયપરાજયૌ

ન્યસ્તશસ્ત્રશ્ચ ભગવાન્ ન્યસ્તશસ્ત્રશ્ચ દાનવઃ ।
રથસ્થઃ શઙ્‌ખચૂડશ્ચ વૃષસ્થો વૃષભધ્વજઃ

દાનવાનાં ચ શતકમુદ્ધૃતં ચ બભૂવ હ ।
રણે યે યે મૃતાઃ શમ્ભુર્જીવયામાસ તાન્વિભુઃ

એતસ્મિન્નન્તરે વૃદ્ધબ્રાહ્મણઃ પરમાતુરઃ ।
આગત્ય ચ રણસ્થાનમુવાચ દાનવેશ્વરમ્

વૃદ્ધબ્રાહ્મણ ઉવાચ
દેહિ ભિક્ષાં ચ રાજેન્દ્ર મહ્યં વિપ્રાય સામ્પ્રતમ્ ।
ત્વં સર્વસમ્પદાં દાતા યન્મે મનસિ વાઞ્છિતમ્

નિરીહાય ચ વૃદ્ધાય તૃષિતાય ચ સામ્પ્રતમ્ ।
પશ્ચાત્ત્વાં કથયિષ્યામિ પુરઃ સત્યં ચ કુર્વિતિ

ઓમિત્યુવાચ રાજેન્દ્રઃ પ્રસન્નવદનેક્ષણઃ ।
કવચાર્થી જનશ્ચાહમિત્યુવાચાતિમાયયા

તચ્છ્રુત્વા કવચં દિવ્યં જગ્રાહ હરિરેવ ચ ।
શઙ્‌ખચૂડસ્ય રૂપેણ જગામ તુલસીં પ્રતિ

ગત્વા તસ્યાં માયયા ચ વીર્યાધાનં ચકાર હ ।
અથ શમ્ભુર્હરેઃ શૂલં જગ્રાહ દાનવં પ્રતિ

ગ્રીષ્મમધ્યાહ્નમાર્તણ્ડપ્રલયાગ્નિશિખોપમમ્ ।
દુર્નિવાર્યં ચ દુર્ધર્ષમવ્યર્થં વૈરિઘાતકમ્

તેજસા ચક્રતુલ્યં ચ સર્વશસ્ત્રાસ્ત્રસારકમ્ ।
શિવકેશવયોરન્યૈર્દુર્વહં ચ ભયઙ્‌કરમ્

ધનુઃસહસ્રં દૈર્ઘ્યેણ પ્રસ્થેન શતહસ્તકમ્ ।
સજીવં બ્રહ્મરૂપં ચ નિત્યરૂપમનિર્દિશમ્

સંહર્તું સર્વબ્રહ્માણ્ડમલં યત્સ્વીયલીલયા ।
ચિક્ષેપ તોલનં કૃત્વા શઙ્‌ખચૂડે ચ નારદ

રાજા ચાપં પરિત્યજ્ય શ્રીકૃષ્ણચરણામ્બુજમ્ ।
ધ્યાનં ચકાર ભક્ત્યા ચ કૃત્વા યોગાસનં ધિયા

શૂલં ચ ભ્રમણં કૃત્વા પપાત દાનવોપરિ ।
ચકાર ભસ્મસાત્તં ચ સરથં ચાથ લીલયા

રાજા ધૃત્વા દિવ્યરૂપં કિશોરં ગોપવેષકમ્ ।
દ્વિભુજં મુરલીહસ્તં રત્‍નભૂષણભૂષિતમ્

રત્‍નેન્દ્રસારનિર્માણં વેષ્ટિતં ગોપકોટિભિઃ ।
ગોલોકાદાગતં યાનમારુરોહ પુરં યયૌ

ગત્વા નનામ શિરસા સ રાધાકૃષ્ણયોર્મુને ।
ભક્ત્યા ચ ચરણામ્ભોજં રાસે વૃન્દાવને વને

સુદામાનં ચ તૌ દૃષ્ટ્વા પ્રસન્નવદનેક્ષણૌ ।
ક્રોડે ચક્રતુરત્યન્તં પ્રેમ્ણાતિપરિસંયુતૌ

અથ શલં ચ વેગેન પ્રયયૌ તં ચ સાદરમ્ ।
અસ્થિભિઃ શઙ્‌ખચૂડસ્ય શઙ્‌ખજાતિર્બભૂવ હ

નાનાપ્રકારરૂપેણ શશ્વત્પૂતા સુરાર્ચને ।
પ્રશસ્તં શઙ્‌ખતોયં ચ દેવાનાં પ્રીતિદં પરમ્

તીર્થતોયસ્વરૂપં ચ પવિત્રં શમ્ભુના વિના ।
શઙ્‌ખશબ્દો ભવેદ્યત્ર તત્ર લક્ષ્મીઃ સુસંસ્થિરા

સ સ્નાતઃ સર્વતીર્થેષુ યઃ સ્નાતઃ શઙ્‌ખવારિણા ।
શઙ્‌ખો હરેરધિષ્ઠાનં યત્ર શઙ્‌ખસ્તતો હરિઃ

તત્રૈવ વસતે લક્ષ્મીર્દૂરીભૂતમમઙ્‌ગલમ્ ।
સ્ત્રીણાં ચ શઙ્‌ખધ્વનિભિઃ શૂદ્રાણાં ચ વિશેષતઃ

ભીતા રુષ્ટા યાતિ લક્ષ્મીસ્તત્સ્થલાદન્યદેશતઃ ।
શિવોઽપિ દાનવં હત્વા શિવલોકં જગામ હ

પ્રહૃષ્ટો વૃષભારૂઢઃ સ્વગણૈશ્ચ સમાવૃતઃ ।
સુરાઃ સ્વવિષયં પ્રાપુઃ પરમાનન્દસંયુતાઃ

નેદુર્દુન્દુભયઃ સ્વર્ગે જગુર્ગન્ધર્વકિન્નરાઃ ।
બભૂવ પુષ્પવૃષ્ટિશ્ચ શિવસ્યોપરિ સન્તતમ્ ।
પ્રશશંસુઃ સુરાસ્તં ચ મુનીન્દ્રપ્રવરાદયઃ

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં
નવમસ્કન્ધે શઙ્‌ખચૂડવધવર્ણનં નામ ત્રયોવિશોઽધ્યાયઃ