દેવી ભાગવત પુરાણ · અધ્યાય 12.6

ગાયત્રીસહસ્રનામસ્તોત્રવર્ણનમ્
નારદ ઉવાચ
ભગવન્સર્વધર્મજ્ઞ સર્વશાસ્ત્રવિશારદ ।
શ્રુતિસ્મૃતિપુરાણાનાં રહસ્યં ત્વન્મુખાચ્છ્રુતમ્

સર્વપાપહરં દેવ યેન વિદ્યા પ્રવર્તતે ।
કેન વા બ્રહ્મવિજ્ઞાનં કિં નુ વા મોક્ષસાધનમ્

બ્રાહ્મણાનાં ગતિઃ કેન કેન વા મૃત્યુનાશનમ્ ।
ઐહિકામુષ્મિકફલં કેન વા પદ્મલોચન

વક્તુમર્હસ્યશેષેણ સર્વં નિખિલમાદિતઃ ।
શ્રીનારાયણ ઉવાચ
સાધુ સાધુ મહાપ્રાજ્ઞ સમ્યક્ પૃષ્ટં ત્વયાનઘ

શૃણુ વક્ષ્યામિ યત્‍નેન ગાયત્ર્યષ્ટસહસ્રકમ્ ।
નામ્નાં શુભાનાં દિવ્યાનાં સર્વપાપવિનાશનમ્

સૃષ્ટ્યાદૌ યદ્‍ભગવતા પૂર્વં પ્રોક્તં બ્રવીમિ તે ।
અષ્ટોત્તરસહસ્રસ્ય ઋષિર્બ્રહ્મા પ્રકીર્તિતઃ

છન્દોઽનુષ્ટુપ્ તથા દેવી ગાયત્રી દેવતા સ્મૃતા ।
હલો બીજાનિ તસ્યૈવ સ્વરાઃ શક્તય ઈરિતાઃ

અઙ્‌ગન્યાસકરન્યાસાવુચ્યેતે માતૃકાક્ષરૈઃ ।
અથ ધ્યાનં પ્રવક્ષ્યામિ સાધકાનાં હિતાય વૈ

રક્તશ્વેતહિરણ્યનીલધવલૈર્યુક્તાં ત્રિનેત્રોજ્જ્વલાં
રક્તાં રક્તનવસ્રજં મણિગણૈર્યુક્તાં કુમારીમિમામ્ ।
ગાયત્રીં કમલાસનાં કરતલવ્યાનદ્ધકુણ્ડામ્બુજાં
પદ્માક્ષીં ચ વરસ્રજં ચ દધતીં હંસાધિરૂઢાં ભજે

અચિન્ત્યલક્ષણાવ્યક્તાપ્યર્થમાતૃમહેશ્વરી ।
અમૃતાર્ણવમધ્યસ્થાપ્યજિતા ચાપરાજિતા

અણિમાદિગુણાધારાપ્યર્કમણ્ડલસંસ્થિતા ।
અજરાજાપરાધર્મા અક્ષસૂત્રધરાધરા

અકારાદિક્ષકારાન્તાપ્યરિષડ્વર્ગભેદિની ।
અઞ્જનાદ્રિપ્રતીકાશાપ્યઞ્જનાદ્રિનિવાસિની

અદિતિશ્ચાજપાવિદ્યાપ્યરવિન્દનિભેક્ષણા ।
અન્તર્બહિઃસ્થિતાવિદ્યાધ્વંસિની ચાન્તરાત્મિકા

અજા ચાજમુખાવાસાપ્યરવિન્દનિભાનના ।
અર્ધમાત્રાર્થદાનજ્ઞાપ્યરિમણ્ડલમર્દિની

અસુરઘ્નીહ્યમાવાસ્યાપ્યલક્ષ્મીઘ્ન્યન્ત્યજાર્ચિતા ।
આદિલક્ષ્મીશ્ચાદિશક્તિરાકૃતિશ્ચાયતાનના

આદિત્યપદવીચારાપ્યાદિત્યપરિસેવિતા ।
આચાર્યાવર્તનાચારાપ્યાદિમૂર્તિનિવાસિની

આગ્નેયી ચામરી ચાદ્યા ચારાધ્યા ચાસનસ્થિતા ।
આધારનિલયાધારા ચાકાશાન્તનિવાસિની

આદ્યાક્ષરસમાયુક્તા ચાન્તરાકાશરૂપિણી ।
આદિત્યમણ્ડલગતા ચાન્તરધ્વાન્તનાશિની

ઇન્દિરા ચેષ્ટદા ચેષ્ટા ચેન્દીવરનિભેક્ષણા ।
ઇરાવતી ચેન્દ્રપદા ચેન્દ્રાણી ચેન્દુરૂપિણી

ઇક્ષુકોદણ્ડસંયુક્તા ચેષુસન્ધાનકારિણી ।
ઇન્દ્રનીલસમાકારા ચેડાપિઙ્‌ગલરૂપિણી

ઇન્દ્રાક્ષી ચેશ્વરી દેવી ચેહાત્રયવિવર્જિતા ।
ઉમા ચોષા હ્યુડુનિભા ઉર્વારુકફલાનના

ઉડુપ્રભા ચોડુમતી હ્યુડુપા હ્યુડુમધ્યગા ।
ઊર્ધ્વં ચાપ્યૂર્ધ્વકેશી ચાપ્યૂર્ધ્વાધોગતિભેદિની

ઊર્ધ્વબાહુપ્રિયા ચોર્મિમાલાવાગ્ગ્રન્થદાયિની ।
ઋતં ચર્ષિરૃતુમતી ઋષિદેવનમસ્કૃતા

ઋગ્વેદા ઋણહર્ત્રી ચ ઋષિમણ્ડલચારિણી ।
ઋદ્ધિદા ઋજુમાર્ગસ્થા ઋજુધર્મા ઋતુપ્રદા

ઋગ્વેદનિલયા ઋજ્વી લુપ્તધર્મપ્રવર્તિની ।
લૂતારિવરસમ્ભૂતા લૂતાદિવિષહારિણી

એકાક્ષરા ચૈકમાત્રા ચૈકા ચૈકૈકનિષ્ઠિતા ।
ઐન્દ્રી હ્યૈરાવતારૂઢા ચૈહિકામુષ્મિકપ્રદા

ઓઙ્‌કારા હ્યોષધી ચોતા ચોતપ્રોતનિવાસિની ।
ઔર્વા હ્યૌષધસમ્પન્ના ઔપાસનફલપ્રદા

અણ્ડમધ્યસ્થિતા દેવી ચાઃકારમનુરૂપિણી ।
કાત્યાયની કાલરાત્રિઃ કામાક્ષી કામસુન્દરી

કમલા કામિની કાન્તા કામદા કાલકણ્ઠિની ।
કરિકુમ્ભસ્તનભરા કરવીરસુવાસિની

કલ્યાણી કુણ્ડલવતી કુરુક્ષેત્રનિવાસિની ।
કુરુવિન્દદલાકારા કુણ્ડલી કુમુદાલયા

કાલજિહ્વા કરાલાસ્યા કાલિકા કાલરૂપિણી ।
કમનીયગુણા કાન્તિઃ કલાધારા કુમુદ્વતી

કૌશિકી કમલાકારા કામચારપ્રભઞ્જિની ।
કૌમારી કરુણાપાઙ્‌ગી કકુબન્તા કરિપ્રિયા

કેસરી કેશવનુતા કદમ્બકુસુમપ્રિયા ।
કાલિન્દી કાલિકા કાઞ્ચી કલશોદ્‍ભવસંસ્તુતા

કામમાતા ક્રતુમતી કામરૂપા કૃપાવતી ।
કુમારી કુણ્ડનિલયા કિરાતી કીરવાહના । ૩૪ ॥
કૈકેયી કોકિલાલાપા કેતકી કુસુમપ્રિયા ।
કમણ્ડલુધરા કાલી કર્મનિર્મૂલકારિણી

કલહંસગતિઃ કક્ષા કૃતકૌતુકમઙ્‌ગલા ।
કસ્તૂરીતિલકા કમ્રા કરીન્દ્રગમના કુહૂઃ

કર્પૂરલેપના કૃષ્ણા કપિલા કુહરાશ્રયા ।
કૂટસ્થા કુધરા કમ્રા કુક્ષિસ્થાખિલવિષ્ટપા

ખડ્ગખેટકરા ખર્વા ખેચરી ખગવાહના ।
ખટ્વાઙ્‌ગધારિણી ખ્યાતા ખગરાજોપરિસ્થિતા

ખલઘ્ની ખણ્ડિતજરા ખણ્ડાખ્યાનપ્રદાયિની ।
ખણ્ડેન્દુતિલકા ગઙ્‌ગા ગણેશગુહપૂજિતા

ગાયત્રી ગોમતી ગીતા ગાન્ધારી ગાનલોલુપા ।
ગૌતમી ગામિની ગાથા ગન્ધર્વાપ્સરસેવિતા

ગોવિન્દચરણાક્રાન્તા ગુણત્રયવિભાવિતા ।
ગન્ધર્વી ગહ્વરી ગોત્રા ગિરીશા ગહના ગમી

ગુહાવાસા ગુણવતી ગુરુપાપપ્રણાશિની ।
ગુર્વી ગુણવતી ગુહ્યા ગોપ્તવ્યા ગુણદાયિની

ગિરિજા ગુહ્યમાતઙ્‌ગી ગરુડધ્વજવલ્લભા ।
ગર્વાપહારિણી ગોદા ગોકુલસ્થા ગદાધરા

ગોકર્ણનિલયાસક્તા ગુહ્યમણ્ડલવર્તિની ।
ઘર્મદા ઘનદા ઘણ્ટા ઘોરદાનવમર્દિની

ઘૃણિમન્ત્રમયી ઘોષા ઘનસમ્પાતદાયિની ।
ઘણ્ટારવપ્રિયા ઘ્રાણા ઘૃણિસન્તુષ્ટકારિણી

ઘનારિમણ્ડલા ઘૂર્ણા ઘૃતાચી ઘનવેગિની ।
જ્ઞાનધાતુમયી ચર્ચા ચર્ચિતા ચારુહાસિની

ચટુલા ચણ્ડિકા ચિત્રા ચિત્રમાલ્યવિભૂષિતા ।
ચતુર્ભુજા ચારુદન્તા ચાતુરી ચરિતપ્રદા

ચૂલિકા ચિત્રવસ્ત્રાન્તા ચન્દ્રમઃકર્ણકુણ્ડલા ।
ચન્દ્રહાસા ચારુદાત્રી ચકોરી ચન્દ્રહાસિની

ચન્દ્રિકા ચન્દ્રધાત્રી ચ ચૌરી ચૌરા ચ ચણ્ડિકા ।
ચઞ્ચદ્વાગ્વાદિની ચન્દ્રચૂડા ચોરવિનાશિની

ચારુચન્દનલિપ્તાઙ્‌ગી ચઞ્ચચ્ચામરવીજિતા ।
ચારુમધ્યા ચારુગતિશ્ચન્દિલા ચન્દ્રરૂપિણી

ચારુહોમપ્રિયા ચાર્વાચરિતા ચક્રબાહુકા ।
ચન્દ્રમણ્ડલમધ્યસ્થા ચન્દ્રમણ્ડલદર્પણા

ચક્રવાકસ્તની ચેષ્ટા ચિત્રા ચારુવિલાસિની ।
ચિત્સ્વરૂપા ચન્દ્રવતી ચન્દ્રમાશ્ચન્દનપ્રિયા

ચોદયિત્રી ચિરપ્રજ્ઞા ચાતકા ચારુહેતુકી ।
છત્રયાતા છત્રધરા છાયા છન્દઃપરિચ્છદા

છાયાદેવીચ્છિદ્રનખા છન્નેન્દ્રિયવિસર્પિણી ।
છન્દોઽનુષ્ટુપ્પ્રતિષ્ઠાન્તા છિદ્રોપદ્રવભેદિની

છેદા છત્રેશ્વરી છિન્ના છુરિકા છેદનપ્રિયા ।
જનની જન્મરહિતા જાતવેદા જગન્મયી

જાહ્નવી જટિલા જેત્રી જરામરણવર્જિતા ।
જમ્બૂદ્વીપવતી જ્વાલા જયન્તી જલશાલિની

જિતેન્દ્રિયા જિતક્રોધા જિતામિત્રા જગત્પ્રિયા ।
જાતરૂપમયી જિહ્વા જાનકી જગતી જરા

જનિત્રી જહ્નુતનયા જગત્ત્રયહિતૈષિણી ।
જ્વાલામુખી જપવતી જ્વરઘ્ની જિતવિષ્ટપા

જિતાક્રાન્તમયી જ્વાલા જાગ્રતી જ્વરદેવતા ।
જ્વલન્તી જલદા જ્યેષ્ઠા જ્યાઘોષાસ્ફોટદિઙ્‌મુખી

જમ્ભિની જૃમ્ભણા જૃમ્ભા જ્વલન્માણિક્યકુણ્ડલા ।
ઝિંઝિકા ઝણનિર્ઘોષા ઝંઝામારુતવેગિની

ઝલ્લરીવાદ્યકુશલા ઞરૂપા ઞભુજા સ્મૃતા ।
ટઙ્‌કબાણસમાયુક્તા ટઙ્‌કિની ટઙ્‌કભેદિની

ટઙ્‌કીગણકૃતાઘોષા ટઙ્કનીયમહોરસા ।
ટઙ્‌કારકારિણી દેવી ઠઠશબ્દનિનાદિની

ડામરી ડાકિની ડિમ્ભા ડુણ્ડુમારૈકનિર્જિતા ।
ડામરીતન્ત્રમાર્ગસ્થા ડમડ્ડમરુનાદિની

ડિણ્ડીરવસહા ડિમ્ભલસત્ક્રીડાપરાયણા ।
ઢુણ્ઢિવિઘ્નેશજનની ઢક્કાહસ્તા ઢિલિવ્રજા

નિત્યજ્ઞાના નિરુપમા નિર્ગુણા નર્મદા નદી ।
ત્રિગુણા ત્રિપદા તન્ત્રી તુલસીતરુણાતરુઃ

ત્રિવિક્રમપદાક્રાન્તા તુરીયપદગામિની ।
તરુણાદિત્યસઙ્‌કાશા તામસી તુહિના તુરા

ત્રિકાલજ્ઞાનસમ્પન્ના ત્રિવેણી ચ ત્રિલોચના ।
ત્રિશક્તિસ્ત્રિપુરા તુઙ્‌ગા તુરઙ્‌ગવદના તથા

તિમિઙ્‌ગિલગિલા તીવ્રા ત્રિસ્રોતા તામસાદિની ।
તન્ત્રમન્ત્રવિશેષજ્ઞા તનુમધ્યા ત્રિવિષ્ટપા

ત્રિસન્ધ્યા ત્રિસ્તની તોષાસંસ્થા તાલપ્રતાપિની ।
તાટઙ્‌કિની તુષારાભા તુહિનાચલવાસિની

તન્તુજાલસમાયુક્તા તારહારાવલિપ્રિયા ।
તિલહોમપ્રિયા તીર્થા તમાલકુસુમાકૃતિઃ

તારકા ત્રિયુતા તન્વી ત્રિશઙ્‌કુપરિવારિતા ।
તલોદરી તિલાભૂષા તાટઙ્‌કપ્રિયવાહિની

ત્રિજટા તિત્તિરી તૃષ્ણા ત્રિવિધા તરુણાકૃતિઃ ।
તપ્તકાઞ્ચનસંકાશા તપ્તકાઞ્ચનભૂષણા

ત્રૈયમ્બકા ત્રિવર્ગા ચ ત્રિકાલજ્ઞાનદાયિની ।
તર્પણા તૃપ્તિદા તૃપ્તા તામસી તુમ્બુરુસ્તુતા

તાર્ક્ષ્યસ્થા ત્રિગુણાકારા ત્રિભઙ્‌ગી તનુવલ્લરિઃ ।
થાત્કારી થારવા થાન્તા દોહિની દીનવત્સલા

દાનવાન્તકરી દુર્ગા દુર્ગાસુરનિબર્હિણી ।
દેવરીતિર્દિવારાત્રિર્દ્રૌપદી દુન્દુભિસ્વના

દેવયાની દુરાવાસા દારિદ્ર્યોદ્‍ભેદિની દિવા ।
દામોદરપ્રિયા દીપ્તા દિગ્વાસા દિગ્વિમોહિની

દણ્ડકારણ્યનિલયા દણ્ડિની દેવપૂજિતા ।
દેવવન્દ્યા દિવિષદા દ્વેષિણી દાનવાકૃતિઃ

દીનાનાથસ્તુતા દીક્ષા દૈવતાદિસ્વરૂપિણી ।
ધાત્રી ધનુર્ધરા ધેનુર્ધારિણી ધર્મચારિણી

ધરંધરા ધરાધારા ધનદા ધાન્યદોહિની ।
ધર્મશીલા ધનાધ્યક્ષા ધનુર્વેદવિશારદા

ધૃતિર્ધન્યા ધૃતપદા ધર્મરાજપ્રિયા ધ્રુવા ।
ધૂમાવતી ધૂમકેશી ધર્મશાસ્ત્રપ્રકાશિની

નન્દા નન્દપ્રિયા નિદ્રા નૃનુતા નન્દનાત્મિકા ।
નર્મદા નલિની નીલા નીલકણ્ઠસમાશ્રયા

નારાયણપ્રિયા નિત્યા નિર્મલા નિર્ગુણા નિધિઃ ।
નિરાધારા નિરુપમા નિત્યશુદ્ધા નિરઞ્જના

નાદબિન્દુકલાતીતા નાદબિન્દુકલાત્મિકા ।
નૃસિંહિની નગધરા નૃપનાગવિભૂષિતા

નરકક્લેશશમની નારાયણપદોદ્‍ભવા ।
નિરવદ્યા નિરાકારા નારદપ્રિયકારિણી

નાનાજ્યોતિઃસમાખ્યાતા નિધિદા નિર્મલાત્મિકા ।
નવસૂત્રધરા નીતિર્નિરુપદ્રવકારિણી

નન્દજા નવરત્‍નાઢ્યા નૈમિષારણ્યવાસિની ।
નવનીતપ્રિયા નારી નીલજીમૂતનિઃસ્વના

નિમેષિણી નદીરૂપા નીલગ્રીવા નિશીશ્વરી ।
નામાવલિર્નિશુમ્ભઘ્ની નાગલોકનિવાસિની

નવજામ્બૂનદપ્રખ્યા નાગલોકાધિદેવતા ।
નૂપુરાક્રાન્તચરણા નરચિત્તપ્રમોદિની

નિમગ્નારક્તનયના નિર્ઘાતસમનિઃસ્વના ।
નન્દનોદ્યાનનિલયા નિર્વ્યૂહોપરિચારિણી

પાર્વતી પરમોદારા પરબ્રહ્માત્મિકા પરા ।
પઞ્ચકોશવિનિર્મુક્તા પઞ્ચપાતકનાશિની

પરચિત્તવિધાનજ્ઞા પઞ્ચિકા પઞ્ચરૂપિણી ।
પૂર્ણિમા પરમા પ્રીતિઃ પરતેજઃ પ્રકાશિની

પુરાણી પૌરુષી પુણ્યા પુણ્ડરીકનિભેક્ષણા ।
પાતાલતલનિર્મગ્ના પ્રીતા પ્રીતિવિવર્ધિની

પાવની પાદસહિતા પેશલા પવનાશિની ।
પ્રજાપતિઃ પરિશ્રાન્તા પર્વતસ્તનમણ્ડલા

પદ્મપ્રિયા પદ્મસંસ્થા પદ્માક્ષી પદ્મસમ્ભવા ।
પદ્મપત્રા પદ્મપદા પદ્મિની પ્રિયભાષિણી

પશુપાશવિનિર્મુક્તા પુરન્ધ્રી પુરવાસિની ।
પુષ્કલા પુરુષા પર્વા પારિજાતસુમપ્રિયા

પતિવ્રતા પવિત્રાઙ્‌ગી પુષ્પહાસપરાયણા ।
પ્રજ્ઞાવતીસુતા પૌત્રી પુત્રપૂજ્યા પયસ્વિની

પટ્ટિપાશધરા પઙ્‌ક્તિઃ પિતૃલોકપ્રદાયિની ।
પુરાણી પુણ્યશીલા ચ પ્રણતાર્તિવિનાશિની

પ્રદ્યુમ્નજનની પુષ્ટા પિતામહપરિગ્રહા ।
પુણ્ડરીકપુરાવાસા પુણ્ડરીકસમાનના

પૃથુજઙ્‌ઘા પૃથુભુજા પૃથુપાદા પૃથૂદરી ।
પ્રવાલશોભા પિઙ્‌ગાક્ષી પીતવાસાઃ પ્રચાપલા

પ્રસવા પુષ્ટિદા પુણ્યા પ્રતિષ્ઠા પ્રણવાગતિઃ ।
પઞ્ચવર્ણા પઞ્ચવાણી પઞ્ચિકા પઞ્જરસ્થિતા

પરમાયા પરજ્યોતિઃ પરપ્રીતિઃ પરાગતિઃ ।
પરાકાષ્ઠા પરેશાની પાવની પાવકદ્યુતિઃ

પુણ્યભદ્રા પરિચ્છેદ્યા પુષ્પહાસા પૃથૂદરી ।
પીતાઙ્‌ગી પીતવસના પીતશય્યા પિશાચિની

પીતક્રિયા પિશાચઘ્ની પાટલાક્ષી પટુક્રિયા ।
પઞ્ચભક્ષપ્રિયાચારા પૂતનાપ્રાણઘાતિની

પુન્નાગવનમધ્યસ્થા પુણ્યતીર્થનિષેવિતા ।
પઞ્ચાઙ્‌ગી ચ પરાશક્તિઃ પરમાહ્લાદકારિણી

પુષ્પકાણ્ડસ્થિતા પૂષા પોષિતાખિલવિષ્ટપા ।
પાનપ્રિયા પઞ્ચશિખા પન્નગોપરિશાયિની

પઞ્ચમાત્રાત્મિકા પૃથ્વી પથિકા પૃથુદોહિની ।
પુરાણન્યાયમીમાંસા પાટલી પુષ્પગન્ધિની

પુણ્યપ્રજા પારદાત્રી પરમાર્ગૈકગોચરા ।
પ્રવાલશોભા પૂર્ણાશા પ્રણવા પલ્લવોદરી

ફલિની ફલદા ફલ્ગુઃ ફૂત્કારી ફલકાકૃતિઃ ।
ફણીન્દ્રભોગશયના ફણિમણ્ડલમણ્ડિતા

બાલબાલા બહુમતા બાલાતપનિભાંશુકા ।
બલભદ્રપ્રિયા વન્દ્યા વડવા બુદ્ધિસંસ્તુતા

બન્દીદેવી બિલવતી બડિશઘ્ની બલિપ્રિયા ।
બાન્ધવી બોધિતા બુદ્ધિર્બન્ધૂકકુસુમપ્રિયા

બાલભાનુપ્રભાકારા બ્રાહ્મી બ્રાહ્મણદેવતા ।
બૃહસ્પતિસ્તુતા વૃન્દા વૃન્દાવનવિહારિણી

બાલાકિની બિલાહારા બિલવાસા બહૂદકા ।
બહુનેત્રા બહુપદા બહુકર્ણાવતંસિકા

બહુબાહુયુતા બીજરૂપિણી બહુરૂપિણી ।
બિન્દુનાદકલાતીતા બિન્દુનાદસ્વરૂપિણી

બદ્ધગોધાઙ્‌ગુલિત્રાણા બદર્યાશ્રમવાસિની ।
બૃન્દારકા બૃહત્સ્કન્ધા બૃહતી બાણપાતિની

વૃન્દાધ્યક્ષા બહુનુતા વનિતા બહુવિક્રમા ।
બદ્ધપદ્માસનાસીના બિલ્વપત્રતલસ્થિતા

બોધિદ્રુમનિજાવાસા બડિસ્થા બિન્દુદર્પણા ।
બાલા બાણાસનવતી વડવાનલવેગિની

બ્રહ્માણ્ડબહિરન્તઃસ્થા બ્રહ્મકઙ્‌કણસૂત્રિણી ।
ભવાની ભીષણવતી ભાવિની ભયહારિણી

ભદ્રકાલી ભુજઙ્‌ગાક્ષી ભારતી ભારતાશયા ।
ભૈરવી ભીષણાકારા ભૂતિદા ભૂતિમાલિની

ભામિની ભોગનિરતા ભદ્રદા ભૂરિવિક્રમા ।
ભૂતવાસા ભૃગુલતા ભાર્ગવી ભૂસુરાર્ચિતા

ભાગીરથી ભોગવતી ભવનસ્થા ભિષગ્વરા ।
ભામિની ભોગિની ભાષા ભવાની ભૂરિદક્ષિણા

ભર્ગાત્મિકા ભીમવતી ભવબન્ધવિમોચિની ।
ભજનીયા ભૂતધાત્રીરઞ્જિતા ભુવનેશ્વરી

ભુજઙ્‌ગવલયા ભીમા ભેરુણ્ડા ભાગધેયિની ।
માતા માયા મધુમતી મધુજિહ્વા મધુપ્રિયા

મહાદેવી મહાભાગા માલિની મીનલોચના ।
માયાતીતા મધુમતી મધુમાંસા મધુદ્રવા

માનવી મધુસમ્ભૂતા મિથિલાપુરવાસિની ।
મધુકૈટભસંહર્ત્રી મેદિની મેઘમાલિની

મન્દોદરી મહામાયા મૈથિલી મસૃણપ્રિયા ।
મહાલક્ષ્મીર્મહાકાલી મહાકન્યા મહેશ્વરી

માહેન્દ્રી મેરુતનયા મન્દારકુસુમાર્ચિતા ।
મઞ્જુમઞ્જીરચરણા મોક્ષદા મઞ્જુભાષિણી

મધુરદ્રાવિણી મુદ્રા મલયા મલયાન્વિતા ।
મેધા મરકતશ્યામા માગધી મેનકાત્મજા

મહામારી મહાવીરા મહાશ્યામા મનુસ્તુતા ।
માતૃકા મિહિરાભાસા મુકુન્દપદવિક્રમા

મૂલાધારસ્થિતા મુગ્ધા મણિપૂરકવાસિની ।
મૃગાક્ષી મહિષારૂઢા મહિષાસુરમર્દિની

યોગાસના યોગગમ્યા યોગા યૌવનકાશ્રયા ।
યૌવની યુદ્ધમધ્યસ્થા યમુના યુગધારિણી

યક્ષિણી યોગયુક્તા ચ યક્ષરાજપ્રસૂતિની ।
યાત્રા યાનવિધાનજ્ઞા યદુવંશસમુદ્‍ભવા

યકારાદિહકારાન્તા યાજુષી યજ્ઞરૂપિણી ।
યામિની યોગનિરતા યાતુધાનભયઙ્‌કરી

રુક્મિણી રમણી રામા રેવતી રેણુકા રતિઃ ।
રૌદ્રી રૌદ્રપ્રિયાકારા રામમાતા રતિપ્રિયા

રોહિણી રાજ્યદા રેવા રમા રાજીવલોચના ।
રાકેશી રૂપસમ્પન્ના રત્‍નસિંહાસનસ્થિતા

રક્તમાલ્યામ્બરધરા રક્તગન્ધાનુલેપના ।
રાજહંસસમારૂઢા રમ્ભા રક્તબલિપ્રિયા

રમણીયયુગાધારા રાજિતાખિલભૂતલા ।
રુરુચર્મપરીધાના રથિની રત્‍નમાલિકા

રોગેશી રોગશમની રાવિણી રોમહર્ષિણી ।
રામચન્દ્રપદાક્રાન્તા રાવણચ્છેદકારિણી

રત્‍નવસ્ત્રપરિચ્છન્ના રથસ્થા રુક્મભૂષણા ।
લજ્જાધિદેવતા લોલા લલિતા લિઙ્‌ગધારિણી

લક્ષ્મીર્લોલા લુપ્તવિષા લોકિની લોકવિશ્રુતા ।
લજ્જા લમ્બોદરી દેવી લલના લોકધારિણી

વરદા વન્દિતા વિદ્યા વૈષ્ણવી વિમલાકૃતિઃ ।
વારાહી વિરજા વર્ષા વરલક્ષ્મીર્વિલાસિની

વિનતા વ્યોમમધ્યસ્થા વારિજાસનસંસ્થિતા ।
વારુણી વેણુસમ્ભૂતા વીતિહોત્રા વિરૂપિણી

વાયુમણ્ડલમધ્યસ્થા વિષ્ણુરૂપા વિધિપ્રિયા ।
વિષ્ણુપત્‍ની વિષ્ણુમતી વિશાલાક્ષી વસુન્ધરા

વામદેવપ્રિયા વેલા વજ્રિણી વસુદોહિની ।
વેદાક્ષરપરીતાઙ્‌ગી વાજપેયફલપ્રદા

વાસવી વામજનની વૈકુણ્ઠનિલયા વરા ।
વ્યાસપ્રિયા વર્મધરા વાલ્મીકિપરિસેવિતા

શાકમ્ભરી શિવા શાન્તા શારદા શરણાગતિઃ ।
શાતોદરી શુભાચારા શુમ્ભાસુરવિમર્દિની

શોભાવતી શિવાકારા શઙ્‌કરાર્ધશરીરિણી ।
શોણા શુભાશયા શુભ્રા શિરઃસન્ધાનકારિણી

શરાવતી શરાનન્દા શરજ્જ્યોત્સ્ના શુભાનના ।
શરભા શૂલિની શુદ્ધા શબરી શુકવાહના

શ્રીમતી શ્રીધરાનન્દા શ્રવણાનન્દદાયિની ।
શર્વાણી શર્વરીવન્દ્યા ષડ્ભાષા ષડ્‌ઋતુપ્રિયા

ષડાધારસ્થિતા દેવી ષણ્મુખપ્રિયકારિણી ।
ષડઙ્‌ગરૂપસુમતિસુરાસુરનમસ્કૃતા

સરસ્વતી સદાધારા સર્વમઙ્‌ગલકારિણી ।
સામગાનપ્રિયા સૂક્ષ્મા સાવિત્રી સામસમ્ભવા

સર્વાવાસા સદાનન્દા સુસ્તની સાગરામ્બરા ।
સર્વૈશ્વર્યપ્રિયા સિદ્ધિઃ સાધુબન્ધુપરાક્રમા

સપ્તર્ષિમણ્ડલગતા સોમમણ્ડલવાસિની ।
સર્વજ્ઞા સાન્દ્રકરુણા સમાનાધિકવર્જિતા

સર્વોત્તુઙ્‌ગા સઙ્‌ગહીના સદ્‌ગુણા સકલેષ્ટદા ।
સરઘા સૂર્યતનયા સુકેશી સોમસંહતિઃ

હિરણ્યવર્ણા હરિણી હ્રીંકારી હંસવાહિની ।
ક્ષૌમવસ્ત્રપરીતાઙ્‌ગી ક્ષીરાબ્ધિતનયા ક્ષમા

ગાયત્રી ચૈવ સાવિત્રી પાર્વતી ચ સરસ્વતી ।
વેદગર્ભા વરારોહા શ્રીગાયત્રી પરામ્બિકા

ઇતિ સાહસ્રકં નામ્નાં ગાયત્ર્યાશ્ચૈવ નારદ ।
પુણ્યદં સર્વપાપઘ્નં મહાસમ્પત્તિદાયકમ્

એવં નામાનિ ગાયત્ર્યાસ્તોષોત્પત્તિકરાણિ હિ ।
અષ્ટમ્યાં ચ વિશેષેણ પઠિતવ્યં દ્વિજૈઃ સહ

જપં કૃત્વા હોમપૂજાધ્યાનં કૃત્વા વિશેષતઃ ।
યસ્મૈ કસ્મૈ ન દાતવ્યં ગાયત્ર્યાસ્તુ વિશેષતઃ

સુભક્તાય સુશિષ્યાય વક્તવ્યં ભૂસુરાય વૈ ।
ભ્રષ્ટેભ્યઃ સાધકેભ્યશ્ચ બાન્ધવેભ્યો ન દર્શયેત્

યદ્‌ગૃહે લિખિતં શાસ્ત્રં ભયં તસ્ય ન કસ્યચિત્ ।
ચઞ્ચલાપિ સ્થિરા ભૂત્વા કમલા તત્ર તિષ્ઠતિ

ઇદં રહસ્યં પરમં ગુહ્યાદ્‌ગુહ્યતરં મહત્ ।
પુણ્યપ્રદં મનુષ્યાણાં દરિદ્રાણાં નિધિપ્રદમ્

મોક્ષપ્રદં મુમુક્ષૂણાં કામિનાં સર્વકામદમ્ ।
રોગાદ્વૈ મુચ્યતે રોગી બદ્ધો મુચ્યેત બન્ધનાત્

બહ્મહત્યાસુરાપાનસુવર્ણસ્તેયિનો નરાઃ ।
ગુરુતલ્પગતો વાપિ પાતકાન્મુચ્યતે સકૃત્

અસત્પ્રતિગ્રહાચ્ચૈવાભક્ષ્યભક્ષાદ્વિશેષતઃ ।
પાખણ્ડાનૃતમુખ્યેભ્યઃ પઠનાદેવ મુચ્યતે

ઇદં રહસ્યમમલં મયોક્તં પદ્મજોદ્‍ભવ ।
બ્રહ્મસાયુજ્યદં નૄણાં સત્યં સત્યં ન સંશયઃ

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં દ્વાદશસ્કન્ધે ગાયત્રીસહસ્રનામસ્તોત્રવર્ણનં નામ ષષ્ઠોઽધ્યાયઃ