દેવી ભાગવત પુરાણ · અધ્યાય 12.4

ગાયત્રીહૃદયમ્
નારદ ઉવાચ
ભગવન્ દેવદેવેશ ભૂતભવ્યજગત્પ્રભો ।
કવચં ચ શ્રુતં દિવ્યં ગાયત્રીમન્ત્રવિગ્રહમ્

અધુના શ્રોતુમિચ્છામિ ગાયત્રીહૃદયં પરમ્ ।
યદ્ધારણાદ્‍ભવેત્યુણ્યં ગાયત્રીજપતોઽખિલમ્

શ્રીનારાયણ ઉવાચ
દેવ્યાશ્ચ હૃદયં પ્રોક્તં નારદાથર્વણે સ્ફુટમ્ ।
તદેવાહં પ્રવક્ષ્યામિ રહસ્યાતિરહસ્યકમ્

વિરાડ્રૂપાં મહાદેવીં ગાયત્રીં વેદમાતરમ્ ।
ધ્યાત્વા તસ્યાસ્ત્વથાઙ્‌ગેષુ ધ્યાયેદેતાશ્ચ દેવતાઃ

પિણ્ડબ્રહ્માણ્ડયોરૈક્યાદ્‍ભાવયેત્સ્વતનૌ તથા ।
દેવીરૂપે નિજે દેહે તન્મયત્વાય સાધકઃ

નાદેવોઽભ્યર્ચયેદ્દેવમિતિ વેદવિદો વિદુઃ ।
તતોઽભેદાય કાયે સ્વે ભાવયેદ્દેવતા ઇમાઃ

અથ તત્સમ્પ્રવક્ષ્યામિ તન્મયત્વમથો ભવેત્ ।
ગાયત્રીહૃદયસ્યાસ્યાપ્યહમેવ ઋષિઃ સ્મૃતઃ

ગાયત્રીચ્છન્દ ઉદ્દિષ્ટં દેવતા પરમેશ્વરી ।
પૂર્વોક્તેન પ્રકારેણ કુર્યાદઙ્‌ગાનિ ષટ્ક્રમાત્ ।
આસને વિજને દેશે ધ્યાયેદેકાગ્રમાનસઃ

ન્યાસઃ
દ્યૌર્મૂર્ધ્નિ દૈવતમ્ । દન્તપઙ્‌ક્તાવશ્વિનૌ । ઉભે સન્ધ્યે
ચોષ્ઠૌ । મુખમગ્નિઃ । જિહ્વા સરસ્વતી । ગ્રીવાયાં તુ
બૃહસ્પતિઃ । સ્તનયોર્વસવોઽષ્ટૌ । બાહ્વોર્મરુતઃ । હૃદયે
પર્જન્યઃ । આકાશમુદરમ્ । નાભાવન્તરિક્ષમ્ । કટ્યો-
રિન્દ્રાગ્ની । જઘને વિજ્ઞાનઘનઃ પ્રજાપતિઃ । કૈલાસ-
મલયે ઊરૂ । વિશ્વેદેવા જાન્વોઃ । જઙ્‌ઘાયાં કૌશિકઃ ।
ગુહ્યમયને । ઊરૂ પિતરઃ । પાદૌ પૃથિવી । વનસ્પત-
યોઽઙ્‌ગુલીષુ । ઋષયો રોમાણિ । નખાનિ મુહૂર્તાનિ ।
અસ્થિષુ ગ્રહાઃ । અસૃઙ્‌માંસમૃતવઃ । સંવત્સરા વૈ નિમિષમ્ ।
અહોરાત્રાવાદિત્યશ્ચન્દ્રમાઃ । પ્રવરાં દિવ્યાં ગાયત્રીં
સહસ્રનેત્રાં શરણમહં પ્રપદ્યે । ૐ તત્સવિતુર્વરેણ્યાય
નમઃ । ૐ તત્પૂર્વાજયાય નમઃ । તત્પ્રાતરાદિત્યાય નમઃ ।
તત્પ્રાતરાદિત્યપ્રતિષ્ઠાયૈ નમઃ । પ્રાતરધીયાનો રાત્રિકૃતં
પાપં નાશયતિ । સાયમધીયાનો દિવસકૃતં પાપં
નાશયતિ । સાયંપ્રાતરધીયાનો અપાપો ભવતિ ।
સર્વતીર્થેષુ સ્નાતો ભવતિ । સર્વૈર્દેવૈર્જ્ઞાતો ભવતિ ।
અવાચ્યવચનાત્પૂતો ભવતિ । અભક્ષ્યભક્ષણાત્પૂતો
ભવતિ । અભોજ્યભોજનાપૂતો ભવતિ । અચોષ્યચોષ-
ણાત્પૂતો ભવતિ । અસાધ્યસાધનાત્પૂતો ભવતિ ।
દુષ્પ્રતિગ્રહશતસહસ્રાત્પૂતો ભવતિ । સર્વપ્રતિગ્રહાત્પૂતો
ભવતિ । પઙ્‌ક્તિદૂષણાત્પૂતો ભવતિ । અનૃતવચનાત્પૂતો
ભવતિ । અથાબ્રહ્મચારી બ્રહ્મચારી ભવતિ । અનેન
હૃદયેનાધીતેન ક્રતુસહસ્રેણેષ્ટં ભવતિ । ષષ્ટિશત-
સહસ્રગાયત્ર્યા જપ્યાનિ ફલાનિ ભવન્તિ । અષ્ટૌ
બ્રાહ્મણાન્સમ્યગ્ગ્રાહયેત્ । તસ્ય સિદ્ધિર્ભવતિ । ય ઇદં
નિત્યમધીયાનો બ્રાહ્મણઃ પ્રાતઃ શુચિઃ સર્વપાપૈઃ
પ્રમુચ્યત ઇતિ । બ્રહ્મલોકે મહીયતે । ઇત્યાહ ભગવાન્ શ્રીનારાયણઃ ।
ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં દ્વાદશસ્કન્ધે ગાયત્રીહૃદયં નામ ચતુર્થોઽધ્યાયઃ