દેવી ભાગવત પુરાણ · અધ્યાય 12.3

ગાયત્રીમન્ત્રકવચવર્ણનમ્
નારદ ઉવાચ
સ્વામિન્સર્વજગન્નાથ સંશયોઽસ્તિ મમ પ્રભો ।
ચતુઃષષ્ટિકલાભિજ્ઞ પાતકાદ્યોગવિદ્વર

મુચ્યતે કેન પુણ્યેન બ્રહ્મરૂપઃ કથં ભવેત્ ।
દેહશ્ચ દેવતારૂપો મન્ત્રરૂપો વિશેષતઃ

કર્મ તચ્છ્રોતુમિચ્છામિ ન્યાસં ચ વિધિપૂર્વકમ્ ।
ઋષિશ્છન્દોઽધિદૈવં ચ ધ્યાનં ચ વિધિવદ્વિભો

શ્રીનારાયણ ઉવાચ
અસ્ત્યેકં પરમં ગુહ્યં ગાયત્રીકવચં તથા ।
પઠનાદ્ધારણાન્મર્ત્યઃ સર્વપાપૈઃ પ્રમુચ્યતે

સર્વાન્કામાનવાપ્નોતિ દેવીરૂપશ્ચ જાયતે ।
ગાયત્રીકવચસ્યાસ્ય બ્રહ્મવિષ્ણુમહેશ્વરાઃ

ઋષયો ઋગ્યજુઃસામાથર્વશ્છન્દાંસિ નારદ ।
બ્રહ્મરૂપા દેવતોક્તા ગાયત્રી પરમા કલા

તદ્‌બીજં ભર્ગ ઇત્યેષા શક્તિરુક્તા મનીષિભિઃ ।
કીલકં ચ ધિયઃ પ્રોક્તં મોક્ષાર્થે વિનિયોજનમ્

ચતુર્ભિર્હૃદયં પ્રોક્તં ત્રિભિર્વર્ણેઃ શિરઃ સ્મૃતમ્ ।
ચતુર્ભિઃ સ્યાચ્છિખા પશ્ચાત્ ત્રિભિસ્તુ કવચં સ્મૃતમ્

ચતુર્ભિર્નેત્રમુદ્દિષ્ટં ચતુર્ભિઃ સ્યાત્તદસ્ત્રકમ્ ।
અથ ધ્યાનં પ્રવક્ષ્યામિ સાધકાભીષ્ટદાયકમ્

મુક્તાવિદ્રુમહેમનીલધવલચ્છાયૈર્મુખૈસ્ત્રીક્ષણૈ-
ર્યુક્તામિન્દુનિબદ્ધરત્‍નમુકુટાં તત્ત્વાર્થવર્ણાત્મિકામ્ ।
ગાયત્રીં વરદાભયાઙ્‌કુશકશાઃ શુભ્રં કપાલં ગુણં
શઙ્‌ખં ચક્રમથારવિન્દયુગલં હસ્તૈર્વહન્તીં ભજે

ગાયત્રી પૂર્વતઃ પાતુ સાવિત્રી પાતુ દક્ષિણે ।
બ્રહ્મસન્ધ્યા તુ મે પશ્ચાદુત્તરાયાં સરસ્વતી

પાર્વતી મે દિશં રક્ષેત્પાવકીં જલશાયિની ।
યાતુધાની દિશં રક્ષેદ્‌યાતુધાનભયઙ્‌કરી

પાવમાની દિશં રક્ષેત્પવમાનવિલાસિની ।
દિશં રૌદ્રી ચ મે પાતુ રુદ્રાણી રુદ્રરૂપિણી

ઊર્ધ્વં બ્રહ્માણી મે રક્ષેદધસ્તાદ્વૈષ્ણવી તથા ।
એવં દશ દિશો રક્ષેત્સર્વાઙ્‌ગં ભુવનેશ્વરી

તત્પદં પાતુ મે પાદૌ જઙ્‌ઘે મે સવિતુઃ પદમ્ ।
વરેણ્યં કટિદેશે તુ નાભિં ભર્ગસ્તથૈવ ચ

દેવસ્ય મે તદ્ધૃદયં ધીમહીતિ ચ ગલ્લયોઃ ।
ધિયઃ પદં ચ મે નેત્રે યઃ પદં મે લલાટકમ્

નઃ પાતુ મે પદં મૂર્ધ્નિ શિખાયાં મે પ્રચોદયાત્ ।
તત્પદં પાતુ મૂર્ધાનં સકારઃ પાતુ ભાલકમ્

ચક્ષુષી તુ વિકારાર્ણસ્તુકારસ્તુ કપોલયોઃ ।
નાસાપુટં વકારાર્ણો રેકારસ્તુ મુખે તથા

ણિકાર ઊર્ધ્વમોષ્ઠં તુ યકારસ્ત્વધરોષ્ઠકમ્ ।
આસ્યમધ્યે ભકારાર્ણો ર્ગોકારશ્ચિબુકે તથા

દેકારઃ કણ્ઠદેશે તુ વકારઃ સ્કન્ધદેશકમ્ ।
સ્યકારો દક્ષિણં હસ્તં ધીકારો વામહસ્તકમ્

મકારો હૃદયં રક્ષેદ્ધિકાર ઉદરે તથા ।
ધિકારો નાભિદેશે તુ યોકારસ્તુ કટિં તથા

ગુહ્યં રક્ષતુ યોકાર ઊરૂ દ્વૌ નઃ પદાક્ષરમ્ ।
પ્રકારો જાનુની રક્ષેચ્ચોકારો જઙ્‌ઘદેશકમ્

દકારં ગુલ્ફદેશે તુ યકારઃ પદયુગ્મકમ્ ।
તકારવ્યઞ્જનં ચૈવ સર્વાઙ્‌ગં મે સદાવતુ

ઇદં તુ કવચં દિવ્યં બાધાશતવિનાશનમ્ ।
ચતુઃષષ્ટિકલાવિદ્યાદાયકં મોક્ષકારકમ્

મુચ્યતે સર્વપાપેભ્યઃ પરં બ્રહ્માધિગચ્છતિ ।
પઠનાચ્છ્રવણાદ્વાપિ ગોસહસ્રફલં લભેત્

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સહિતાયાં દ્વાદશસ્કન્ધે ગાયત્રીમન્ત્રકવચવર્ણનં નામ તૃતીયોઽધ્યાયઃ