દેવી ભાગવત પુરાણ · અધ્યાય 12.2

ગાયત્રિશક્ત્યાદિપ્રતિપાદનમ્
શ્રીનારાયણ ઉવાચ
વર્ણાનાં શક્તયઃ કાશ્ચ તાઃ શૃણુષ્વ મહામુને ।
વામદેવી પ્રિયા સત્યા વિશ્વા ભદ્રવિલાસિની

પ્રભાવતી જયા શાન્તા કાન્તા દુર્ગા સરસ્વતી ।
વિદ્રુમા ચ વિશાલેશા વ્યાપિની વિમલા તથા

તમોઽપહારિણી સૂક્ષ્મા વિશ્વયોનિર્જયા વશા ।
પદ્માલયા પરા શોભા ભદ્રા ચ ત્રિપદા સ્મૃતા

ચતુર્વિંશતિવર્ણાનાં શક્તયઃ સમુદાહૃતાઃ ।
અતઃ પરં વર્ણવર્ણાન્વ્યાહરામિ યથાતથમ્

ચમ્પકા અતસીપુષ્પસન્નિભં વિદ્રુમં તથા ।
સ્ફટિકાકારકં ચૈવ પદ્મપુષ્પસમપ્રભમ્

તરુણાદિત્યસઙ્‌કાશં શઙ્‌ખકુન્દેન્દુસન્નિભમ્ ।
પ્રવાલપદ્યપત્રાભં પદ્મરાગસમપ્રભમ્

ઇન્દ્રનીલમણિપ્રખ્યં મૌક્તિકં કુઙ્‌કુમપ્રભમ્ ।
અઞ્જનાભં ચ રક્તં ચ વૈદૂર્યં ક્ષૌદ્રસન્નિભમ્

હારિદ્રં કુન્દદુગ્ધાભં રવિકાન્તિસમપ્રભમ્ ।
શુકપુચ્છનિભં તદ્વચ્છતપત્રનિભં તથા

કેતકીપુષ્પસંકાશં મલ્લિકાકુસુમપ્રભમ્ ।
કરવીરશ્ચ ઇત્યેતે ક્રમેણ પરિકીર્તિતાઃ

વર્ણાઃ પ્રોક્તાશ્ચ વર્ણાનાં મહાપાપવિશોધનાઃ ।
પૃથિવ્યાપસ્તથા તેજો વાયુરાકાશ એવ ચ

ગન્ધો રસશ્ચ રૂપં ચ શબ્દઃ સ્પર્શસ્તથૈવ ચ ।
ઉપસ્થં પાયુપાદં ચ પાણી વાગપિ ચ ક્રમાત્

પ્રાણં જિહ્વા ચ ચક્ષુશ્ચ ત્વક્શ્રોત્રં ચ તતઃ પરમ્ ।
પ્રાણોઽપાનસ્તથા વ્યાનઃ સમાનશ્ચ તતઃ પરમ્

તત્ત્વાન્યેતાનિ વર્ણાનાં ક્રમશઃ કીર્તિતાનિ તુ ।
અતઃ પરં પ્રવક્ષ્યામિ વર્ણમુદ્રાઃ કમેણ તુ

સુમુખં સમ્પુટં ચૈવ વિતતં વિસ્મૃતં તથા ।
દ્વિમુખં ત્રિમુખં ચૈવ ચતુઃપઞ્ચમુખં તથા

ષણ્મુખાધોમુખં ચૈવ વ્યાપકાજ્જલિકં તથા ।
શકટં યમપાશં ચ ગ્રથિતં સન્મુખોન્મુખમ્

વિલમ્બં મુષ્ટિકં ચૈવ મત્સ્યં કૂર્મં વરાહકમ્ ।
સિંહાક્રાન્તં મહાક્રાન્તં મુદ્‌ગરં પલ્લવં તથા

ત્રિશૂલયોની સુરભિશ્ચાક્ષમાલા ચ લિઙ્‌ગકમ્ ।
અમ્બુજં ચ મહામુદ્રાસ્તુર્યરૂપાઃ પ્રકીર્તિતાઃ

ઇત્યેતાઃ કીર્તિતા મુદ્રા વર્ણાનાં તે મહામુને ।
મહાપાપક્ષયકરાઃ કીર્તિદાઃ કાન્તિદા મુને

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં દ્વાદસ્કન્ધે ગાયત્રિશક્ત્યાદિપ્રતિપાદનં નામ દ્વિતીયોઽધ્યાયઃ