દેવી ભાગવત પુરાણ · અધ્યાય 11.8

ભૂતશુદ્ધિવર્ણનમ્
શ્રીનારાયણ ઉવાચ
ભૂતશુદ્ધિપ્રકારં ચ કથયામિ મહામુને ।
મૂલાધારાત્સમુત્થાય કુણ્ડલીં પરદેવતામ્

સુષુમ્ણામાર્ગમાશ્રિત્ય બ્રહ્મરન્ધ્રગતાં સ્મરેત્ ।
જીવં બ્રહ્મણિ સંયોજ્ય હંસમન્ત્રેણ સાધકઃ

પાદાદિજાનુપર્યન્તં ચતુષ્કોણં સવજ્રકમ્ ।
લં બીજાખ્યં સ્વર્ણવર્ણં સ્મરેદવનિમણ્ડલમ્

જાન્વાદ્યાનાભિચન્દ્રાર્ધનિભં પદ્મદ્વયાઙ્‌કિતમ્ ।
વં બીજયુક્તં શ્વેતાભમમ્ભસો મણ્ડલં સ્મરેત્

નાભેર્હૃદયપર્યન્તં ત્રિકોણં સ્વસ્તિકાન્વિતમ્ ।
રં બીજેન યુતં રક્તં સ્મરેત્પાવકમણ્ડલમ્

હૃદો ભૂમધ્યપર્યન્તં વૃત્તં ષડ્‌બિન્દુલાઞ્છિતમ્ ।
યં બીજયુક્તં ધૂમ્રાભં નભસ્વન્મણ્ડલં સ્મરેત્

આબ્રહ્મરન્ધ્રં ભ્રૂમધ્યાદ્‌વૃત્તં સ્વચ્છં મનોહરમ્ ।
હં બીજયુક્તમાકાશમણ્ડલં ચ વિચિન્તયેત્

એવં ભૂતાનિ સઞ્ચિન્ત્ય પ્રત્યેકં સંવિલાપયેત્ ।
ભુવં જલે જલં વહ્નૌ વહ્નિં વાયૌ નભસ્યમુમ્

વિલાપ્ય ખમહઙ્‌કારે મહત્તત્ત્વેઽપ્યહઙ્‌કૃતિમ્ ।
મહાન્તં પ્રકૃતૌ માયામાત્મનિ પ્રવિલાપયેત્

શુદ્ધસંવિન્મયો ભૂત્વા ચિન્તયેત્પાપપૂરુષમ્ ।
વામકુક્ષિસ્થિતં કૃષ્ણમઙ્‌ગુષ્ઠપરિમાણકમ્

બ્રહ્મહત્યાશિરોયુક્તં કનકસ્તેયબાહુકમ્ ।
મદિરાપાનહૃદયં ગુરુતલ્પકટીયુતમ્

તત્સંસર્ગિપદદ્વન્દ્વમુપપાતકમસ્તકમ્ ।
ખડ્ગચર્મધરં કૃષ્ણમધોવક્ત્રં સુદુઃસહમ્

વાયુબીજં સ્મરન્વાયું સમ્પૂર્યૈનં વિશોષયેત્ ।
સ્વશરીરયુતં મન્ત્રો વહ્નિબીજેન નિર્દહેત્

કુમ્ભકે પરિજપ્તેન તતઃ પાપનરોદ્‍ભવમ્ ।
બહિર્ભસ્મ સમુત્સાર્ય વાયુબીજેન રેચયેત્

સુધાબીજેન દેહોત્થં ભસ્મ સંપ્લાવયેત્સુધીઃ ।
ભૂબીજેન ઘનીકૃત્ય ભસ્મ તત્કનકાણ્ડવત્

વિશુદ્ધમુકુરાકારં જપન્બીજં વિહાયસઃ ।
મૂર્ધાદિપાદપર્યન્તાન્યઙ્‌ગાનિ રચયેત્સુધીઃ

આકાશાદીનિ ભૂતાનિ પુનરુત્પાદયેચ્ચિતઃ ।
સોઽહં મન્ત્રેણ ચાત્માનમાનયેદ્ધૃદયામ્બુજે

કુણ્ડલીજીવમાદાય પરસઙ્‌ગાત્સુધામયમ્ ।
સંસ્થાપ્ય હૃદયામ્ભોજે મૂલાધારગતાં સ્મરેત્

રક્તામ્ભોધિસ્થપોતોલ્લસદરુણ-
સરોજાધિરૂઢા કરાબ્જૈઃ
શૂલં કોદણ્ડમિક્ષૂદ્‍ભવમણિગુણ-
મપ્યઙ્‌કુશં પઞ્ચબાણાન્ ।
બિભ્રાણાસૃક્કપાલં ત્રિનયન-
લસિતા પીનવક્ષોરુહાઢ્યા
દેવી બાલાર્કવર્ણા ભવતુ
સુખકરી પ્રાણશક્તિઃ પરા નઃ

એવં ધ્યાત્વા પ્રાણશક્તિં પરમાત્મસ્વરૂપિણીમ્ ।
વિભૂતિધારણં કાર્યં સર્વાધિકૃતિસિદ્ધયે

વિભૂતેર્વિસ્તરં વક્ષ્યે ધારણે ચ મહાફલમ્ ।
શ્રુતિસ્મૃતિપ્રમાણોક્તં ભસ્મધારણમુત્તમમ્

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં
સંહિતાયાં એકાદશસ્કન્ધે ભૂતશુદ્ધિવર્ણનં નામાષ્ટમોઽધ્યાયઃ