દેવી ભાગવત પુરાણ · અધ્યાય 11.5

રુદ્રાક્ષજપમાલાવિધાનવર્ણનમ્
ઈશ્વર ઉવાચ
લક્ષણં જપમાલાયાઃ શૃણુ વક્ષ્યામિ ષણ્મુખ ।
રુદ્રાક્ષસ્ય મુખં બ્રહ્મા બિન્દૂ રુદ્ર ઇતીરિતઃ

વિષ્ણુઃ પુચ્છં ભવેચ્ચૈવ ભોગમોક્ષફલપ્રદમ્ ।
પઞ્ચવિંશતિભિશ્ચાક્ષૈઃ પઞ્ચવક્ત્રૈઃ સકણ્ટકૈઃ

રક્તવર્ણૈઃ સિતૈર્મિશ્રૈઃ કૃતરન્ધ્રવિદર્ભિતૈઃ ।
અક્ષસૂત્રં પ્રકર્તવ્યં ગોપુચ્છવલયાકૃતિ

વક્ત્રં વક્ત્રેણ સંયોજ્ય પુચ્છં પુચ્છેન યોજયેત્ ।
મેરુમૂર્ધ્વમુખં કુર્યાત્તદૂર્ધ્વં નાગપાશકમ્

એવં સંગ્રથિતાં માલાં મન્ત્રસિદ્ધિપ્રદાયિનીમ્ ।
પ્રક્ષાલ્ય ગન્ધતોયેન પઞ્ચગવ્યેન ચોપરિ

તતઃ શિવામ્ભસાઽઽક્ષાલ્ય તતો મન્ત્રગણાન્ન્યસેત્ ।
સ્પૃષ્ટ્વા શિવાસ્ત્રમન્ત્રેણ કવચેનાવગુણ્ઠયેત્

મૂલમન્ત્રં ન્યસેત્પશ્ચાત્પૂર્વવત્કારયેત્તથા ।
સદ્યોજાતાદિભિઃ પ્રોક્ષ્ય યાવદષ્ટોત્તરં શતમ્

મૂલમન્ત્રં સમુચ્ચાર્ય શુદ્ધભૂમૌ નિધાય ચ ।
તસ્યોપરિ ન્યસેત્સામ્બં શિવં પરમકારણમ્

પ્રતિષ્ઠિતા ભવેન્માલા સર્વકામફલપ્રદા ।
યસ્ય દેવસ્ય યો મન્ત્રસ્તાં તેનૈવાભિપૂજયેત્

મૂર્ધ્નિ કણ્ઠેઽથવા કર્ણે ન્યસેદ્વા જપમાલિકામ્ ।
રુદ્રાક્ષમાલયા ચૈવં જપ્તવ્યં નિયતાત્મના

કણ્ઠે મૂર્ધ્નિ હૃદિ પ્રાન્તે કર્ણે બાહુયુગેઽથવા ।
રુદ્રાક્ષધારણં નિત્યં ભક્ત્યા પરમયા યુતઃ । ૧૧ ॥
કિમત્ર બહુનોક્તેન વર્ણનેન પુનઃ પુનઃ ।
રુદ્રાક્ષધારણં નિત્યં તસ્માદેતત્પ્રશસ્યતે

સ્નાને દાને જપે હોમે વૈશ્વદેવે સુરાર્ચને ।
પ્રાયશ્ચિત્તે તથા શ્રાદ્ધે દીક્ષાકાલે વિશેષતઃ

અરુદ્રાક્ષધરો ભૂત્વા યત્કિઞ્ચિત્કર્મ વૈદિકમ્ ।
કુર્વન્વિપ્રસ્તુ મોહેન નરકે પતતિ ધ્રુવમ્

રુદ્રાક્ષં ધારયેન્મૂર્ધ્નિ કણ્ઠે સૂત્રે કરેઽથવા ।
સુવર્ણમણિસમ્ભિન્નં શુદ્ધં નાન્યૈર્ધૃતં શિવમ્

નાશુચિર્ધારયેદક્ષં સદા ભક્ત્યૈવ ધારયેત્ ।
રુદ્રાક્ષતરુસમ્ભૂતવાતોદ્‍ભૂતતૃણાન્યપિ

પુણ્યલોકં ગમિષ્યન્તિ પુનરાવૃત્તિદુર્લભમ્ ।
રુદ્રાક્ષં ધારયન્પાપં કુર્વન્નપિ ચ માનવઃ

સર્વં તરતિ પાપ્માનં જાબાલશ્રુતિરાહ હિ ।
પશવો હિ ચ રુદ્રાક્ષધારણાદ્યાન્તિ રુદ્રતામ્

કિમુ યે ધારયન્તિ સ્મ નરા રુદ્રાક્ષમાલિકામ્ ।
રુદ્રાક્ષઃ શિરસા હ્યેકો ધાર્યો રુદ્રપરૈઃ સદા

ધ્વંસનં સર્વદુઃખાનાં સર્વપાપવિમોચનમ્ ।
વ્યાહરન્તિ ચ નામાનિ યે શમ્ભોઃ પરમાત્મનઃ

રુદ્રાક્ષાલઙ્‌કૃતા યે ચ તે વૈ ભાગવતોત્તમાઃ ।
રુદ્રાક્ષધારણં કાર્યં સર્વશ્રેયોઽર્થિભિર્નૃભિઃ

કર્ણપાશે શિખાયાં ચ કણ્ઠે હસ્તે તથોદરે ।
મહાદેવશ્ચ વિષ્ણુશ્ચ બ્રહ્મા તેષાં વિભૂતયઃ

દેવાશ્ચાન્યે તથા ભક્ત્યા ખલુ રુદ્રાક્ષધારિણઃ ।
ગોત્રર્ષયશ્ચ સર્વેષાં કૂટસ્થા મૂલરૂપિણઃ

તેષાં વંશપ્રસૂતાશ્ચ મુનયઃ સકલા અપિ ।
શ્રૌતધર્મપરાઃ શુદ્ધાઃ ખલુ રુદ્રાક્ષધારિણઃ

શ્રદ્ધા ન જાયતે સાક્ષાદ્વેદસિદ્ધે વિમુક્તિદે ।
બહૂનાં જન્મનામન્તે મહાદેવપ્રસાદતઃ

રુદ્રાક્ષધારણે વાઞ્છા સ્વભાવાદેવ જાયતે ।
રુદ્રાક્ષસ્ય તુ માહાત્મ્યં જાબાલૈરાદરેણ તુ

પઠ્યતે મુનિભિઃ સર્વૈર્મયા પુત્ર તથૈવ ચ ।
રુદ્રાક્ષસ્ય ફલં ચૈવ ત્રિષુ લોકેષુ વિશ્રુતમ્

ફલસ્ય દર્શને પુણ્યં સ્પર્શાત્કોટિગુણં ભવેત્ ।
શતકોટિગુણં પુણ્યં ધારણાલ્લભતે નરઃ

લક્ષકોટિસહસ્રાણિ લક્ષકોટિશતાનિ ચ ।
જપાચ્ચ લભતે નિત્યં નાત્ર કાર્યા વિચારણા

હસ્તે ચોરસિ કણ્ઠે ચ કર્ણયોર્મસ્તકે તથા ।
રુદ્રાક્ષં ધારયેદ્યસ્તુ સ રુદ્રો નાત્ર સંશયઃ

અવધ્યઃ સર્વભૂતાનાં રુદ્રવદ્ધિ ચરેદ્‌ભુવિ ।
સુરાણામસુરાણાં ચ વન્દનીયો યથા શિવઃ

રુદ્રાક્ષધારી સતતં વન્દનીયસ્તથા નરૈઃ ।
ઉચ્છિષ્ટો વા વિકર્મસ્થો યુક્તો વા સર્વપાતકૈઃ

મુચ્યતે સર્વપાપેભ્યો રુદ્રાક્ષસ્ય તુ ધારણાત્ ।
કણ્ઠે રુદ્રાક્ષમાબધ્ય શ્વાપિ વા મ્રિયતે યદિ

સોઽપિ મુક્તિમવાપ્નોતિ કિં પુનર્માનુષોઽપિ સઃ ।
જપધ્યાનવિહીનોઽપિ રુદ્રાક્ષં યદિ ધારયેત્

સર્વપાપવિનિર્મુક્તઃ સ યાતિ પરમાં ગતિમ્ ।
એકં વાપિ હિ રુદ્રાક્ષં કૃત્વા યત્‍નેન ધારયેત્

એકવિંશતિમુદ્ધૃત્ય રુદ્રલોકે મહીયતે ।
અતઃ પરં પ્રવક્ષ્યામિ રુદ્રાક્ષસ્ય પુનર્વિધિમ્

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયામેકાદશસ્કન્ધે
રુદ્રાક્ષજપમાલાવિધાનવર્ણનં નામ પઞ્ચમોઽધ્યાયઃ