દેવી ભાગવત પુરાણ · અધ્યાય 11.19

મધ્યાહ્નસંધ્યાવર્ણનમ્
શ્રીનારાયણ ઉવાચ
અથાતઃ શ્રૂયતાં બ્રહ્મન્ સન્ધ્યાં માધ્યાહ્નિકીં શુભામ્ ।
યદનુષ્ઠાનતોઽપૂર્વં જાયતેઽત્યુત્તમં ફલમ્

સાવિત્રીં યુવતીં શ્વેતવર્ણાં ચૈવ ત્રિલોચનામ્ ।
વરદાં ચાક્ષમાલાઢ્યાં ત્રિશૂલાભયહસ્તકામ્

વૃષારૂઢાં યજુર્વેદસંહિતાં રુદ્રદેવતામ્ ।
તમોગુણયુતાં ચૈવ ભુવર્લોકવ્યવસ્થિતામ્

આદિત્યમાર્ગસંચારકર્ત્રીં માયાં નમામ્યહમ્ ।
આદિદેવીમથ ધ્યાત્વાઽઽચમનાદિ ચ પૂર્વવત્

અથ ચાર્ઘ્યપ્રકરણં પુષ્પાણિ ચિનુયાત્તતઃ ।
તદલાભે બિલ્વપત્રં તોયેન મિશ્રયેત્તતઃ

ઊર્ધ્વં ચ સૂર્યાભિમુખં ક્ષિપ્ત્વાર્ઘ્યં પ્રતિપાદયેત્ ।
પ્રાતઃસન્ધ્યાદિવત્સર્વમુપસંહારપૂર્વકમ્

મધ્યાહ્ને કેચિદિચ્છન્તિ સાવિત્રીં તુ તદિત્યૃચમ્ ।
અસમ્પ્રદાયં તત્કર્મ કાર્યહાનિસ્તુ જાયતે

કારણં સન્ધ્યયોશ્ચાત્ર મન્દેહા નામ રાક્ષસાઃ ।
ભક્ષિતું સૂર્યમિચ્છન્તિ કારણં શ્રુતિચોદિતમ્

અતસ્તુ કારણાદ્વિપ્રઃ સન્ધ્યાં કુર્યાત્પ્રયત્‍નતઃ ।
સન્ધ્યયોરુભયોર્નિત્યં ગાયત્ર્યા પ્રણવેન ચ

અમ્ભસ્તુ પ્રક્ષિપેત્તેન નાન્યથા શ્રુતિઘાતકઃ ।
આકૃષ્ણેનેતિ મન્ત્રેણ પુષ્પૈર્વામ્બુવિમિશ્રિતમ્

અલાભે બિલ્વદૂર્વાદિપત્રેણોક્તેન પૂર્વકમ્ ।
અર્ધ્યં દદ્યાત્પ્રયત્‍નેન સાઙ્‌ગં સન્ધ્યાફલં લભેત્

અત્રૈવ તર્પણં વક્ષ્યે શૃણુ દેવર્ષિસત્તમ ।
ભુવઃ પુનઃ પૂરુષં તુ તર્પયામિ નમો નમઃ

યજુર્વેદં તર્પયામિ મણ્ડલં તર્પયામિ ચ ।
હિરણ્યગર્ભં ચ તથાન્તરાત્માનં તથૈવ ચ

સાવિત્રીં ચ તતો દેવમાતરં સાઙ્‌કૃતિં તથા ।
સન્ધ્યાં તથૈવ યુવતીં રુદ્રાણીં નીમૃજાં તથા

સર્વાર્થાનાં સિદ્ધિકરીં સર્વમન્ત્રાર્થસિદ્ધિદામ્ ।
ભૂર્ભુવઃ સ્વઃ પૂરુષં તુ ઇતિ મધ્યાહ્નતર્પણમ્

ઉદુત્યમિતિ સૂક્તેન સૂર્યોપસ્થાનમેવ ચ ।
ચિત્રં દેવાનામિતિ ચ સૂર્યોપસ્થાનમાચરેત્

તતો જપં પ્રકુર્વીત મન્ત્રસાધનતત્પરઃ ।
જપસ્યાપિ પ્રકારં તુ વક્ષ્યામિ શૃણુ નારદ

કૃત્વોત્તાનૌ કરૌ પ્રાતઃ સાયં ચાધઃ કરૌ તથા ।
મધ્યાહ્ને હૃદયસ્થૌ તુ કૃત્વા જપમુદીરયેત્

પર્વદ્વયમનામિક્યાઃ કનિષ્ઠાદિક્રમેણ તુ ।
તર્જનીમૂલપર્યન્તં કરમાલા પ્રકીર્તિતા

ગોઘ્નઃ પિતૃઘ્નો માતૃઘ્નો ભ્રૂણહા ગુરુતલ્પગઃ ।
બ્રહ્મસ્વક્ષેત્રહારી ચ યશ્ચ વિપ્રઃ સુરાં પિબેત્

સ ગાયત્ર્યા સહસ્રેણ પૂતો ભવતિ માનવઃ ।
માનસં વાચિકં પાપં વિષયેન્દ્રિયસઙ્‌ગજમ્

તત્કિલ્બિષં નાશયતિ ત્રીણિ જન્માનિ માનવઃ ।
ગાયત્રીં યો ન જાનાતિ વૃથા તસ્ય પરિશ્રમઃ

પઠેચ્ચ ચતુરો વેદાન્ ગાયત્રીં ચૈકતો જપેત્ ।
વેદાનાં ચાવૃતેસ્તદ્વદ્‌ગાયત્રીજપ ઉત્તમઃ

ઇતિ મધ્યાહ્નસન્ધ્યાયાઃ પ્રકારઃ કીર્તિતો મયા ।
અતઃ પરં પ્રવક્ષ્યામિ બ્રહ્મયજ્ઞવિધિક્રમમ્

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં
એકાદશસ્કન્ધે મધ્યાહ્નસંધ્યાવર્ણનં નામૈકોનવિંશોઽધ્યાયઃ