દેવી ભાગવત પુરાણ · અધ્યાય 10.9

ચાક્ષુષમનુવૃત્તવર્ણનમ્
શ્રીનારાયણ ઉવાચ
અથાતઃ શ્રૂયતાં ચિત્રં દેવીમાહાક્ત્યમુત્તમમ્ ।
અઙ્‌ગપુત્રેણ મનુના યથાઽઽપ્તં રાજ્યમુત્તમમ્

અઙ્‌ગસ્ય રાજ્ઞઃ પુત્રોઽભૂચ્ચાક્ષુષો મનુરુત્તમઃ ।
ષષ્ઠઃ સુપુલહં નામ બ્રહ્મર્ષિં શરણં ગતઃ

બ્રહ્મર્ષે ત્વામહં પ્રાપ્તઃ શરણં પ્રણતાર્તિહન્ ।
શાધિ માં કિઙ્‌કરંસ્વામિન્ યેનાહં પ્રાપ્નુયાં શ્રિયમ્

મેદિન્યાશ્ચાધિપત્યં મે સ્યાદ્યથાવદખણ્ડિતમ્ ।
અવ્યાહતં ભુજબલં શસ્ત્રાસ્ત્રનિપુણં ક્ષમમ્

સન્તતિશ્ચિરકાલીનાપ્યખણ્ડં વય ઉત્તમમ્ ।
અન્તેઽપવર્ગલાભશ્ચ સ્યાત્તથોપદિશાદ્ય મે

ઇત્યેવં વચનં તસ્ય મનોઃ કર્ણપથેઽભવત્ ।
પ્રત્યુવાચ મુનિઃ શ્રીમાન્ દેવ્યાઃ સંરાધનં પરમ્

રાજન્નાકર્ણય વચો મમ શ્રોત્રસુખં મહત્ ।
શિવામારાધયાદ્ય ત્વં તત્પ્રસાદાદિદં ભવેત્

ચાક્ષુષ ઉવાચ
કીદૃગારાધનં દેવ્યાસ્તસ્યાઃ પરમપાવનમ્ ।
કેનાકારેણ કર્તવ્યં કારુણ્યાદ્વક્તુમર્હસિ

મુનિરુવાચ
રાજન્નાકર્ણ્યતાં દેવ્યાઃ પૂજનં પરમવ્યયમ્ ।
વાગ્ભવં બીજમવ્યક્તં સઞ્જપ્યમનિશં તથા

ત્રિકાલં સઞ્જપન્મર્ત્યો ભુક્તિમુક્તી લભેત્તુ હિ ।
ન બીજં વાગ્ભવાદન્યદસ્તિ રાજન્યનન્દન

જપાત્સિદ્ધિકરં વીર્યબલવૃદ્ધિકરં પરમ્ ।
એતસ્ય જાપાત્પાદ્મોઽપિ સૃષ્ટિકર્તા મહાબલઃ

વિષ્ણુર્યજ્જપતઃ સૃષ્ટિપાલકઃ પરિકીર્તિતઃ ।
મહેશ્વરોઽપિ સંહર્તા યજ્જપાદભવન્નૃપ

લોકપાલાસ્તથાન્યેઽપિ નિગ્રહાનુગ્રહક્ષમાઃ ।
યદાશ્રયાદભૂવંસ્તે બલવીર્યમદોદ્ધતાઃ

એવં ત્વમપિ રાજન્ય મહેશીં જગદમ્બિકામ્ ।
સમારાધ્ય મહર્દ્ધિં ચ લપ્સ્યસેઽચિરકાલતઃ

એવં સ મુનિવર્યેણ પુલહેન પ્રબોધિતઃ ।
અઙ્‌ગપુત્રસ્તપસ્તપ્તું જગામ વિરજાં નદીમ્

સ ચ તેપે તપસ્તીવ્રં વાગ્ભવસ્ય જપે રતઃ ।
બીજસ્ય પૃથિવીપાલઃ શીર્ણપર્ણાશનો વિભુઃ

પ્રથમેઽબ્દે પલ્લવાશો દ્વિતીયે તોયભક્ષણઃ ।
તૃતીયેઽબ્દે પવનભુક્ તસ્થૌ સ્થાણુરિવાચલઃ

એવં દ્વાદશ વર્ષાણિ ત્યક્તાહારસ્ય ભૂભુજઃ ।
વાગ્ભવં જપતો નિત્યં મતિરાસીચ્છુભાન્વિતા

તથા ચ દેવ્યાઃ પરમં મન્ત્રં સજ્જપતો રહઃ ।
પ્રાદુરાસીજ્જગન્માતા સાક્ષાચ્છ્રીપરમેશ્વરી

તેજોમયી દુરાધર્ષા સર્વદેવમયીશ્વરી ।
ઉવાચાઙ્‌ગતનૂજં તં પ્રસન્ના લલિતાક્ષરમ્

દેવ્યુવાચ
પૃથિવીપાલ તે યત્સ્યાચ્ચિન્તિતં પરમં વરમ્ ।
તદ્‌ બ્રૂહિ સમ્પ્રદાસ્યામિ તપસા તે સુતોષિતા

ચાક્ષુષ ઉવાચ
જાનાસિ દેવદેવેશિ યત્પ્રાર્થ્યં મનસેપ્સિતમ્ ।
અન્તર્યામિસ્વરૂપેણ તત્સર્વં દેવપૂજિતે

તથાપિ મમ ભાગ્યેન જાતં યત્તવ દર્શનમ્ ।
બ્રવીમિ દેવિ મે દેહિ રાજ્યં મન્વન્તરાશ્રિતમ્

દેવ્યુવાચ
દત્તં મન્વન્તરસ્યાસ્ય રાજ્યં રાજન્યસત્તમ ।
પુત્રા મહાબલાસ્તે ચ ભવિષ્યન્તિ ગુણાધિકાઃ

રાજ્યં નિષ્કણ્ટકં ભાવિ મોક્ષોઽન્તે ચાપિ નિશ્ચિતઃ ।
એવં દત્ત્વા પરં દેવી મનવે વરમુત્તમમ્

જગામાદર્શનં સદ્યસ્તેન ભક્ત્યા ચ સંસ્તુતા ।
સોઽપિ રાજા મનુઃ ષષ્ઠઃ પ્રસાદાત્તુ તદાશ્રયાત્

બભૂવ મનુમાન્યોઽસૌ સાર્વભૌમસુખૈર્વૃતઃ ।
પુત્રાસ્તસ્ય બલોદ્યુક્તાઃ કાર્યભારસહાદૃતાઃ

દેવીભક્તાશ્ચ શૂરાશ્ચ મહાબલપરાક્રમાઃ ।
અન્યત્ર માનનીયાશ્ચ મહારાજ્યસુખાસ્પદાઃ

એવં ચ ચાક્ષુષમનુર્દેવ્યારાધનતઃ પ્રભુઃ ।
બભૂવ મનુવર્યોઽસૌ જગામાન્તે શિવાપદમ્

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં દશમસ્કન્ધે દેવીચરિત્રે ચાક્ષુષમનુવૃત્તવર્ણનં નામ નવમોઽધ્યાયઃ