દેવી ભાગવત પુરાણ · અધ્યાય 10.7

વિન્ધ્યવૃદ્ધ્યવરોધવર્ણનમ્
સૂત ઉવાચ
ઇતિ વાક્યં સમાકર્ણ્ય વિબુધાનાં દ્વિજોત્તમઃ ।
કરિષ્યે કાર્યમેતદ્વઃ પ્રત્યુવાચ તતો મુનિઃ

અઙ્‌ગીકૃતે તદા કાર્યે મુનિના કુમ્ભજન્મના ।
દેવાઃ પ્રમુદિતાઃ સર્વે બભૂબુર્દ્વિજસત્તમાઃ

તે દેવાઃ સ્વાનિ ધિષ્ણ્યાનિ ભેજિરે મુનિવાક્યતઃ ।
પત્‍નીં મુનિવરઃ શ્રીમાનુવાચ નૃપકન્યકામ્

અયે નૃપસુતે પ્રાપ્તો વિઘ્નોઽનર્થસ્ય કારકઃ ।
ભાનુમાર્ગનિરોધેન કૃતો વિન્ધ્યમહીભૃતા

આજ્ઞાતં કારણં તચ્ચ સ્મૃતં વાક્યં પુરાતનમ્ ।
કાશીમુદ્દિશ્ય યદ્‌ગીતં મુનિભિસ્તત્ત્વદર્શિભિઃ

અવિમુક્તં ન મોક્તવ્યં સર્વથૈવ મુમુક્ષુભિઃ ।
કિન્તુ વિઘ્ના ભવિષ્યન્તિ કાશ્યાં નિવસતાં સતામ્

સોઽન્તરાયો મયા પ્રાપ્તઃ કાશ્યાં નિવસતા પ્રિયે ।
ઇત્યેવમુક્ત્વા ભાર્યાં તાં મુનિઃ પરમતાપનઃ

મણિકર્ણ્યાં સમાપ્લુત્ય દૃષ્ટ્વા વિશ્વેશ્વરં વિભુમ્ ।
દણ્ડપાણિં સમભ્યર્ચ્ય કાલરાજં સમાગતઃ

કાલરાજ મહાબાહો ભક્તાનાં ભયહારક ।
કથં દૂરયસે પુર્યાઃ કાશીપુર્યાસ્ત્વમીશ્વરઃ

ત્વં કાશીવાસવિઘ્નાનાં નાશકો ભક્તરક્ષકઃ ।
માં કિં દૂરયસે સ્વામિન્ ભક્તાર્તિવિનિવારક

પરાપવાદો નોક્તો મે ન પૈશુન્યં ન ચાનૃતમ્ ।
કેન કર્મવિપાકેન કાશ્યા દૂરં કરોષિ મામ્

એવં પ્રાર્થ્ય ચ તં કાલનાથં કુમ્ભોદ્‍ભવો મુનિઃ ।
જગામ સાક્ષિવિઘ્નેશં સર્વવિઘ્નનિવારણમ્

તં દૃષ્ટ્વાભ્યર્ચ્ય સમ્પ્રાર્થ્ય તતઃ પુર્યા વિનિર્ગતઃ ।
લોપામુદ્રાપતિઃ શ્રીમાનગસ્ત્યો દક્ષિણાં દિશમ્

કાશીવિરહસન્તપ્તો મહાભાગ્યનિધિર્મુનિઃ ।
સંસ્મૃત્યાનુક્ષણં કાશીં જગામ સહ ભાર્યયા

તપોયાનમિવારુહ્ય નિમિષાર્ધેન વૈ મુનિઃ ।
અગ્રે દદર્શ તં વિન્ધ્યં રુદ્ધામ્બરમથોન્નતમ્

ચકમ્પે ચાચલસ્તૂર્ણં દૃષ્ટ્વૈવાગ્રે સ્થિતં મુનિમ્ ।
ગિરિઃ ખર્વતરો ભૂત્વા વિવક્ષુરવનીમિવ

દણ્ડવત્પતિતો ભૂમૌ સાષ્ટાઙ્‌ગં ભક્તિભાવિતઃ ।
તં દૃષ્ટ્વા નમ્રશિખરં વિન્ધ્યં નામ મહાગિરિમ્

પ્રસન્નવદનોઽગસ્ત્યો મુનિર્વિન્ધ્યમથાબ્રવીત્ ।
વત્સૈવં તિષ્ઠ તાવત્ત્વં યાવદાગમ્યતે મયા

અશક્તોઽહં ગણ્ડશૈલારોહણે તવ પુત્રક ।
એવમુક્ત્વા મુનિર્યામ્યદિશં પ્રતિ ગમોત્સુકઃ

આરુહ્ય તસ્ય શિખરાણ્યવારુહદનુક્રમાત્ ।
ગતો યામ્યદિશં ચાપિ શ્રીશૈલં પ્રેક્ષ્ય વર્ત્મનિ

મલયાચલમાસાદ્ય તત્રાશ્રમપરોઽભવત્ ।
સાપિ દેવી તત્ર વિન્ધ્યમાગતા મનુપૂજિતા

લોકેષુ પ્રથિતા વિન્ધ્યવાસિનીતિ ચ શૌનક ।
સૂત ઉવાચ
એતચ્ચરિત્રં પરમં શત્રુનાશનમુત્તમમ્

અગસ્ત્યવિન્ધ્યનગયોરાખ્યાનં પાપનાશનમ્ ।
રાજ્ઞાં વિજયદં તચ્ચ દ્વિજાનાં જ્ઞાનવર્ધનમ્

વૈશ્યાનાં ધાન્યધનદં શૂદ્રાણાં સુખદં તથા ।
ધર્માર્થી ધર્મમાપ્નોતિ ધનાર્થી ધનમાપ્નુયાત્

કામાનવાપ્નુયાત્કામી ભક્ત્યા ચાસ્ય સકૃચ્છ્રવાત્ ।
એવં સ્વાયમ્ભુવમનુર્દેવીમારાધ્ય ભક્તિતઃ

લેભે રાજ્યં ધરાયાશ્ચ નિજમન્વન્તરાશ્રયમ્ ।
ઇત્યેતદ્વર્ણિતં સૌમ્ય મયા મન્વન્તરાશ્રિતમ્ ।
આદ્યં ચરિત્રં શ્રીદેવ્યાઃ કિં પુનઃ કથયામિ તે

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં દશમસ્કન્ધે વિન્ધ્યવૃદ્ધ્યવરોધવર્ણનં નામ સપ્તમોઽધ્યાયઃ