દેવી ભાગવત પુરાણ · અધ્યાય 10.6

અગસ્ત્યાશ્વાસનવર્ણનમ્
સૂત ઉવાચ
શ્રીશસ્ય વચનાદ્દેવાઃ સન્તુષ્ટાઃ સર્વ એવ હિ ।
પ્રસન્નમનસો ભૂત્વા પુનરેનં સમૂચિરે

દેવા ઊચુઃ
દેવદેવ મહાવિષ્ણો સૃષ્ટિસ્થિત્યન્તકારણ ।
વિષ્ણો વિન્ધ્યનગોઽર્કસ્ય માર્ગરોધં કરોતિ હિ

તેન ભાનુવિરોધેન સર્વ એવ મહાવિભો ।
અલબ્ધભોગભાગા હિ કિં કુર્મઃ કુત્ર યામ હિ

શ્રીભગવાનુવાચ
યા કર્ત્રી સર્વજગતામાદ્યા ચ કુલવર્ધની ।
દેવી ભગવતી તસ્યાઃ પૂજકઃ પરમદ્યુતિઃ

અગસ્ત્યો મુનિવર્યોઽસૌ વારાણસ્યાં સમાસતે ।
તત્તેજોવઞ્ચકોઽગસ્ત્યો ભવિષ્યતિ સુરોત્તમાઃ

તં પ્રસાદ્ય દ્વિજવરમગસ્ત્યં પરમૌજસમ્ ।
યાચધ્વં વિબુધાઃ કાશીં ગત્વા નિઃશ્રેયસઃ પદીમ્

સૂત ઉવાચ
એવં સમુપદિષ્ટાસ્તે વિષ્ણુના વિબુધોત્તમાઃ ।
પ્રતીતાઃ પ્રણતાઃ સર્વે જગ્મુર્વારાણસીં પુરીમ્

ક્ષણેન વિબુધશ્રેષ્ઠા ગત્વા કાશીપુરીં શુભામ્ ।
મણિકર્ણીં સમાપ્લુત્ય સચૈલં ભક્તિસંયુતાઃ

સન્તર્પ્ય દેવાંશ્ચ પિતૄન્દત્ત્વા દાનં વિધાનતઃ ।
આગત્ય મુનિવર્યસ્ય ચાશ્રમં પરમં મહત્

પ્રશાન્તશ્વાપદાકીર્ણં નાનાપાદપસઙ્‌કુલમ્ ।
મયૂરૈઃ સારસૈર્હંસૈશ્ચક્રવાકૈરુપાશ્રિતમ્

મહાવરાહૈઃ કોલૈશ્ચ વ્યાઘ્રૈઃ શાર્દૂલકૈરપિ ।
મૃગૈ રુરુભિરત્યર્થં ખડ્ગૈઃ શરભકૈરપિ

સમાશ્રિતં પરમયા લક્ષ્મ્યા મુનિવરં તદા ।
દણ્ડવત્પતિતાઃ સર્વે પ્રણેમુશ્ચ પુનઃ પુનઃ

દેવા ઊચુઃ
જય દ્વિજગણાધીશ માન્ય પૂજ્ય ધરાસુર ।
વાતાપીબલનાશાય નમસ્તે કુમ્ભયોનયે

લોપામુદ્રાપતે શ્રીમન્મિત્રાવરુણસમ્ભવ ।
સર્વવિદ્યાનિધેઽગસ્ત્ય શાસ્ત્રયોને નમોઽસ્તુ તે

યસ્યોદયે પ્રસન્નાનિ ભવન્ત્યુજ્જ્વલભાંજ્યપિ ।
તોયાનિ તોયરાશીનાં તસ્મૈ તુભ્યં નમોઽસ્તુ તે

કાશપુષ્પવિકાસાય લઙ્‌કાવાસપ્રિયાય ચ ।
જટામણ્ડલયુક્તાય સશિષ્યાય નમોઽસ્તુ તે

જય સર્વામરસ્તવ્ય ગુણરાશે મહામુને ।
વરિષ્ઠાય ચ પૂજ્યાય સસ્ત્રીકાય નમોઽસ્તુ તે

પ્રસાદઃ ક્રિયતાં સ્વામિન્ વયં ત્વાં શરણં ગતાઃ ।
દુસ્તરાચ્છૈલજાદ્દુઃખાત્પીડિતાઃ પરમદ્યુતે

ઇત્યેવં સંસ્તુતોઽગસ્ત્યો મુનિઃ પરમધાર્મિકઃ ।
પ્રાહ પ્રસન્નયા વાચા વિહસન્ દ્વિજસત્તમઃ

મુનિરુવાચ
ભવન્તઃ પરમશ્રેષ્ઠા દેવાસ્ત્રિભુવનેશ્વરાઃ ।
લોકપાલા મહાત્માનો નિગ્રહાનુગ્રહક્ષમાઃ

યોઽમરાવત્યધીશાનઃ કુલિશં યસ્ય ચાયુધમ્ ।
સિદ્ધ્યષ્ટકં ચ યદ્દ્વારિ સ શક્રો મરુતાં પતિઃ

વૈશ્વાનરઃ કૃશાનુર્હિ હવ્યકવ્યવહોઽનિશમ્ ।
મુખં સર્વામરાણાં હિ સોઽગ્નિઃ કિં તસ્ય દુષ્કરમ્

રક્ષોગણાધિપો ભીમઃ સર્વેષાં કર્મસાક્ષિકઃ ।
દણ્ડવ્યગ્રકરો દેવઃ કિં તસ્યાસુકરં સુરાઃ

તથાપિ યદિ દેવેશાઃ કાર્યં મચ્છક્તિસિદ્ધિભૃત્ ।
અસ્તિ ચેદુચ્યતાં દેવાઃ કરિષ્યામિ ન સંશયઃ

એવં મુનિવરેણોક્તં નિશમ્ય વિબુધર્ષભાઃ ।
પ્રતીતાઃ પ્રણયોદ્વિગ્નાઃ કાર્યં નિજગદુર્નિજમ્

મહર્ષે વિન્ધ્યગિરિણા નિરુદ્ધોઽર્કવિનિર્ગમઃ ।
ત્રૈલોક્યં તેન સંવિષ્ટં હાહાભૂતમચેતનમ્

તદ્‌વૃદ્ધિં સ્તમ્ભય મુને નિજયા તપસઃ શ્રિયા ।
ભવતસ્તેજસાગસ્ત્ય નૂનં નમ્રો ભવિષ્યતિ ।
એતદેવાસ્મદીયં ચ કાર્યં કર્તવ્યમસ્તિ હિ

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં દશમસ્કન્ધે અગસ્ત્યાશ્વાસનવર્ણનં નામ ષષ્ઠોઽધ્યાયઃ