દેવી ભાગવત પુરાણ · અધ્યાય 10.1

મનુકૃતં દેવીસ્તવનમ્
નારદ ઉવાચ
નારાયણ ધરાધાર સર્વપાલનકારણ ।
ભવતોદીરિતં દેવીચરિતં પાપનાશનમ્

મન્વન્તરેષુ સર્વેષુ સા દેવી યત્સ્વરૂપિણી ।
યદાકારેણ કુરુતે પ્રાદુર્ભાવં મહેશ્વરી

તાન્નઃ સર્વાન્સમાખ્યાહિ દેવીમાહાત્મ્યમિશ્રિતાન્ ।
યથા ચ યેન યેનેહ પૂજિતા સંસ્તુતાપિ હિ

મનોરથાન્પૂરયતિ ભક્તાનાં ભક્તવત્સલા ।
તન્નઃ શુભૂષમાણાનાં દેવીચરિતમુત્તમમ્

વર્ણયસ્વ કૃપાસિન્ધો યેનાપ્નોતિ સુખં મહત્ ।
શ્રીનારાયણ ઉવાચ
આકર્ણય મહર્ષે ત્વં ચરિતં પાપનાશનમ્

ભક્તાનાં ભક્તિજનનં મહાસમ્પત્તિકારકમ્ ।
જગદ્યોનિર્મહાતેજા બ્રહ્મા લોકપિતામહઃ

આવિરાસીન્નાભિપદ્માદ્દેવદેવસ્ય ચક્રિણઃ ।
સ ચતુર્મુખ આસાદ્ય પ્રાદુર્ભાવં મહામતે

મનું સ્વાયમ્ભુવં નામ જનયામાસ માનસાત્ ।
સ માનસો મનુઃ પુત્રો બ્રહ્મણઃ પરમેષ્ઠિનઃ

શતરૂપાં ચ તત્પત્‍નીં જજ્ઞે ધર્મસ્વરૂપિણીમ્ ।
સ મનુઃ ક્ષીરસિન્ધોશ્ચ તીરે પરમપાવને

દેવીમારાધયામાસ મહાભાગ્યફલપ્રદામ્ ।
મૂર્તિં ચ મૃણ્મયીં તસ્યા વિધાય પૃથિવીપતિઃ

ઉપાસતે સ્મ તાં દેવીં વાગ્ભવં સ જપન્ રહઃ ।
નિરાહારો જિતશ્વાસો નિયમવ્રતકર્શિતઃ

એકપાદેન સન્તિષ્ઠન્ ધરાયામનિશં સ્થિરઃ ।
શતવર્ષં જિતઃ કામઃ ક્રોધસ્તેન મહાત્મના

જે સ્થાવરતાં દેવ્યાશ્ચરણૌ ચિન્તયન્ હૃદિ ।
તસ્ય તત્તપસા દેવી પ્રાદુર્ભૂતા જગન્મયી

ઉવાચ વચનં દિવ્યં વરં વરય ભૂમિપ ।
તત આનન્દજનકં શ્રુત્વા વાક્યં મહીપતિઃ

વરયામાસ તાન્ હૃત્સ્થાન્ વરાનમરદુર્લભાન્ ।
મનુરુવાચ
જય દેવિ વિશાલાક્ષિ જય સર્વાન્તરસ્થિતે

માન્યે પૂજ્યે જગદ્ધાત્રિ સર્વમઙ્‌ગલમઙ્‌ગલે ।
ત્વત્કટાક્ષાવલોકેન પદ્મભૂઃ સૃજતે જગત્

વૈકુણ્ઠઃ પાલયત્યેવ હરઃ સંહરતે ક્ષણાત્ ।
શચીપતિસ્ત્રિલોક્યાશ્ચ શાસકો ભવદાજ્ઞયા

પ્રાણિનઃ શિક્ષયત્યેવ દણ્ડેન ચ પરેતરાટ્ ।
યાદસામધિપઃ પાશી પાલનં માદૃશામપિ

કુરુતે સ કુબેરોઽપિ નિધીનાં પતિરવ્યયઃ ।
હુતભુઙ્‌નૈરૃતો વાયુરીશાનઃ શેષ એવ ચ

ત્વદંશસમ્ભવા એવ ત્વચ્છક્તિપરિબૃંહિતાઃ ।
અથાપિ યદિ મે દેવિ વરો દેયોઽસ્તિ સામ્પ્રતમ્

તદા પ્રહ્વાઃ સર્ગકાર્યે વિઘ્ના નશ્યન્તુ મે શિવે ।
વાગ્ભવસ્યાપિ મન્ત્રસ્ય યે કેચિદુપસેવિનઃ

તેષાં સિદ્ધિઃ સત્વરાપિ કાર્યાણાં જાયતામપિ ।
યે સંવાદમિમં દેવિ પઠન્તિ શ્રાવયન્તિ ચ

તેષાં લોકે ભુક્તિમુક્તી સુલભે ભવતાં શિવે ।
જાતિસ્મરત્વં ભવતુ વક્તૃત્વં સૌષ્ઠવં તથા

જ્ઞાનસિદ્ધિઃ કર્મમાર્ગસંસિદ્ધિરપિ ચાસ્તુ હિ ।
પુત્રપૌત્રસમૃદ્ધિશ્ચ જાયેદિત્યેવ મે વચઃ

ઇતિ શ્રીમદ્દેવીભાગવતે મહાપુરાણેઽષ્ટાદશસાહસ્ર્યાં સંહિતાયાં દશમસ્કન્ધે મનુકૃતં દેવીસ્તવનં નામ પ્રથમોઽધ્યાયઃ