ચૌરપઞ્ચાશિકા · શ્લોક 1-20

અદ્યાપિ તાં કનકચમ્પકદામગૌરીં ફુલ્લારવિન્દવદનાં તનુરોમરાજીમ્
સુપ્તોત્થિતાં મદનવિહ્વલલાલસાઙ્ગીં વિદ્યાં પ્રમાદગુણિતામ્ ઇવ ચિન્તયામિ ॥

અદ્યાપિ તાં શશિમુખીં નવયૌવનાઢ્યાં પીનસ્તનીં પુનર્ અહં યદિ ગૌરકાન્તિમ્
પશ્યામિ મન્મથશરાનલપીડિતાઙ્ગીં ગાત્રાણિ સંપ્રતિ કરોમિ સુશીતલાનિ ॥

અદ્યાપિ તાં યદિ પુનઃ કમલાયતાક્ષીં પશ્યામિ પીવરપયોધરભારખિન્નામ્
સંપીડ્ય બાઃઉયુગલેન પિબામિ વક્ત્રમ્ ઉન્મત્તવન્ મધુકરઃ કમલં યથેષ્ટમ્ ॥

અદ્યાપિ તાં નિધુવનક્લમનિઃસહાઙ્ગીમ્ આપાણ્ડુગણ્ડપતિતાલકકુન્તલાલિમ્
પ્રચ્છન્નપાપકૃતમન્થરમ્ આવહન્તીં કણ્ઠાવસક્તબાહુલતાં સ્મરામિ ॥

અદ્યાપિ તાં સુરતજાગરઘૂર્ણમાન તિર્યગ્વલત્તરલતારકમ્ આયતાક્ષીમ્
શૃઙ્ગારસારકમલાકરરાજહંસીં વ્રીડાવિનમ્રવદનામ્ ઉષસિ સ્મરામિ ॥

અદ્યાપિ તાં યદિ પુનઃ શ્રવણાયતાક્ષીં પશ્યામિ દીર્ઘવિરહજ્વરિતાઙ્ગયષ્ટિમ્
અઙ્ગૈર્ અહં સમુપગુહ્ય તતો ઽતિગાઢં નોન્મીલયામિ નયને ન ચ તાં ત્યજામિ ॥

અદ્યાપિ તાં સુરતતાણ્ડવસૂત્રધારીં પૂર્ણેન્દુસુન્દરમુખીં મદવિહ્વલાઙ્ગીમ્
તન્વીં વિશાલજઘનસ્તનભારનમ્રાં વ્યાલોલકુન્તલકલાપવતીં સ્મરામિ ॥

અદ્યાપિ તાં મસૃણચન્દનપઙ્કમિશ્ર કસ્તૂરિકાપરિમલોત્થવિસર્પિગન્ધામ્
અન્યોન્યચઞ્ચુપુટચુમ્બનલગ્નપક્ષ્મ યુગ્માભિરામનયનાં શયને સ્મરામિ ॥

અદ્યાપિ તાં નિધુવને મધુપાનરક્તામ્ લીલાધરાં કૃશતનું ચપલાયતાક્ષીમ્
કાશ્મીરપઙ્કમૃગનાભિકૃતાઙ્ગરાગાં કર્પૂરપૂગપરિપૂર્ણમુખીં સ્મરામિ ॥

અદ્યાપિ તત્+કનકગૌરકૃતાઙ્ગરાગં પ્રસ્વેદબિન્દુવિતતં વદનં પ્રિયાયાઃ
અન્તે સ્મરામિ રતિખેદવિલોલનેત્રં રાહૂપરાગપરિમુક્તમ્ ઇવેન્દુબિમ્બમ્ ॥

અદ્યાપિ તન્મનસિ સંપરિવર્તતે મે રાત્રૌ મયિ ક્ષુતવતિ ક્ષિતિપાલપુત્ર્યા
જીવેતિ મઙ્ગલવચઃ પરિહૃત્ય કોપાત્ કર્ણે કૃતં કનકપત્રમ્ અનાલપન્ત્યા ॥

અદ્યાપિ તત્+કનકકુણ્ડલઘૃષ્ટગણ્ડમ્ આસ્યં સ્મરામિ વિપરીતરતાભિયોગે
આન્દોલનશ્રમજલસ્ફુટસાન્દ્રબિન્દુ મુક્તાફલપ્રકરવિચ્છુરિતં પ્રિયાયાઃ ॥

અદ્યાપિ તત્પ્રણયભઙ્ગગુરુદૃષ્ટિપાતં તસ્યાઃ સ્મરામિ રતિવિભ્રમગાત્રભઙ્ગમ્
વસ્ત્રાઞ્ચલસ્ખલતચારુપયોધરાન્તં દન્તચ્છદં દશનખણ્ડનમણ્ડનં ચ ॥

અદ્યાપ્ય્ અશોકનવપલ્લવરક્તહસ્તાં મુક્તાફલપ્રચયચુમ્બિતચૂચુકાગ્રામ્
અન્તઃ સ્મિતોચ્છ્વસિતપાણ્ડુરગણ્ડભિત્તિં તાં વલ્લભામલસહંસગતિં સ્મરામિ ॥

અદ્યાપિ તત્+કનકરેણુઘનોરુદેશે ન્યસ્તં સ્મરામિ નખરક્ષતલક્ષ્મ તસ્યાઃ
આકૃષ્ટહેમરુચિરામ્બરમ્ ઉત્થિતાયા લજ્જાવશાત્ કરઘૃતં ચ તતો વ્રજન્ત્યાઃ ॥

અદ્યાપિ તાં વિધૃતકજ્જલલોલનેત્રાં પૃથ્વીં પ્રભૂતકુસુમાકુલકેશપાશામ્
સિન્દૂરસંલુલિતમૌક્તિકદન્તકાન્તિમ્ આબદ્ધહેમકટકાં રહસિ સ્મરામિ ॥

અદ્યાપિ તાં ગલિતબન્ધનકેશપાશાં સ્રસ્તસ્રજં સ્મિતસુધામધુરાધરૌષ્ઠીમ્
પીનોન્નતસ્તનયુગોપરિચારુચુમ્બન્+ મુક્તાવલીં રહસિ લોલદૃશમ્ સ્મરામિ ॥

અદ્યાપિ તાં ધવલવેશ્મનિ રત્નદીપ માલામયૂખપટલૈર્ દલિતાન્ધકારે
પ્રાપ્તોદ્યમે રહસિ સંમુખદર્શનાર્થં લજ્જાભયાર્થનયનામ્ અનુચિન્તયામિ ॥

અદ્યાપિ તાં વિરહવહ્નિનિપીડિતાઙ્ગીં તન્વીં કુરઙ્ગનયનાં સુરતૈકપાત્રીમ્
નાનાવિચિત્રકૃતમણ્ડનમ્ આવહન્તીં તાં રાજહંસગમનાં સુદતીં સ્મરામિ ॥

અદ્યાપિ તાં વિહસિતાં કુચભારનમ્રાં મુક્તાકલાપધવલીકૃતકણ્ઠદેશામ્
તત્+કેલિમન્દરગિરૌ કુસુમાયુધસ્ય કાન્તાં સ્મરામિ રુચિરોજ્જ્વલપુષ્પકેતુમ્ ॥