ચન્દ્રાલોક · અધ્યાય 10

ધર્મં કંચિત્ પુરસ્કૃત્ય પ્રાયઃ શબ્દઃ પ્રવર્તતે
યયાર્થં સ્પષ્ટમ્ આચષ્ટે શબ્દસ્ તામ્ અભિધાં વિદુઃ ॥

જાત્યા ગુણેન ક્રિયયા વસ્તુયોગેન સંજ્ઞયા
નિર્દેશેન તથા પ્રાહુઃ ષડ્વિધામ્ અભિધાં બુધાઃ ॥

ગૌર્ નીલઃ પાચકો દણ્ડી ડિત્થઃ કંસ ઇતિ ક્રમાત્
કં સંહિનસ્તિ કંસારિર્ નરં ચ કં સમાશ્રિતમ્ ॥

ન યોગાદેર્ આયતનં ન સઙ્કેતનિકેતનમ્
વૃત્ત્યા નિર્દેશશબ્દો ઽયં મુખ્યયા સ્વાભિધેયયા ॥

પીયૂષવર્ષપ્રભવં ચન્દ્રાલોકમનોહરમ્
સુધાનિધાનમ્ આસાદ્ય શ્રયધ્વં વિબુધા મુદમ્ ॥

જયન્તિ યાજ્ઞિકશ્રીમન્ મહાદેવાઙ્ગજન્મનઃ
સૂક્તિપીયૂષવર્ષસ્ય જયદેવકવેર્ ગિરઃ ॥

મહાદેવઃ સત્રપ્રમુખમખવિદ્યૈકચતુરઃ સુમિત્રા તદ્ભક્તિપ્રણિહિતમતિર્ યસ્ય પિતરૌ
મયૂખસ્ તેનાસૌ સુકવિજયદેવેન રચિતે ચિરં ચન્દ્રાલોકે મહતિ દશસંખ્યઃ સુખયતુ ॥