બૃહત્પારાશરહોરાશાસ્ત્રમ્ · અધ્યાય 14

અથ સહજભાવફલાધ્યાયઃ

અથ વિક્રમભાવસ્ય ફલં વક્ષ્યામિ ભો દ્વિજ।
સહજે સૌમ્યયુગ્‌દૃષ્ટે ભ્રાતૃમાન્‌ વિક્રમી નરઃ

સભૌમો ભ્રાતૃભાવેશો ભ્રાતૃભાવં પ્રપશ્યતિ।
ભ્રાત્ર્ક્ષેત્રગતો વાઽપિ ભ્રાતૃભાવં વિનિર્દિશેત્‌

પાપયોગેન તૌ પાપક્ષેત્રયોગેન વા પુનઃ।
ઉત્પાટ્ય સહજાન્‌ સદ્યો નિહન્તરૌ ન સંશયઃ

સ્ત્રીગ્રહો ભ્રાતૃભાવેશઃ સ્ત્રીગ્રહો ભ્રાતૃભાવગઃ।
ભગિની સ્યાત્‌ તથા ભ્રાતા પુંગૃહે પુંગ્રહો યદિ

મિશ્રે મિશ્રફલં વાચ્યં બલાબલવિનિર્ણયાત્‌।
મૃતૌ કુજતૃતીયેશૌ સહોદરવિનાશકૌ

કેન્દ્રત્રિકોણગે વાઽપિ સ્વોચ્ચમિત્રસ્વવર્ગગે।
કારકે સહજેશે યા ભ્રાતૃસૌખ્યં વિનિર્દિશેત્‌

ભ્રાતૃભે બુધસંયુક્તે તદીશે ચન્દ્રસંયુતે।
કારકે મન્દસંયુક્તે ભગિન્યેકાગ્રતો ભવેત્‌

પશ્ચાત્‌ સહોદરોઽપ્યેકસ્તૃતીયસ્તુ મૃતો ભવેત્‌।
કારકે રાહુસંયુક્તે સહજેશે તુ નીચગે

પશ્ચાત્‌ સહોદરાભાવં પૂર્વં તુ તત્ત્રયં વદેત્‌।
ભ્રાતૃસ્થાનાધિપે કેન્દ્રે કારકે તત્‌ત્રિકોણગે

જીવેન સહિતે ચોચ્ચે જ્ઞેયા દ્વાદશ સોદરાઃ।
તત્ર જ્યેષ્ઠદ્વિયં તદ્વજ્જાતકાચ્ચ તૃતીયકમ્‌

સપ્તમં નવમં ચૈવ દ્વાદશં ચ મૃતં વદેત્‌।
શેષાઃ સહોદરાઃ ષડ્‌ વૈ ભવેયુર્દીર્ઘજીવનાઃ

વ્યયેશેન યુતો ભૌમો ગુરુણા સહિતોઽપિ વા।
ભ્રાતૃભાવે સ્થિતે ચન્દ્રે સપ્તસંખ્યાસ્તુ સોદરાઃ

ભ્રાતૃસ્થાને શશિયુતે કેવલં પુઙ્‌ગ્રહેક્ષિતે।
સહજા ભ્રાતરો જ્ઞેયાઃ શુક્રયુક્તેક્ષિતેઽન્યથા

અગ્રે જાતં રવિર્હન્તિ પૃષ્ઠે જાતં શનૈશ્ચરઃ।
અગ્રજં પૃષ્ઠજં હન્તિ સહજસ્થો ધરાસુતઃ

એતેષાં વિપ્ર યોગાનાં બલાબલવિનિર્ણયાત્‌।
ભ્રાતૃણાં ભગિનીનાં વા જાતકસ્ય ફલં વદેત્‌