બૃહત્પારાશરહોરાશાસ્ત્રમ્ · અધ્યાય 15

અથ સુખભાવફલાધ્યાયઃ

ઉક્તં તૃતીયભાવસ્ય ફલં સંક્ષેપતો મયા।
સુખભાવફલં ચાઽથ કથયામિ દ્વિજોત્તમ

સુખેશે સુખભાવસ્થે લગ્નેશે તદ્‌ગતેઽપિ વા।
શુભદૃષ્ટે ચ જાતસ્ય પૂર્ણં ગૃહસુખં વદેત્‌

સ્વગેહે સ્વાંશકે સ્વોચ્ચે સુખસ્થાનાધિપો યદિ।
ભૂમિયાનગૃહાદીનાં સુખં વાદ્યભવં તથા

કર્માધિપેન સંયુક્તે કેન્દ્રે કોણે ગૃહાધિપે।
વિચિત્રસૌધપ્રાકારૈર્મણ્ડિતં તદ્‌ગૃહં વદેત્‌

બન્ધુસ્થાનેશ્વરે સૌમ્યે શુભગ્રહયુતેક્ષિતે।
શશિજે લગ્નસંયુક્તે બન્ધુપૂજ્યો ભવેન્નરઃ

માતુઃસ્થાને શુભયુતે તદીશે સ્વોચ્ચરાશિગે।
કારકે બલસંયુક્તે માતુર્દીર્ઘાયુરાદિશેત્

સુખેશે કેન્દ્રભાવસ્થે તથ કેન્દ્રસ્થિતો ભૃગુઃ।
શશિજે સ્વોચ્ચરાશિસ્થે માતુઃ પૂર્ણં સુખં વદેત્‌

સુખે રવિયુતે મન્દે ચન્દ્રે ભાગ્યગતે સતિ।
લાભસ્થાનગતો ભૌમો ગોમહિષ્યાદિલાભકૃત્‌

ચરગેહસમાયુક્તો સુખે તદ્રાશિનાયકે।
ષષ્ઠે વ્યયે સ્થિતે ભૌમે નરઃ પ્રાપ્નોતિ મૂકતામ્‌

લગ્નસ્થાનાધિપે સૌમ્યે સુખેશે નીચરાશિગે।
કારકે વ્યયભાવસ્થે સુખેશે લાભસઙ્ગતે

દ્વદશે વત્સરે પ્રાપ્તે વાહનસ્ય સુખં વદેત્‌।
વાહને સૂર્યસંયુક્તે સ્વોચ્ચે તદ્‌ભાવનાયકે

શુક્રેણ સણ્યુતે વર્ષે દ્વાત્રિંશે વાહનં ભવેત્‌।
કર્મેશેન યુતે બન્ધુનાથે તુઙ્ગાંશસંયુતે

દ્વિચત્વારિંશકે વર્ષે નરો વાહનભાગ્‌ ભવેત્‌।
લાભેશે સુખરાશિસ્થે સુખેશે લાભસંયુતે

દ્વાદશે વસ્તરે પ્રાપ્તે જાતો વાહનભાગ્‌ ભવેત્।
શુભં શુભત્વે ભાવસ્ય પાપત્વે ફલમન્યથા