બૃહત્પારાશરહોરાશાસ્ત્રમ્ · અધ્યાય 13

અથ ધનભાવફલાધ્યાયઃ

ધનભાવફલં વચ્મિ સ્રૃણુ ત્વં દ્વિજસત્તમ।
ધનેશો ધનભાવસ્થઃ કેન્દ્રકોણગતોઽપિ વા

ધનવૃદ્ધિકરો જ્ઞેયસ્ત્રિકસ્થો ધનહાનિકૃત્‌।
ધનદશ્ચ ધને સૌમ્યઃ પાપો ધનવિનાશકૃત્‌

ધનાધિપો ગુરુર્યસ્ય ધનભાવગતો ભવેત્‌।
ભૌમેન સહિતો વાઽપિ ધનવાન્‌ સ નરો ભવેત્‌

ધનેશે લાભભાવસ્થે લાભેશે વા ધનં ગતે।
તાવુભૌ કેન્દ્રકોણસ્થૌ ધનવાન્‌ સ નરો ભવેત્‌

ધનેશે કેન્દ્રરાશિસ્થે લાભેશે તત્ત્રિકોણગે।
ગુરુશુક્રયુતે દૃષ્ટે ધનલાભમુદીરયેત્‌

ધનેશો રિપુભાવસ્થો લાભેશસ્તદ્‌ગતો યદિ।
ધનાયૌ પાપયુક્તૌ વા દૃષ્ટૌ નિર્ધન એવ સઃ

ધનલાભાધિપાવસ્તૌ પાપગ્રહસમન્વિતૌ।
જન્મપ્રભૃતિદારિદ્રં ભિક્ષાન્નં લભતે નરઃ

ષષ્ઠેઽષ્ટમે વ્યયે વાઽપિ ધનલાભાધિપૌ યદિ।
લાભે કુજોધને રાહૂ રાજદણ્ડાદ્‌ ધનક્ષયઃ

લાભે જીવે ધને શુક્રે ધનેશે શુભસંયુતે।
વ્યયે ચ શુભસંયુક્તે ધર્મકાર્યે ધનવ્યયઃ

સ્વભોચ્ચસ્થે ધનાધીશે જાતકો જનપોષકઃ।
પરોપકારી ખ્યાતશ્ચ વિજ્ઞેયો દ્વિજસત્તમ

સ્થિતે પારાવતાંશાદૌ ધનેશે શુભસંયુતે।
તદ્‌ગૃહે સર્વસમ્પત્તિર્વિનાઽયાસેન જાયતે

નેત્રેશે બલસંયુક્તે શોભનાક્ષો ભવેન્નરઃ।
ષષ્ઠાષ્ટમવ્યયસ્થે ચ નેત્રવૈકલ્યવાન્‌ ભવેત્‌

ધનેશે પાપસંયુક્તે ધને પાપસમન્વિતે।
પિશુનોઽસત્યવાદી ચ વાતવ્યાધિસમન્વિતઃ