બૃહત્પારાશરહોરાશાસ્ત્રમ્ · અધ્યાય 12

અથ તનુભાવફલાધ્યાયઃ

સપાપો દેહપોઽષ્ટારિવ્યયગો દેહસૌખ્યહૃત્‌।
કેન્દ્રે કોણે સ્થિતોઽઙ્ગેશઃ સદા દેહસુખં દિશેત્‌

લગ્નપોઽસ્તઙ્ગતો નીચે શત્રુભે રોગકૃદ્‌ ભવેત્‌।
શુભઃ કેન્દ્રત્રિકોણસ્થા સર્વરોગહરાઃ સ્મૃતાઃ

લગ્ને ચન્દ્રેઽથવ ક્રૂરગ્રહૈર્દૃષ્ટેઽથવા યુતે।
શુભદૃષ્ટિવિહીને ચ જન્તોર્દેહસુખં ન હિ

લગ્ને સૌમ્યે સુરૂપઃ સ્યાત્‌ ક્રૂરેરૂપવિવર્જિતઃ।
સૌમ્યખેટૈર્યુતે દૃષ્ટે લગ્ને દેહસુખાન્વિતઃ

લગ્નેશો જ્ઞા ગુરુર્વાઽપિ શુક્રો વા કેન્દ્રકોણગઃ।
દીર્ઘાયુર્ધનવાન્‌ જાતો બુદ્ધિમાન્‌ રાજવલ્લભઃ

લગ્નેશે ચરરાશિસ્થે શુભગ્રહનિરીક્ષિતે।
કીર્તિશ્રીમાન્‌ મહાભોગી દેહસૌખ્યસમન્વિતઃ

બુધો જીવોઽથવા શુક્રો લગ્ને ચન્દ્રસમન્વિતઃ।
લગ્નાત્‌ કેન્દ્રગતો વાઽપિ રાજલક્ષણસંયુતઃ

સસૌરે સકુજે વાપિ લગ્ને મેષે વૃષે હરૌ।
રાશ્યંશસદૃશૌ ગાત્રે સ જાતો નાલવિષ્ટિતઃ

ચતુષ્પદગતો ભાનુઃ પરે વીર્યસમન્વિતાઃ।
દ્વિસ્વભાવગતા જાતૌ યમલાવિતિ નિર્દિશેત્‌

રવૌન્દૂ એકભાવસ્થાવેકંશકસમન્વિતૌ।
ત્રિમાત્રા ચ થિભિર્માસૈઃ પિત્રા ભ્રાત્રા ચ પોષિતઃ

એવમેવ ફલં વાચ્યં ચન્દ્રાદપિ સદા બુધૈઃ।
અથ જાતનરસ્યાઙ્ગે વ્રણચિહ્નાદિકં બ્રુવે

શિરો નેત્રે તથ કર્ણૌ નાસિકે ચ કપોલકૌ।
હનૂર્મુખં ચ લગ્નાદ્યા તનાવાદ્યદૃકાણકે

મધ્યદ્રેષ્કાણગે લગ્ને કણ્ઠોંઽસૌ ચ ભુજૌ તથા।
પાર્શ્વે ચ હૃદયે ક્રોડે નાભિશ્ચેતિ યથાક્રમમ્‌

વસ્તિર્લિઙ્ગગુદે મુષ્કાવૂરૂ જાનૂ ચ જંઘકે।
પાદશ્ચેત્યુદિતૈર્વામમઙ્ગં જ્ઞેયં તૃતીયકે

યસ્મિન્નઙ્ગે સ્થિતઃ પાપો વ્રણં તત્ર સમાદિશેત્‌।
નિયતં સબુધૈઃ ક્રૂરૈઃ સૌમ્યૈર્લક્ષ્મ વદેદ્‌ બુધઃ