બૃહસ્પતિસ્મૃતિ · અધ્યાય 1.27

દ્યૂતં નિષિદ્ધં મનુના સત્યશૌચધનાપહમ્ ।
તત્ પ્રવર્તિતમ્ અન્યૈસ્ તુ રાજભાગસમન્વિતમ્ ॥

સભિકાધિષ્ઠિતં કાર્યં તસ્કરજ્ઞાનહેતુના ।
એષ એવ વિધિર્ જ્ઞેયઃ પ્રાણિદ્યૂતસમાહ્વયે ॥

સભિકો ગ્રાહકસ્ તત્ર દદ્યાજ્ જેત્રે નૃપાય ચ ।
રાજવૃદ્ધિઃ સકિતવાત્ સભિકાદ્ દશકં શતમ્ ॥

યથાસમયં વા સ્યાત્ ॥

દ્વન્દ્વયુદ્ધેન યઃ કશ્ચિદ્ અવસાદમ્ અવાપ્નુયાત્ ।
તત્ સ્વામિના પણો દેયો યસ્ તત્ર પરિકલ્પિતઃ ॥

રહોજિતો ઽનભિજ્ઞશ્ ચ કૂટાક્ષૈઃ કપટેન વા ।
મોચ્યો ઽભિજ્ઞો ઽપિ સર્વસ્વમ્ જિતં સર્વં ન દાપ્યતે ॥

કૂટાક્ષદેવિનઃ પાપા રાજભાગહરાશ્ ચ યે ।
ગણનાવઞ્ચકાશ્ ચૈવ દણ્ડ્યાસ્ તે કિતવાઃ સ્મૃતાઃ ॥

ગ્રહઃ પ્રકાશઃ કર્તવ્યો નિર્વાસ્યાઃ કૂટદેવિનઃ ।
વ્યાપાદને તુ તત્કારી વધં ચિત્રમ્ અવાપ્નુયાત્ ॥

સ એવ સાક્ષી સંદિગ્ધૌ સભ્યૈશ્ ચાન્યૈસ્ ત્રિભિર્ વૃતઃ ।
ઉભયોર્ અપિ સંદિગ્ધં કિતવાસ્ તુ પરીક્ષકાઃ ॥

યદા વિદ્વેષિણસ્ તે તુ તદા રાજા વિચારયેત્ ॥

એવં વાદિકૃતાન્ વાદાન્ પ્રપશ્યેત્ પ્રત્યહં નૃપઃ ।
નૃપાશ્રયાસ્ તથા ચાન્યે વિદ્વદ્ભિર્ બ્રાહ્મણૈઃ સહ ॥