બ્રહ્મવૈવર્ત પુરાણ · અધ્યાય 3.43

નારાયણ ઉવાચ ॥
ગણેશવચનં શ્રુત્વા સ તદા રાગતઃ સુધીઃ ॥
પર્શુહસ્તસ્સ વૈ રામો નિર્ભયો ગન્તુમુદ્યતઃ

ગણેશ્વરસ્તદા દૃષ્ટ્વા શીઘ્રમુત્થાય યત્નતઃ ॥
વારયામાસ સ પ્રીત્યા ચકાર વિનયં પુનઃ

રામસ્તં પ્રેરયામાસ હું કૃત્વા તુ પુનઃ પુનઃ ॥
બભૂવ ચ તતસ્તત્ર વાગ્યુદ્ધં હસ્તકર્ષણૈઃ

પર્શુનિક્ષેપણં કર્તું મનશ્ચક્રે ભૃગુસ્તદા ॥
હાહા કૃત્વા કાર્તિકેયો બોધયામાસ સંસદિ

અવ્યર્થમસ્ત્રં હે ભ્રાતર્ગુરુપુત્રે કથં ક્ષિપેઃ ॥
ગુરુવદ્ગુરુપુત્રં ચ મા ભવાન્હન્તુમર્હતિ

પર્શું ક્ષિપન્તં કુપિતં રક્તપદ્મદલેક્ષણમ્ ॥
ગણેશો રોધયામાસ નિવર્ત્તસ્વેત્યુવાચ તમ્

પુનર્ગણેશં રામશ્ચ પ્રેરયામાસ કોપતઃ ॥
પપાત પુરતો વેગાન્માનહીનો ગજાનનઃ

ગજાનનઃ સમુત્થાય ધર્મં કૃત્વા તુ સક્ષિણમ્ ॥
પુનસ્તં બોધયામાસ જિતક્રોધઃ શિવાત્મજઃ

નિવર્તસ્વ નિવર્ત્તસ્વેત્યુચ્ચાર્ય્ય ચ પુનઃ પુનઃ ॥
પ્રવેશને તે કા શક્તિરીશ્વરાજ્ઞાં વિના પ્રભો

મમ ભ્રાતા ત્વમતિથિર્વિદ્યાસમ્બન્ધતો ધ્રુવમ્ ॥
ઈશ્વરપ્રિયશિષ્યશ્ચ સોઢં વૈ તેન હેતુના

ન હ્યહં કાર્ત્તવીર્ય્યશ્ચ ભૂપાસ્તે ક્ષુદ્રજન્તવઃ ॥
અતો વિપ્ર ન જાનાસિ માં ચ વિશ્વેશ્વરાત્મજમ્

ક્ષણં તિષ્ઠ નિવર્ત્તસ્વ સમરે બ્રાહ્મણાતિથે ॥
ક્ષણાન્તરે ત્વયા સાર્દ્ધં યાસ્યામીશ્વરસન્નિધિમ્

નારાયણ ઉવાચ ॥
હેરમ્બવચનં શ્રુત્વા પ્રજહાસ પુનઃ પુનઃ॥
પર્શું ક્ષેપ્તું મનશ્ચક્રે પ્રણમ્ય હરિશઙ્કરૌ

પર્શું ક્ષિપન્તં કોપેન તં ચ રામં ગજાનનઃ ॥
દૃષ્ટ્વા મુમૂર્ષું દેવેશો ધર્મં કૃત્વા તુ સાક્ષિણમ્

યોગેન વર્દ્ધયામાસ શુણ્ડાં તાં કોટિયોજનામ્ ॥
યોગીન્દ્રસ્તત્ર સન્તિષ્ઠન્ભ્રામયિત્વા પુનઃ પુનઃ

શતધા વેષ્ટયિત્વા તુ ભ્રામયિત્વા તુ તત્ર વૈ ॥
ઊર્દ્ધ્વમુત્તોલ્ય વેગેન ક્ષુદ્રાહિં ગરુડો યથા

સપ્તદ્વીપાંશ્ચ શૈલાંશ્ચ મેરું ચાખિલસાગરાન્ ॥
ક્ષણેન દર્શયામાસ રામં યોગપરાહતમ્

હસ્તપાદાદ્યનાથં તં જડં સર્વાંગકમ્પિતમ્ ॥
પુનસ્તં ભ્રામયામાસ દર્પિતં દર્પનાશનઃ

ભૂર્લોકં ચ ભુવર્લોકં સ્વર્લોકં ચ સુરેશ્વરઃ ॥
જનોલોકં તપોલોકં ધ્રુવલોકં ચ તત્પરમ્

ગૌરીલોકં શમ્ભુલોકં દર્શયામાસ નારદ ॥
દર્શયિત્વા તુ વિધ્યણ્ડં સ પપૌ સપ્ત સાગરાન્

પુનરુદ્ગિરણં ચક્રે સનક્રમકરોદકમ્ ॥
તત્ર તં પાતયામાસ ગમ્ભીરે સાગરોદકે

મુમૂર્ષું તં સન્તરન્તં પુનર્જગ્રાહ લીલયા ॥
પુનસ્તત્ર ભ્રામયિત્વા બ્રહ્માણ્ડાદૂર્દ્ધ્વમપ્યમુમ્

વૈકુણ્ઠં દર્શયામાસ સલક્ષ્મીકં ચતુર્ભુજમ્ ॥
ક્ષણં તત્ર ભ્રામયિત્વા યોગીન્દ્રો યોગમાયયા

પુનઃ કરં ચ યોગેન વર્દ્ધયામાસ લીલયા ॥
ગોલોકં દર્શયામાસ વિરજાં ચ નદીશ્વરીમ્

વૃન્દાવનં શૃઙ્ગશતં શૈલેન્દ્રં રાસમણ્ડલમ્ ॥
ગોપીગોપાદિભિઃ સાર્દ્ધં શ્રીકૃષ્ણં શ્યામસુન્દરમ્

દ્વિભુજં મુરલીહસ્તં સસ્મિતં સુમનોહરમ્ ॥
રત્નસિંહાસનસ્થં ચ રત્નભૂષણભૂષિતમ્

તેજસા કોટિસૂર્ય્યાભં રાધાવક્ષઃસ્થલસ્થિતમ્ ॥
એવં કૃષ્ણં દર્શયિત્વા પ્રણમય્ય પુનઃ પુનઃ

ક્ષણેન લમ્બમાનં ચ ભ્રામયિત્વા પુનઃ પુનઃ ॥
દૃષ્ટ્વા કૃષ્ણં ચેષ્ટદેવં સર્વપાપપ્રણાશનમ્ ॥
ભ્રૂણહત્યાદિકં પાપં ભૃગોર્દૂરં ચકાર હ

ન ભવેદ્યાતના નષ્ટા વિના ભોગેન પાપજા ॥
સ્વલ્પાં ચ બુભુજે રામો ગતાઽન્યા કૃષ્ણદર્શનાત્

ક્ષણેન ચેતનાં પ્રાપ્ય ભુવિ વેગાત્પપાત હ ॥
બભૂવ દૂરીભૂતં ચ ગણેશસ્તમ્ભનં ભૃગોઃ

સસ્માર કવચં સ્તોત્રં ગુરુદત્તં સુદુર્લભમ્ ॥
અભીષ્ટદેવં શ્રીકૃષ્ણં ગુરું શમ્ભું જગદ્ગુરુમ્

ચિક્ષેપ પર્શુમવ્યર્થં શિવતુલ્યં ચ તેજસા ॥
ગ્રીષ્મમધ્યાહ્નમાર્તણ્ડપ્રભાશતગુણં મુને

પિતુરવ્યર્થમસ્ત્રં ચ દૃષ્ટ્વા ગણપતિઃ સ્વયમ્ ॥
જગ્રાહ વામદન્તેન નાસ્ત્રં વ્યર્થં ચકાર હ

નિપાત્ય પર્શુર્વેગેન ચ્છિત્ત્વા દન્તં સમૂલકમ્ ॥
જગામ રામહસ્તં ચ મહાદેવબલેન ચ

હાહેતિ શબ્દમાકાશે દેવાશ્ચક્રુર્મહાભિયા ॥
વીરભદ્રઃ કાર્ત્તિકેયઃ ક્ષેત્રપાલાશ્ચ પાર્ષદાઃ ॥

પપાત ભૂમૌ દન્તશ્ચ સરક્તઃ શબ્દયંસ્તદા ॥
પપાત ગૈરિકાયુક્તો યથા સ્ફટિકપર્વતઃ

શબ્દેન મહતા વિપ્ર ચકમ્પે પૃથિવી ભિયા ॥
કૈલાસસ્થા જનાઃ સર્વે મૂર્ચ્છામાપુઃ ક્ષણં ભિયા

નિદ્રા બભઞ્જ તત્કાલે નિદ્રેશસ્ય જગત્પ્રભોઃ ॥
આજગામ બહિઃ શમ્ભુઃ પાર્વત્યા સહ સમ્ભ્રમાત્

પુરો દદર્શ હેરમ્બં લોહિતાસ્યં ક્ષતેન તમ્ ॥
ભગ્નદન્તં જિતક્રોધં સસ્મિતં લજ્જિતં મુને

પપ્રચ્છ પાર્વતી શીઘ્રં સ્કન્દં કિમિતિ પુત્રક ॥
સ ચ તાં કથયામાસ વાર્તાં પૌર્વાપરીં ભિયા

ચુકોપ દુર્ગા કૃપયા રુરોદ ચ મુહુર્મુહુઃ ॥
ઉવાચ શમ્ભોઃ પુરતઃ પુત્રં કૃત્વા સ્વવક્ષસિ

સમ્બોધ્ય શમ્ભું શોકેન ભિયા વિનયપૂર્વકમ્ ॥
ઉવાચ પ્રણતા સાધ્વી પ્રણતાર્તિહરં પતિમ્

ઇતિ શ્રીબ્રહ્મવૈવર્તે મહાપુરાણે તૃતીયે ગણપતિખણ્ડે નારદનારાયણસંવાદે ગણેશદન્તભઙ્ગકારણવર્ણનં નામ ત્રિચત્વારિંશત્તમોઽધ્યાયઃ