બ્રહ્મવૈવર્ત પુરાણ · અધ્યાય 3.41

નારાયણ ઉવાચ ॥
હરેશ્ચ કવચં ધૃત્વા કૃત્વા નિઃ ક્ષત્રિયાં મહીમ્ ॥
રામો જગામ કૈલાસં નમસ્કર્તું શિવં ગુરુમ્॥॥
ગુરુપત્નીં શિવામમ્બાં દ્રષ્ટું ગુરુસુતૌ ચ તૌ ॥
ગુણૈર્નારાયણસમૌ કાર્ત્તિકેયગણેશ્વરૌ

મનોયાયી મહાત્મા સ ભૃગુસ્સંપ્રાપ્ય તત્ક્ષણમ્ ॥
દદર્શ પર્વતં રમ્યમતીવ સુમનોહરમ્

શુદ્ધસ્ફટિકસઙ્કાશૈર્મણિભિઃ સુમનોહરૈઃ ॥
સુવર્ણભૂમિસદૃશૈ રાજમાર્ગૈર્વિરાજિતમ્

સિન્દૂરારુણવર્ણૈશ્ચ વેષ્ટિતં મણિવેદિભિઃ ॥
સંયુક્તં મુક્તાનિકરૈઃ પૂરિતં મણિમણ્ડપૈઃ

યક્ષાણામાલયૈર્દિવ્યૈઃ સંયુક્તં શતકોટિભિઃ ॥
કપાટસ્તમ્ભસોપાનૈઃ શોભિતૈર્મણિનિર્મિતૈઃ॥

સુવર્ણકલશૈર્દિવ્યૈ રાજતૈઃ શ્વેતચામરૈઃ॥
રત્નકાઞ્ચનપૂર્ણૈશ્ચ યક્ષેન્દ્રગણવેષ્ટિતૈઃ

રત્નભૂષણભૂષાઢ્યૈર્દીપિતૈઃ સુન્દરીગણૈઃ॥
બાલિકાભિર્બાલકૈશ્ચ ચિત્રપુત્તલિકાકરૈઃ

ક્રીડદ્ભિઃ સસ્મિતૈઃ શશ્વત્સ્વચ્છન્દં ચ વિરાજિતૈઃ ॥
પારિજાતદ્રુમગણૈઃ સ્વર્ણદીતીરનીરજૈઃ

આકીર્ણં પુષ્પજાલૈશ્ચ પુષ્પિતૈશ્ચ સુગન્ધિભિઃ ॥
કલ્પવૃક્ષાશ્રિતૈઃ સિદ્ધૈઃ કામધેનુપુરસ્કૃતૈઃ

સિદ્ધવિદ્યાસુ નિપુણૈઃ પુણ્યવદ્ભિર્નિષેવિતમ્ ॥
ત્રિલક્ષયોજનાચ્છાયૈર્વટવૃક્ષૈરથાક્ષયૈઃ

શતયોજનવિસ્તીર્ણૈઃ શતસ્કન્ધસમન્વિતૈઃ ॥
અસંખ્યશાખાનિ કરૈરસંખ્યફલસંયુતૈઃ

નાનાપક્ષિગણાકીર્ણૈઃ સુમનોહરશબ્દિતૈઃ ॥
કમ્પિતૈઃ શીતવાતેન મણ્ડિતં ચ સુગન્ધિના

પુષ્પોદ્યાનસહસ્રેણ સરસાં ચ શતેન ચ ॥
સિદ્ધેન્દ્રાલયલક્ષૈશ્ચ મણિરત્નવિકારજૈઃ

રામશ્ચ દૃષ્ટ્વા નગરમતિસંહૃષ્ટમાનસઃ ॥
દદર્શ પુરતો રમ્યં શ્રીયુક્તં શંકરાલયમ્

સુવર્ણમૂલ્યશતકૈર્મણિભિઃ સ્વર્ણવર્ણકૈઃ ॥
ખચિતં રત્નસારૈશ્ચ રચિતં વિશ્વકર્મણા ॥

ત્રિપઞ્ચયોજનોચ્છ્રાયં ચતુર્યોજનવિસ્તૃતમ્ ॥
ચતુરસ્રં ચતુષ્કોણં પ્રાકારં સુમનોહરમ્

દ્વારં રત્નકપાટેન નાના ચિત્રાન્વિતેન ચ ॥
મણીન્દ્રવેદિભિર્યુક્તં મણિસ્તમ્ભવિરાજિતૈઃ

તદ્દક્ષિણે વૃષેન્દ્રં ચ વામે સિંહં ચ નારદ ॥
નન્દીશ્વરં મહાકાલં પિઙ્ગલાક્ષં ભયંકરમ્

વિશાલાક્ષં ચ બાણં ચ વિરૂપાક્ષં મહાબલમ્ ॥
વિકટાક્ષં ભાસ્કરાક્ષં રક્તાક્ષં વિકટોદરમ્

સંહારભૈરવં કાલભૈરવં ચ ભયઙ્કરમ્ ॥
રુરુભૈરવમીશાભં મહાભૈરવમેવ ચ

કૃષ્ણાઙ્ગભૈરવં ચૈવ ક્રોધભૈરવમુલ્બણમ્ ॥
કપાલભૈરવં ચૈવ રુદ્રભૈરવમેવ ચ

સિદ્ધેંદ્રાદીન્રુદ્રગણાન્વિદ્યાધરસુગુહ્યકાન્ ॥
ભૂતાન્પ્રેતાન્પિશાચાંશ્ચ કૂષ્માણ્ડાન્બ્રહ્મરાક્ષસાન્

વેતાલાન્દાનવાંશ્ચૈવ યોગીન્દ્રાંશ્ચ જટાધરાન્ ॥
યક્ષાન્કિમ્પુરુષાંશ્ચૈવ કિન્નરાંશ્ચ દદર્શ હ

તાન્દૃષ્ટ્વા નન્દિકેશાજ્ઞાં ગૃહીત્વા ભૃગુનન્દનઃ ॥
તાન્સમ્ભાષ્યાભ્યન્તરં ચ જગામાનન્દસંપ્લુતઃ

રત્નેન્દ્રસારખચિતં દદર્શ શતમન્દિરમ્ ॥
અમૂલ્યરત્નકલશૈર્જ્વલદ્ભિશ્ચ વિરાજિતમ્

અમૂલ્યરત્નરચિતૈર્મુક્તાનિર્મ્મલદર્પણૈઃ ॥
હીરસારવિકારૈશ્ચ કપાટૈશ્ચ વિરાજિતમ્ ॥

ગોરોચનાભિર્મણિભિર્યુતં સ્તમ્ભસહસ્રકૈઃ ॥
મણિસારવિકારૈશ્ચ સોપાનૈઃ પરિશોભિતમ્

દદર્શાભ્યન્તરં દ્વારં નાનાચિત્રૈશ્ચ ચિત્રિતમ્ ॥
માણિક્યમુક્તાગ્રથિતૈર્માલાજાલૈર્વિરાજિતમ્

દદર્શ કાર્ત્તિકેયં ચ વામે દક્ષે ગણેશ્વરમ્ ॥
વીરભદ્રં મહાકાયં શિવતુલ્યપરાક્રમમ્

પ્રધાનપાર્ષદગણાન્ક્ષેત્રપાલાંશ્ચ નારદ ॥
રત્નસિંહાસનસ્થાંશ્ચ રત્નભૂષણભૂષિતાન્॥

તાન્સમ્ભાષ્ય ભૃગુઃ શીઘ્રં મહાબલપરાક્રમઃ ॥
પર્શુહસ્તસ્સ પરશુરામો ગન્તું સમુદ્યતઃ

ગચ્છન્તં તં ગણેશશ્ચ ક્ષણં તિષ્ઠેત્યુવાચ હ ॥
નિદ્રિતો નિદ્રયા યુક્તો મહાદેવોઽધુનેતિ ચ

ઈશ્વરાજ્ઞાં ગૃહીત્વાઽહમત્રાગત્ય ક્ષણાન્તરે ॥
ત્વયા સાર્દ્ધં ગમિષ્યામિ ભ્રાતસ્તિષ્ઠાત્ર સામ્પ્રતમ્

ગણેશવાક્યં પરશુરામશ્શ્રુત્વા મહાબલઃ ॥
બૃહસ્પતિસમો વક્તા પ્રવક્તુમુપચક્રમે॥

ઇતિ શ્રીબ્રહ્મવૈવર્ત્તે મહાપુરાણે તૃતીયે ગણપતિખણ્ડે નારદનારાયણસંવાદે કૈલાસવર્ણનં નામૈકચત્વારિંશત્તમોઽધ્યાયઃ