બ્રહ્મવૈવર્ત પુરાણ · અધ્યાય 3.38

નારાયણ ઉવાચ ॥
સુચન્દ્રે પતિતે બ્રહ્મન્રાજેન્દ્રાણાં શિરોમણૌ ॥
અગમત્પુષ્કરાક્ષસ્તુ સેનાત્ર્યક્ષૌહિણીયુતઃ

સૂર્ય્યવંશોદ્ભવો રાજા સુચન્દ્રતનયો મહાન્ ॥
મહાલક્ષ્મીસેવકશ્ચ લક્ષ્મીવાન્સૂર્ય્યસન્નિભઃ

મહાલક્ષ્મ્યાશ્ચ કવચં ગલે યસ્ય મનોહરમ્ ॥
પરમૈશ્વર્ય્યસંયુક્તસ્ત્રૈલોક્યવિજયી તતઃ

તં દૃષ્ટ્વા ભ્રાતરઃ સર્વે રૈણુકેયસ્ય ધીમતઃ ॥
આયયુઃ સમરં કર્ત્તું નાનાશસ્ત્રાસ્ત્રપાણયઃ ।

રાજેન્દ્રઃ શરજાલેન ચ્છેદયામાસ તાંસ્તથા ॥
ચિચ્છિદુઃ શરજાલં ચ તે વીરાશ્ચૈવ લીલયા

ચિચ્છિદુઃ સ્યન્દનં રાજ્ઞસ્તે વીરાઃ પઞ્ચબાણતઃ ॥
સારથિં પઞ્ચબાણેન રથાશ્વં દશબાણતઃ

તદ્ધનુઃ સપ્તબાણેન તૂર્ણં વૈ પઞ્ચબાણતઃ ॥
ચિચ્છિદુસ્તદ્ભ્રાતૃવર્ગાન્વિપ્રાઃ શઙ્કરશૂલતઃ

તે ચ ત્ર્યક્ષૌહિણીં સેનાન્નિજઘ્નુશ્ચાપિ લીલયા ॥
હન્તું નૃપેન્દ્રં તે વીરાઃ શિવશૂલં નિચિક્ષિપુઃ ॥
ગલે બભૂવ તચ્છૂલં રાજ્ઞઃ પુષ્કરમાલિકા

શક્તિં ચ પરિઘં ચૈવ ભુશુણ્ડીં મુદ્ગરં તથા ॥
ગદાં ચ ચિક્ષિપુર્વિપ્રાઃ કોપેન જ્વલદગ્નયઃ

તાનિ શસ્ત્રાણિ ચૂર્ણાનિ ક્ષ્માભૃતો દેહયોગતઃ ॥
વિસ્મિતા ભ્રાતરઃ સર્વે ભૃગોરેવ મહામુને

રથં ધનુશ્ચ શસ્ત્રાણિ ચાસ્ત્રાણિ વિવિધાનિ ચ ॥
સેનાં પ્રસ્થાપયામાસ કાર્ત્તવીર્ય્યાર્જુનઃ સ્વયમ્

રાજા સ્યન્દનમારુહ્ય પુષ્કરાક્ષો મહાબલઃ ॥
ચકાર શરજાલં ચ મહાઘોરતરં મુને

ચિચ્છિદુઃ શરજાલં તે વીરાઃ શસ્ત્રાસ્ત્રપાણયઃ ॥
રાજા પ્રસ્વાપનેનૈવ નિદ્રિતાંસ્તાંશ્ચકાર હ

ભ્રાતૄંશ્ચ નિદ્રિતાન્દૃષ્ટ્વા જામદગ્ન્યો મહાબલઃ ॥
ક્ષતવિક્ષતસર્વાંગાન્બોધયામાસ તત્ત્વતઃ

બોધયિત્વા તાન્નિવાર્ય્ય જગામ રણમૂર્દ્ધનિ ॥
ચિક્ષેપ પર્શું કોપેન શીઘ્રં રાજજિઘાંસયા

છિત્ત્વા રાજ્ઞઃ કિરીટં ચ પર્શુર્ભૂમૌ પપાત હ॥
જગ્રાહ પરશું શીઘ્રં જામદગ્ન્યો મહાબલઃ

તદા શઙ્કરશૂલં ચ ચિક્ષિપે મન્ત્રપૂર્વકમ્ ॥
નૃપસ્ય કુણ્ડલં છિત્ત્વા જગામ શિવસન્નિધિમ્

રાજા નિહન્તું તં રામં શરજાલં ચકાર હ ॥
ચિચ્છેદ શરજાલં ચ રેણુકેયશ્ચ લીલયા

ક્રમેણ રાજા નાનાસ્ત્રં ચિક્ષિપે મન્ત્રપૂર્વકમ્॥
તચ્ચિચ્છેદ ક્રમેણૈવ ભૃગુઃ શસ્ત્રભૃતાં વરઃ

ભૃગુશ્ચિક્ષેપ નાનાસ્ત્રં મહાસન્ધાનપૂર્વકમ્ ॥
તચ્ચિચ્છેદ મહારાજઃ સન્ધાનેનૈવ લીલયા

રામશ્ચિક્ષેપ સન્ધાય બ્રહ્માસ્ત્રં મન્ત્રપૂર્વકમ્ ॥
રાજા નિર્વાપણં ચક્રે સન્ધાનેનૈવ લીલયા

સર્વાણ્યસ્ત્રાણિ શસ્ત્રાણિ રામઃ પાશુપતં વિના ॥
ચિક્ષેપ કોપવિભ્રાંતો ભૂપશ્ચિચ્છેદ તાનિ ચ

રામઃ સ્તુત્વા શિવં નત્વાઽઽદદે પાશુપતં મુને ॥
નારાયણશ્ચ ભગવાનવોચદ્ વિપ્રરૂપધૃક્

બ્રાહ્મણ ઉવાચ ॥
કિં કરોષિ ભૃગો વત્સ ત્વમેવં જ્ઞાનિનાં વરઃ ॥
નરં હન્તું પાશુપતં કોપાત્કિં ક્ષિપસિ ભ્રમાત્

વિશ્વં પાશુપતેનૈવ ભવેદ્ભસ્મ ચ સત્વરમ્ ॥
સર્વઘ્નં સ્યાચ્છસ્ત્રમિદં વિના શ્રીકૃષ્ણમીશ્વરમ્

અહો પાશુપતં જેતું નાલમેવ સુદર્શનમ્ ॥
હરેઃ સુદર્શનં ચૈવ સર્વાસ્ત્રપરિમર્દકમ્

ખટ્વાંગિનઃ પાશુપાતં હરેરેવ સુદર્શનમ્ ॥
એતે પ્રધાને સર્વેષામસ્ત્રાણાં ચ જગત્ત્રયે

ત્યજ પાશુપતં બ્રહ્મન્મદીયં વચનં શૃણુ ॥
યથા જેષ્યસિ રાજાનં પુષ્કરાક્ષં મહાબલમ્

કાર્ત્તવીર્ય્યમજેતારં યથા જેષ્યસિ સામ્પ્રતમ્ ॥
શ્રૂયતાં સાવધાનેન તત્સર્વં કથયામિ તે

મહાલક્ષ્મ્યાશ્ચ કવચં ત્રિષુ લોકેષુ દુર્લભમ્ ॥
ભક્ત્યા ચ પુષ્કરાક્ષેણ ધૃતં કણ્ઠે વિધાનતઃ

પરં દુર્ગતિનાશિન્યાઃ કવચં પરમાદ્ભુતમ્ ॥
ધૃતં ચ દક્ષિણે બાહૌ પુષ્કરાક્ષસુતેન ચ

કવચસ્ય પ્રભાવેણ વિશ્વં જેતું ક્ષમૌ ચ તૌ ॥
કો જેતા ચ ત્રિભુવને દેહે ચ કવચે સ્થિતે

અહં યાસ્યામિ ભિક્ષાર્થં સન્નિધાને તયોર્મુને ॥
કરિષ્યામિ ચ તદ્ભિક્ષાં પ્રતિજ્ઞા સફલાઽસ્તુ તે

બ્રાહ્મણસ્ય વચઃ શ્રુત્વા રામઃ સંત્રસ્તમાનસઃ ॥
ઉવાચ બ્રાહ્મણં વૃદ્ધં હૃદયેન વિદૂયતા

પરશુરામ ઉવાચ ॥
ન જાનામિ મહાપ્રાજ્ઞ કસ્ત્વં બ્રાહ્મણરૂપધૃક્ ॥
શીઘ્રં ચ બ્રૂહિ માં મૂઢં તદા ગચ્છ નૃપાન્તિકમ્

જામદગ્ન્યવચઃ શ્રુત્વા પ્રહસ્ય બ્રાહ્મણઃ સ્વયમ્ ॥
ઉક્ત્વા ચાહં વિષ્ણુરિતિ યયૌ ભિક્ષિતુમીશ્વરઃ

ગત્વા તયોઃ સન્નિધાનં યયાચે કવચે ચ તૌ ॥
દદતુસ્તૌ ચ કવચે વિષ્ણવે વિષ્ણુમાયયા ॥
ગૃહીત્વા કવચે વિષ્ણુર્વૈકુણ્ઠં નિર્જગામ સઃ

નારદ ઉવાચ ॥
મહાલક્ષ્મ્યાશ્ચ કવચં કેન દત્તં મહામુને ॥
પુષ્કરાક્ષાય ભૂપાય શ્રોતું કૌતૂહલં મમ

કવચં ચાપિ દુર્ગાયાઃ પુષ્કરાક્ષસુતાય ચ ॥
દુર્લ્લભં કેન વા દત્તં તદ્ભવાન્વક્તુમર્હસિ

કવચં ચાપિ કિમ્ભૂતં તયોર્વા તસ્ય કિં ફલમ્ ॥
મન્ત્રૌ તુ કિંપ્રકારૌ ચ તન્મે બ્રૂહિ જગદ્ગુરો॥ ।

નારાયણ ઉવાચ ॥
દત્તં સનત્કુમારેણ પુષ્કરાક્ષાય ધીમતે ॥
મહાલક્ષ્મ્યાશ્ચ કવચં મન્ત્રશ્ચાપિ દશાક્ષરઃ

સ્તવનં ચાપિ ગોપ્યં વૈ પ્રોક્તં તચ્ચરિતં ચ યત્ ॥
ધ્યાનં ચ સામવેદોક્તં પૂજાં ચૈવ મનોહરામ્

દુર્ગાયાશ્ચાપિ કવચં દત્તં દુર્વાસસા પુરા॥
સ્તવનં ચાપિ ગોપ્યં ચ મન્ત્રશ્ચાપિ દશાક્ષરઃ

પશ્ચાચ્છ્રોષ્યસિ તત્સર્વં દેવ્યાશ્ચ પરમાદ્ભુતમ્॥
મહાયુદ્ધસમારમ્ભે દત્તં પ્રાર્થનયા ચ યત્

મહાલક્ષ્મ્યાશ્ચ મન્ત્રં ચ શૃણુ તં કથયામિ તે ॥
ૐ શ્રીં કમલવાસિન્યૈ સ્વાહેતિ પરમાદ્ભુતમ્

ધ્યાનં ચ સામવેદોક્તં શૃણુ પૂજાવિધિં મુને ॥
દત્તં તસ્મૈ કુમારેણ પુષ્કરાક્ષાય ધીમતે

સહસ્રદલપદ્મસ્થાં પદ્મનાભપ્રિયાં સતીમ્ ॥
પદ્માલયાં પદ્મવક્ત્રાં પદ્મપત્રાભલોચનામ્

પદ્મપુષ્પપ્રિયાં પદ્મપુષ્પતલ્પાધિશાયિનીમ્ ॥
પદ્મિનીપદ્મહસ્તાં ચ પદ્મમાલાવિભૂષિતામ્

પદ્મભૂષણભૂષાઢ્યાં પદ્મશોભાવિવર્દ્ધનીમ્ ॥
પદ્માટવીં પ્રપશ્યન્તીં સસ્મિતાં તાં ભજે મુદા

ચન્દનાષ્ટદલે પદ્મે પદ્મપુષ્પેણ પૂજયેત્ ॥
ગણં સમ્પૂજ્ય દત્ત્વા ચૈવોપચારાંશ્ચ ષોડશ

તતઃ સ્તુત્વા ચ પ્રણમેત્સાધકો ભક્તિપૂર્વકમ્ ॥
કવચં શ્રૂયતાં બ્રહ્મન્સર્વસારં વદામિ તે

શૃણુ વિપ્રેન્દ્ર પદ્માયાઃ કવચં પરમં શુભમ્ ॥
પદ્મનાભેન યદ્દત્તં બ્રહ્મણે નાભિપદ્મકે

સમ્પ્રાપ્ય કવચં બ્રહ્મા તત્પદ્મે સસૃજે જગત્ ॥
પદ્માલયાપ્રસાદેન સલક્ષ્મીકો બભૂવ સઃ

પદ્માલયાવરં પ્રાપ્ય પાદ્મશ્ચ જગતાં પ્રભુઃ ॥
પાદ્યેન પદ્મકલ્પે ચ કવચં પરમાદ્ભુતમ્

દત્તં સનત્કુમારાય પ્રિયપુત્રાય ધીમતે ॥
કુમારેણ ચ યદ્દત્તં પુષ્કરાય ચ નારદ

યદ્ધૃત્વા પાઠનાદ્ બ્રહ્મા સવસિદ્ધેશ્વરો મહાન્ ॥
પરમૈશ્વર્ય્યસંયુક્તઃ સર્વસમ્પત્સમન્વિતઃ

યદ્દત્વા ચ ધનાધ્યક્ષઃ કુબેરશ્ચ ધનાધિપઃ ॥
સ્વાયમ્ભુવો મનુઃ શ્રીમાન્પઠનાદ્ધારણાદ્યતઃ

પ્રિયવ્રતોત્તાનપાદૌ લક્ષ્મીવન્તૌ યતો મુને ॥
પૃથુઃ પૃથ્વીપતિઃ સદ્યો હ્યભવદ્વારણાદ્યતઃ

કવચસ્ય પ્રસાદેન સ્વયં દક્ષઃ પ્રજાપતિઃ ॥
ધર્મ્મશ્ચ કર્મ્મણાં સાક્ષી પાતા યસ્ય પ્રસાદતઃ

યદ્ધૃત્વા દક્ષિણે બાહૌ વિષ્ણુઃ ક્ષીરોદશાયિતઃ ॥
ભક્ત્યા વિધત્તે કણ્ઠે ચ શેષો નારાયણાંશકઃ

યદ્ધૃત્વા વામનં લેભે કશ્યપશ્ચ પ્રજાપતિઃ ॥
સર્વદેવાધિપઃ શ્રીમાન્મહેન્દ્રો ધારણાદ્યતઃ

રાજા મરુત્તો ભગવાનભવદ્ધારણાદ્યતઃ ॥
ત્રૈલોક્યાધિપતિઃ શ્રીમાન્નહુષો યસ્ય ધારણાત્

વિશ્વં વિજિગ્યે ખટ્વાઙ્ગઃ પઠનાદ્ધારણાદ્યતઃ ॥
મુચુકુન્દો યતઃ શ્રીમાન્માન્ધાતૃતનયો મહાન્

સર્વસમ્પત્પદસ્યાસ્ય કવચસ્ય પ્રજાપતિઃ ॥
ઋષિશ્છન્દશ્ચ બૃહતી દેવી પદ્માલયા સ્વયમ્

ધર્માર્થકામમોક્ષેષુ વિનિયોગઃ પ્રકીર્તિતઃ ॥
પુણ્યબીજં ચ મહતાં કવચં પરમાદ્ભુતમ્

ૐ હ્રીં કમલવાસિન્યૈ સ્વાહા મે પાતુ મસ્તકમ્॥
શ્રીં મે પાતુ કપાલં ચ લોચને શ્રીં શ્રિયૈ નમઃ।૬૬॥।
ૐ શ્રીં શ્રિયૈ સ્વાહેતિ ચ કર્ણયુગ્મં સદાઽવતુ॥
ૐ શ્રીં ક્લીં મહાલક્ષ્મ્યૈ સ્વાહા મે પાતુ નાસિકામ।૬૭॥
ૐ શ્રીં પદ્માલયાયૈ ચ સ્વાહા દન્તાન્સદાઽવતુ ॥
ૐ શ્રીં કૃષ્ણપ્રિયાયૈ ચ દન્તરન્ધ્રં સદાઽવતુ

ૐ શ્રીં નારાયણેશાયૈ મમ કણ્ઠં સદાઽવતુ॥
ૐ શ્રીં કેશવકાન્તાયૈ મમ સ્કન્ધં સદાઽવતુ॥

ૐ શ્રીં પદ્મનિવાસિન્યૈ સ્વાહા નાભિં સદાઽવતુ॥
ૐ હ્રીં શ્રીં સંસારમાત્રે મમ વક્ષઃ સદાઽવતુ

ઓં શ્રીં મોં કૃષ્ણકાન્તાયૈ સ્વાહા પૃષ્ઠં સદાઽવતુ ॥
ઓં હ્રીં શ્રીં શ્રિયૈ સ્વાહા ચ મમ હસ્તૌ સદાઽવતુ

ૐ શ્રીનિવાસકાન્તાયૈ મમ પદૌ સદાઽવતુ ॥
ૐ હ્રીં શ્રીં ક્લીં શ્રિયૈ સ્વાહા સર્વાઙ્ગં મે સદાઽવતુ

પ્રાચ્યાં પાતુ મહાલક્ષ્મીરાગ્નેય્યાં કમલાલયા ॥
પદ્મા માં દક્ષિણે પાતુ નૈરૃત્યાં શ્રીર્હરિપ્રિયા

પદ્માલયા પશ્ચિમે માં વાયવ્યાં પાતુ સા સ્વયમ્ ॥
ઉત્તરે કમલા પાતુ ચૈશાન્યાં સિન્ધુકન્યકા

નારાયણી ચ પાતૂર્ધ્વમધો વિષ્ણુપ્રિયાઽવતુ ॥
સન્તતં સર્વતઃ પાતુ વિષ્ણુપ્રાણાધિકા મમ ॥

ઇતિ તે કથિતં વત્સ સર્વમન્ત્રૌઘવિગ્રહમ્ ॥
સર્વૈશ્વર્ય્યપ્રદં નામ કવચં પરમાદ્ભુતમ્

સુવર્ણપર્વતં દત્ત્વા મેરુતુલ્યં દ્વિજાતયે ॥
યત્ફલં લભતે ધર્મી કવચેન તતોઽધિકમ્

ગુરુમભ્યર્ચ્ય વિધિવત્કવચં ધારયેત્તુ યઃ ॥
કણ્ઠે વા દક્ષિણે બાહૌ સ શ્રીમાન્પ્રતિજન્મનિ

અસ્તિ લક્ષ્મીર્ગૃહે તસ્ય નિશ્ચલા શતપૂરુષમ્ ॥
દેવેન્દ્રૈશ્ચાસુરેન્દ્રૈશ્ચ સોઽવધ્યો નિશ્ચિતં ભવેત્

સ સર્વપુણ્યવાન્ધીમાન્સર્વયજ્ઞેષુ દીક્ષિતઃ ॥
સ સ્નાતઃ સર્વતીર્થેષુ યસ્યેદં કવચં ગલે

યસ્મૈ કસ્મૈ ન દાતવ્યં લોભમોહભયૈરપિ ॥
ગુરુભક્તાય શિષ્યાય શરણ્યાય પ્રકાશયેત્

ઇદં કવચમજ્ઞાત્વા જપેલ્લક્ષ્મીં જગત્પ્રભુમ્ ॥
કોટિસંખ્યં પ્રજપ્તોઽપિ ન મન્ત્રઃ સિદ્ધિદાયકઃ

ઇતિ શ્રીબ્રહ્મવૈવર્તે મહાપુરાણે તૃતીયે ગણપતિખણ્ડે નારદનારાયણસંવાદે શ્રીલક્ષ્મીકવચવર્ણનં નામાષ્ટાત્રિંશત્તમોઽધ્યાયઃ