બ્રહ્મવૈવર્ત પુરાણ · અધ્યાય 3.32

ભૃગુરુવાચ॥
સમ્પ્રાપ્તં કવચં નાષ શશ્વત્સર્વાઙ્ગરક્ષણમ્॥
સુખદં મોક્ષદં સારં શત્રુસંહારકારણમ્

અધુના ભગવન્મન્ત્રં સ્તોત્રં પૂજાવિધિં પ્રભો ॥
દેહિ મહ્યમનાથાય શરણાગતપાલક

મહાદેવ ઉવાચ ॥
ૐ શ્રીં નમઃ શ્રીકૃષ્ણાય પરિપૂર્ણતમાય સ્વાહા॥
મન્ત્રેષુ મન્ત્રરાજોઽયં મહાન્સપ્તદશાક્ષરઃ

સિદ્ધોઽયં પઞ્ચલક્ષેણ જપેન મુનિપુંગવઃ॥
તદ્દશાંશં ચ હવનં તદ્દશાંશાભિષેચનમ્ ॥
તર્પણં તદ્દશાંશં ચ તદ્દશાંશં ચ માર્જનમ્ ॥
સુવર્ણાનાં ચ શતકં પુરશ્ચરણદક્ષિણા

મન્ત્રસિદ્ધસ્ય પુંસશ્ચ વિશ્વં કરતલે મુને ॥
શક્તઃ પાતું સમુદ્રાંશ્ચ વિશ્વં સંહર્તુમીશ્વરઃ

પાઞ્ચભૌતિકદેહેન વૈકુણ્ઠં ગન્તુમીશ્વરઃ ॥
તસ્ય સંસ્પર્શમાત્રેણ પદપઙ્કજરેણુના ॥
પૂતાનિ સર્વતીર્થાનિ સદ્યઃ પૂતા વસુન્ધરા

।
ધ્યાનં ચ સામવેદોક્તં શૃણુ મન્મુખતો મુને ॥
સર્વેશ્વરસ્ય કૃષ્ણસ્ય ભક્તિમુક્તિપ્રદાયિ ચ

નવીનજલદશ્યામં નીલેન્દીવરલોચનમ્ ॥
શરત્પાર્વણચન્દ્રાસ્યમીષદ્ધાસ્યં મનોહરમ્

કોટિકન્દર્પલાવણ્યલીલાધામમનોહરમ્ ॥
રત્નસિંહાસનસ્થં તં રત્નભૂષણભૂષિતમ્

ચન્દનોક્ષિતસર્વાંગં પીતામ્બરધરં વરમ્ ॥
વીક્ષ્યમાણં ચ ગોપીભિઃ સસ્મિતાભિશ્ચ સન્તતમ્

પ્રફુલ્લમાલતીમાલાવનમાલા વિભૂષિતમ્ ॥
દધતં કુન્દપુષ્પાઢ્યાં ચૂડાં ચન્દ્રકચર્ચ્ચિતામ્

પ્રભાં ક્ષિપન્તીં નભસશ્ચન્દ્રતારાન્વિતસ્ય ચ ॥
રત્નભૂષિતસર્વાંગં રાધાવક્ષઃસ્થલસ્થિતમ્

સિદ્ધેન્દ્રૈશ્ચ મુનીન્દ્રૈશ્ચ દેવેન્દ્રૈઃ પરિસેવિતમ્॥
બ્રહ્મવિષ્ણુમહેશૈશ્ચ શ્રુતિભિશ્ચ સ્તુતં ભજે

ધ્યાનેનાનેન તં ધ્યાત્વા ચોપચારાંસ્તુ ષોડશ ॥
દત્ત્વા ભક્ત્યા ચ સંપૂજ્ય સર્વજ્ઞત્વં લભેત્પુમાન્

અર્ઘ્યં પાદ્યં ચાસનં ચ વસનં ભૂષણં તથા॥
ગામર્ઘ્યં મધુપર્કં ચ યજ્ઞસૂત્રમનુત્તમમ્

ધૂપદીપૌ ચ નૈવેદ્યં પુનરાચમનીયકમ્ ॥
નાનાપ્રકારપુષ્પાણિ તામ્બૂલં ચ સુવાસિતમ્॥

મનોહરં દિવ્યતલ્પં કસ્તૂર્યગરુચન્દનૈઃ॥
ભક્ત્યા ભગવતે દેયં માલ્યં પુષ્પાઞ્જલિત્રયમ્

તતઃ ષડંગં સમ્પૂજ્ય પશ્ચાત્સ મ્પૂજયેદ્ગણમ્॥
શ્રીદામાનં સુદામાનં વસુદામાનમેવ ચ

હરિભાનું ચન્દ્રભાનું સૂર્ય્યભાનું સુભાનુકમ્॥
પાર્ષદપ્રવરાન્સપ્ત પૂજયેદ્ભક્તિભા વતઃ

ગોપીશ્વરીં રાધિકાં ચ મૂલપ્રકૃતિમીશ્વરીમ્॥
કૃષ્ણશક્તિં કૃષ્ણપૂજ્યાં પૂજયેદ્ભક્તિપૂર્વકમ્

ગોપગોપીગણં શાન્તં માં બ્રહ્માણં ચ પાર્વતીમ્ ॥
લક્ષ્મીં સરસ્વતીં પૃથ્વીં સર્વદેવં સપાર્ષદમ્

દેવષટ્કં સમભ્યર્ચ્ય પુનઃ પઞ્ચોપચારતઃ॥
પશ્ચાદેવં ક્રમેણૈવ શ્રીકૃષ્ણં પૂજયેત્સુધીઃ

ગણેશં ચ દિનેશં ચ વહ્નિં વિષ્ણું શિવં શિવામ્ ॥
દેવષટ્કં સમભ્યર્ચ્ય ચેષ્ટદેવં ચ પૂજયેત્

ગણેશં વિઘ્નનાશાય વ્યાધિનાશાય ભાસ્કરમ્ ॥
આત્મનઃ શુદ્ધયે વહ્નિં શ્રીવિષ્ણું મુક્તિહેતવે

જ્ઞાનાય શઙ્કરં દુર્ગાં પરમૈશ્વ ર્ય્યહેતવે ॥
સમ્પૂજને ફલમિદં વિપરીતમપૂજને

તતઃ કૃત્વા પરીહારમિષ્ટદેવં ચ ભક્તિતઃ ॥
સ્તોત્રં ચ સામવેદોક્તં પઠેદ્ભક્ત્યા ચ તચ્છૃણુ

મહાદેવ ઉવાચ ॥
પરં બ્રહ્મ પરં ધામ પરં જ્યોતિઃ સનાતનમ્॥
નિર્લિપ્તં પરમાત્માનં નમામ્યખિલકારણમ્

સ્થૂલાત્સ્થૂલતમં દેવં સૂક્ષ્માત્સૂક્ષ્મતમં પરમ્ ॥
સર્વદૃશ્યમદૃશ્યં ચ સ્વેચ્છાચારં નમામ્યહમ્

સાકારં ચ નિરાકારં સગુણં નિર્ગુણં પ્રભુમ્ ॥
સર્વાધારં ચ સર્વં ચ સ્વેચ્છારૂપં નમામ્યહમ્

અતીવ કમનીયં ચ રૂપં નિરુપમં વિભુમ્ ॥
કરાલરૂપમત્યન્તં બિભ્રતં પ્રણમામ્યહમ્

કર્મ્મણઃ કર્મરૂપં તં સાક્ષિણં સર્વકર્મણઃ ॥
ફલં ચ ફલદાતારં સર્વરૂપં નમામ્યહમ્

સ્રષ્ટા પાતા ચ સંહર્તા કલયા મૂર્તિભેદતઃ ॥
નાનામૂર્તિઃ કલાંશેન યઃ પુમાંસ્તં નમામ્યહમ્

સ્વયં પ્રકૃતિરૂપશ્ચ માયયા ચ સ્વયં પુમાન્ ॥
તયોઃ પરં સ્વયં શશ્વત્તન્નમામિ પરાત્પરમ્

સ્ત્રીપુન્નપુંસકં રૂપં યો બિભર્તિ સ્વમાયયા ॥
સ્વયં માયા સ્વયં માયી યો દેવસ્તં નમામ્યહમ્

તારકં સર્વદુઃખાનાં સર્વકારણકારણમ્ ॥
ધારકં સર્વવિશ્વાનાં સર્વબીજં નમામ્યહમ્

તેજસ્વિનાં રવિર્યો હિ સર્વજાતિષુ વાડવઃ ॥
નક્ષત્રાણાં ચ યશ્ચન્દ્રસ્તં નમામિ જગત્પ્રભુમ્

રુદ્રાણાં વૈષ્ણવાનાં ચ જ્ઞાનિનાં યો હિ શઙ્કરઃ ॥
નાગાનાં યો હિ શેષશ્ચ તં નમામિ જગત્પતિમ્

પ્રજાપતીનાં યો બ્રહ્મા સિદ્ધાનાં કપિલઃ સ્વયમ્ ॥
સનત્કુમારો મુનિષુ તં નમામિ જગદ્ગુરુમ્

દેવાનાં યો હિ વિષ્ણુશ્ચ દેવીનાં પ્રકૃતિઃ સ્વયમ્॥
સ્વાયમ્ભુવો મનૂનાં યો માનવેષુ ચ વૈષ્ણવઃ॥
નારીણાં શતરૂપા ચ બહુરૂપં નમામ્યહમ્

ઋતૂનાં યો વસન્તશ્ચ માસાનાં માર્ગશીર્ષકઃ ॥
એકાદશી તિથીનાં ચ નમામ્યખિલરૂપિણમ્

સાગરઃ સરિતાં યશ્ચ પર્વતાનાં હિમાલયઃ ॥
વસુન્ધરા સહિષ્ણૂનાં તં સર્વં પ્રણમામ્યહમ્

પત્રાણાં તુલસીપત્રં દારુરૂપેષુ ચન્દનમ્ ॥
વૃક્ષાણાં કલ્પવૃક્ષો યસ્તં નમામિ જગત્પતિમ્

પુષ્પાણાં પારિજાતશ્ચ સસ્યાનાં ધાન્યમેવ ચ ॥
અમૃતં ભક્ષ્યવસ્તૂનાં નાનારૂપં નમામ્યહમ્

ઐરાવતો ગજેન્દ્રાણાં વૈનતેયશ્ચ પક્ષિણામ્ ॥
કામધેનુશ્ચ ધેનૂનાં સર્વરૂપં નમામ્યહમ્

તૈજસાનાં સુવર્ણં ચ ધાન્યાનાં યવ એવ ચ ॥
યઃ કેસરી પશૂનાં ચ વરરૂપં નમામ્યહમ્

યક્ષાણાં ચ કુબેરો યો ગ્રહાણાં ચ બૃહસ્પતિઃ ॥
દિક્પાલાનાં મહેન્દ્રશ્ચ તં નમામિ પરં વરમ્

વેદસંઘશ્ચ શાસ્ત્રાણાં પણ્ડિતાનાં સરસ્વતી ॥
અક્ષરાણામકારો યસ્તં પ્રધાનં નમામ્યહમ્

મન્ત્રાણાં વિષ્ણુમન્ત્રશ્ચ તીર્થાનાં જાહ્નવી સ્વયમ્ ॥
ઇન્દ્રિયાણાં મનો યો હિ સર્વશ્રેષ્ઠં નમામ્યહમ્ ॥

સુદર્શનં ચ શસ્ત્રાણાં વ્યાધિનાં વૈષ્ણવો જ્વરઃ ॥
તેજસાં બ્રહ્મતેજશ્ચ વરેણ્યં તં નમામ્યહમ્

બલં યો વૈ બલવતાં મનો વૈ શીઘ્રગામિનામ્ ॥
કાલઃ કલયતાં યો હિ તં નમામિ વિલક્ષણમ્

જ્ઞાનદાતા ગુરૂણાં ચ માતૃરૂપશ્ચ બન્ધુષુ ।
મિત્રેષુ જન્મદાતા યસ્તં સારં પ્રણમામ્યહમ્

શિલ્પિનાં વિશ્વકર્મા યઃ કામદેવશ્ચ રૂપિણામ્ ॥
પતિવ્રતા ચ પત્નીનાં નમસ્યં તં નમામ્યહમ્

પ્રિયેષુ પુત્રરૂપો યો નૃપરૂપો નરેષુ ચ ॥
શાલગ્રામશ્ચ યન્ત્રાણાં તં વિશિષ્ટં નમામ્યહમ્

ધર્મ્મઃ કલ્યાણબીજાનાં વેદાનાં સામવેદકઃ ॥
ધર્મ્માણાં સત્યરૂપો યો વિશિષ્ટં તં નમામ્યહમ્

જલે શૈત્યસ્વરૂપો યો ગન્ધરૂપશ્ચ ભૂમિષુ ॥
શબ્દરૂપશ્ચ ગગને તં પ્રણમ્ય નમામ્યહમ્

ક્રતૂનાં રાજસૂયો યો ગાયત્રી છન્દસાં ચ યઃ ॥
ગન્ધર્વાણાં ચિત્રરથસ્તં ગરિષ્ઠં નમામ્યહમ્

ક્ષીરસ્વરૂપો ગવ્યાનાં પવિત્રાણાં ચ પાવકઃ॥
પુણ્યદાનાં ચ યઃ સ્તોત્રં તં નમામિ શુભપ્રદમ્

તૃણાનાં કુશરૂપો યો વ્યાધિરૂપશ્ચ વૈરિણામ્ ॥
ગુણાનાં શાન્તરૂપો યશ્ચિત્રરૂપં નમામ્યહમ્

તેજોરૂપો જ્ઞાનરૂપઃ સર્વરૂપશ્ચ યો મહાન્॥
સર્વાનિર્વચનીયં ચ તં નમામિ સ્વયં વિભુમ્

સર્વાધારેષુ યો વાયુર્યથાઽઽત્મા નિત્યરૂપિણામ્ ॥
આકાશો વ્યાપકાનાં યો વ્યાપકં તં નમામ્યહમ્

વેદાનિર્વચનીયં યન્ન સ્તોતું પણ્ડિતઃ ક્ષમઃ ॥
યદનિર્વચનીયં ચ કો વા તત્સ્તોતુમીશ્વરઃ

વેદા ન શક્તા યં સ્તોતું જડીભૂતા સરસ્વતી ॥
તં ચ વાઙ્મનસાપારં કો વિદ્વાન્સ્તોતુમીશ્વરઃ

શુદ્ધતેજસ્સ્વરૂપં ચ ભક્તાનુગ્રહવિગ્રહમ્ ॥
અતીવ કમનીયં ચ શ્યામરૂપં નમામ્યહમ્

દ્વિભુજં મુરલીવક્ત્રં કિશોરં સસ્મિતં મુદા ॥
શશ્વદ્ગોપાઙ્ગનાભિશ્ચ વીક્ષ્યમાણં નમામ્યહમ્

રાધયા દત્તતામ્બૂલં ભુક્તવન્તં મનોહરમ્॥
રત્નસિંહાસનસ્થં ચ તમીશં પ્રણમામ્યહમ્

રત્નભૂષણભૂષાઢ્યં સેવિતં શ્વેતચામરૈઃ॥
પાર્ષદપ્રવરૈર્ગોપકુમારૈસ્તં નમામ્યહમ્

વૃન્દાવનાન્તરે રમ્યે રાસોલ્લાસસમુત્સુકમ્॥
રાસમણ્ડલમધ્યસ્થં નમામિ રસિકેશ્વરમ્

શતશૃઙ્ગે મહાશૈલે ગોલોકે રત્નપર્વતે ॥
વિરજાપુલિને રમ્યે પ્રણમામિ વિહારિણમ્

પરિપૂર્ણતમં શાન્તં રાધાકાન્તં મનોહરમ્ ॥
સત્યં બ્રહ્મસ્વરૂપં ચ નિત્યં કૃષ્ણં નમામ્યહમ્

શ્રીકૃષ્ણસ્ય સ્તોત્રમિદં ત્રિસન્ધ્યં યઃ પઠેન્નરઃ॥
ધર્માર્થકામમોક્ષાણાં સ દાતા ભારતે ભવેત્

હરિદાસ્યં હરૌ ભક્તિં લભેત્સ્તોત્રપ્રસાદતઃ ॥
ઇહ લોકે જગત્પૂજ્યો વિષ્ણુતુલ્યો ભવેદ્ધ્રુવમ્

સર્વસિદ્ધેશ્વરઃ શાન્તોઽપ્યન્તે યાતિ હરેઃ પદમ્ ॥
તેજસા યશસા ભાતિ યથા સૂર્ય્યો મહીતલે

જીવન્મુક્તઃ કૃષ્ણભક્તઃ સ ભવેન્નાત્ર સંશયઃ ॥
અરોગી ગુણવાન્વિદ્વાન્પુત્રવાન્ધનવાન્સદા

ષડભિજ્ઞો દશબલો મનોયાયી ભવેદ્ધ્રુવમ્ ॥
સર્વજ્ઞઃ સર્વદશ્ચૈવ સ દાતા સર્વસમ્પદામ્ ॥
કલ્પવૃક્ષસમઃ શશ્વદ્ભવેત્કૃષ્ણપ્રસાદતઃ

ઇત્યેવં કથિતં સ્તોત્રં વત્સ ત્વં ગચ્છ પુષ્કરમ્ ॥
તત્ર કૃત્વા મન્ત્રસિદ્ધિં પશ્ચાત્પ્રાપ્સ્યસિ વાઞ્છિતમ્

ત્રિસ્સપ્તકૃત્વો નિર્ભૂપાં કુરુ પૃથ્વીં યથાસુખમ્ ॥
મમાશિષા મુનિશ્રેષ્ઠ શ્રીકૃષ્ણસ્ય પ્રસાદતઃ

ઇતિ શ્રીબ્રહ્મવૈવર્તે મહાપુરાણે તૃતીયે ગણપતિખણ્ડે નારદનારાયણસંવાદે સ્તવપ્રદાનં નામ દ્વાત્રિંશત્તમોઽધ્યાયઃ