બ્રહ્મવૈવર્ત પુરાણ · અધ્યાય 3.3

શ્રીમહાદેવ ઉવાચ ॥
શૃણુ પાર્વતિ વક્ષ્યામિ તવ ભદ્રં ભવિષ્યતિ ॥
ઉપાયતઃ કાર્ય્યસિદ્ધિર્ભવત્યેવ જગત્ત્રયે

સર્વવાંછિતસિદ્ધેસ્તુ બીજરૂપં સુમઙ્ગલમ્ ॥
મનસઃ પ્રીતિજનકમુપાયં કથયામિ તે

હરેરારાધનં કૃત્વા વ્રતં કુરુ વરાનને ॥
વ્રતં ચ પુણ્યકં નામ વર્ષમેકં કરિષ્યસિ

મહાકઠોરબીજં ચ વાઞ્છાકલ્પતરું પરમ્ ॥
સુખદં પુણ્યદં સારં પુત્રદં સર્વસૌખ્યદમ્

નદીનાં ચ યથા ગંગા દેવાનાં ચ હરિર્યથા ॥
વૈષ્ણવાનાં યથાહં ચ દેવીનાં ત્વં યથા પ્રિયે

વર્ણાનાં ચ યથા વિપ્રસ્તીર્થાનાં પુષ્કરં યથા ॥
પુષ્પાણાં પારિજાતં ચ પત્રાણાં તુલસી યથા

યથા પુણ્યપ્રદાનાં ચ તિથિરેકાદશી સ્મૃતા॥
રવિવારશ્ચ વારાણાં યથા પુણ્યપ્રદઃ શિવે ॥
માસાનાં માર્ગશીર્ષશ્ચાપ્યૃતૂનાં માધવો યથા

સંવત્સરો વત્સરાણાં યુગાનાં ચ કૃતં યથા ॥
વિદ્યાપ્રદશ્ચ પૂજ્યાનાં ગુરૂણાં જનની યથા ॥
સાધ્વી પત્ની યથાપ્તાનાં વિશ્વસ્તાનાં મનો યથા

યથા ધનાનાં રત્નં ચ પ્રિયાણાં ચ યથા પતિઃ ॥
યથા પુત્રશ્ચ બન્ધૂનાં વૃક્ષાણાં કલ્પપાદપઃ

ફલાનાં વૈ ચૂતફલં વર્ષાણાં ભારતં તથા॥
વૃન્દાવનં વનાનાં ચ શતરૂપા ચ યોષિતામ્

યથા કાશી પુરીણાં ચ સૂર્ય્યસ્તેજસ્વિનાં યથા ॥
યથેન્દુઃ સુખદાનાં ચ સુન્દરાણાં ચ મન્મથઃ

શાસ્ત્રાણાં ચ યથા વેદાઃ સિદ્ધાનાં કપિલો યથા ॥
હનૂમાન્વાનરાણાં ચ ક્ષેત્રાણાં બ્રાહ્મણાનનમ્

યશોદાનાં યથા વિદ્યા કવિતા ચ મનોહરા ॥
આકાશો વ્યાપકાનાં ચ હ્યંગાનાં લોચનં યથા

વિભવાનાં હરિકથા સુખાનાં હરિચિન્તનમ્ ॥
સ્પર્શાનાં પુત્રસંસ્પર્શો હિંસ્રાણાં ચ યથા ખલઃ

પાપાનાં ચ યથા મિથ્યા પાપિનાં પુંશ્ચલી યથા ॥
પુણ્યાનાં ચ યથા સત્યં તપસાં હરિસેવનમ્

યથા ઘૃતં ચ ગવ્યાનાં યથા બ્રહ્મા તપસ્વિનામ્॥
અમૃતં ભક્ષ્યવસ્તૂનાં સસ્યાનાં ધાન્યકં યથા

પુણ્યદાનાં યથા તોયં શુદ્ધાનાં ચ હુતાશનઃ ॥
સુવર્ણં તૈજસાનાં ચ મિષ્ટાનાં પ્રિયભાષણમ્

ગરુડઃ પક્ષિણાં ચૈવ હસ્તિનામિન્દ્રવાહનમ્ ॥
યોગિનાં ચ કુમારશ્ચ દેવર્ષીણાં ચ નારદઃ

ગન્ધર્વાણાં ચિત્રરથો જીવો બુદ્ધિમતાં યથા ॥
સુકવીનાં યથા શુક્રઃ કાવ્યાનાં ચ પુરાણકમ્

સ્રોતસ્વતાં સમુદ્રશ્ચ યથા પૃથ્વી ક્ષમાવતામ્ ॥
લાભાનાં ચ યથા મુક્તિર્હરિભક્તિશ્ચ સમ્પદામ્

પવિત્રાણાં વૈષ્ણવાશ્ચ વર્ણાનાં પ્રણવો યથા ॥
વિષ્ણુમન્ત્રશ્ચ મન્ત્રાણાં બીજાનાં પ્રકૃતિર્યથા

વિદુષાં ચ યથા વાણી ગાયત્રી છન્દસાં યથા ॥
યથા કુબેરો યક્ષાણાં સર્પાણાં વાસુકિર્યથા

યથા પિતા તે શૈલાનાં ગવાં ચ સુરભિર્યથા ॥
વેદાનાં સામવેદશ્ચ તૃણાનાં ચ યથા કુશઃ

સુખદાનાં યથા લક્ષ્મીર્મનો વૈ શીઘ્રગામિનામ્ ॥
અક્ષરાણામકારશ્ચ યથા તાતો હિતૈષિણામ્

શાલગ્રામશ્ચ મૂર્તીનાં પર્શૂનાં વિષ્ણુપઞ્જરઃ ॥
ચતુષ્પદાનાં પઞ્ચાસ્યો માનવો જીવિનાં યથા

યથા સ્વાન્તં ચેન્દ્રિયાણાં મન્દાગ્નિશ્ચ રુજાં યથા ॥
બલિનાં ચ યથા શક્તિરહં શક્તિમતાં તથા

મહાન્વિરાટ્ ચ સ્થૂલાનાં સૂક્ષ્માણાં પરમાણુકઃ ॥
યથેન્દ્ર આદિતેયાનાં દૈત્યાનાં ચ બલિર્યથા

યથા દધીચિર્દાતૄણાં પ્રહ્રાદશ્ચૈવ સાધુષુ ॥
બ્રહ્માસ્ત્રં ચ યથાઽસ્ત્રાણાં ચક્રાણાં ચ સુદર્શનમ્

નૃણાં રાજા રામચન્દ્રો ધન્વિનાં લક્ષ્મણો યથા ॥
સર્વાધારઃ સર્વસેવ્યઃ સર્વબીજં ચ સર્વદઃ॥
સર્વસારો યથા કૃષ્ણો વ્રતાનાં પુણ્યકં યથા

વ્રતં કુરુ મહાભાગે ત્રિષુ લોકેષુ દુર્લભમ્ ॥
સર્વશ્રેષ્ઠશ્ચ પુત્રસ્તે વ્રતાદેવ ભવિષ્યતિ

વ્રતારાધ્યશ્ચ વૈ કૃષ્ણઃ સર્વેષાં વાઞ્છિતપ્રદઃ ॥
જનો યત્સેવનાન્મુક્તઃ પિતૃભિઃ કોટિભિઃ સહ॥

હરિમન્ત્રં ગૃહીત્વા ચ હરિસેવાં કરોતિ યઃ ॥
ભારતે જન્મ સફલં સ્વાત્મનઃ સ કરોતિ ચ

ઉદ્ધૃત્ય કોટિપુરુષાન્વૈકુણ્ઠં યાતિ નિશ્ચિતમ્ ॥
શ્રીકૃષ્ણપાર્ષદો ભૂત્વા સુખં તત્રૈવ મોદતે

સહોદરાન્સ્વભૃત્યાંશ્ચ સ્વબન્ધૂન્સહચારિણઃ ॥
સ્વસ્ત્રિયશ્ચ સમુદ્ધૃત્ય ભક્તો યાતિ હરેઃ પદમ્

ઽ
તસ્માદ્ગૃહાણ ગિરિજે હરેર્મ્મન્ત્રં સુદુર્લભમ્ ॥
જપ મન્ત્રં વ્રતે તત્ર પિતૄણાં મુક્તિકારણમ્॥

ઇત્યુક્ત્વા શંકરો દેવો ગત્વા ગિરિજયા સહ ॥
શીઘ્રં ચ જાહ્નવીતીરં હરેર્મ્મન્ત્રં મનોહરમ્

તસ્યૈ દદૌ ચ સંપ્રીત્યા કવચં સ્તોત્રસંયુતમ્ ॥
પૂજાવિધાનનિયમં કથયામાસ તાં મુને

ઇતિ શ્રીબ્રહ્મવૈવર્ત્તે મહાપુરાણે તૃતીયે ગણપતિખણ્ડે નારદનારાયણસંવાદે તૃતીયોઽધ્યાયઃ