બ્રહ્મવૈવર્ત પુરાણ · અધ્યાય 3.19

નારદ ઉવાચ ॥
કિં સ્તોત્રં કવચં નાથ બ્રહ્મણા લોકસાક્ષિણા ॥
દાનવાભ્યાં પુરા દત્તં સૂર્યસ્ય પરમાત્મનઃ

કિં વા પૂજાવિધાનં વા કિં મન્ત્રં વ્યાધિનાશનમ્ ॥
સર્વં ચાસ્ય મહાભાગ તન્મે ત્વં વક્તુમર્હસિ

સૂત ઉવાચ ॥
નારદસ્ય વચઃ શ્રુત્વા ભગવાન્કરુણાનિધિઃ॥
સ્તોત્રં ચ કવચં મન્ત્રમૂચે તત્પૂજનક્રમમ્

નારાયણ ઉવાચ॥
શૃણુ નારદ વક્ષ્યામિ સૂર્ય્યપૂજાવિધેઃ ક્રમમ્॥
સ્તોત્રં ચ કવચં સર્વં પાપવ્યાધિવિમોચકમ્

સુમાલિમાલિનૌ દૈત્યૌ વ્યાધિગ્રસ્તૌ બભૂવતુઃ ॥
વિધિં સસ્મરતુઃ સ્તોતું શિવમન્ત્રપ્રદાયકમ્

બ્રહ્મા ગત્વા ચ વૈકુણ્ઠં પપ્રચ્છ કમલાપતિમ્ ॥
શિવં તત્રૈવ સંપશ્યન્વસન્તં હરિસન્નિધૌ

બ્રહ્મોવાચ ॥
સુમાલિમાલિનૌ દૈત્યૌ વ્યાધિગ્રસ્તૌ બભૂવતુઃ ॥
ક ઉપાયો વદ હરે તયોર્વ્યાધિવિનાશને

વિષ્ણુરુવાચ ॥
કૃત્વા સૂર્ય્યસ્ય સેવાં ચ પુષ્કરે પૂર્ણવત્સરમ્ ॥
વ્યાધિહન્તુર્મદંશસ્ય તૌ ચ મુક્તૌ ભવિષ્યતઃ

શંકર ઉવાચ ॥
સૂર્યસ્તોત્રં ચ કવચં મન્ત્રં કલ્પતરું પરમ્ ॥
દેહિ તાભ્યાં જગત્કાન્ત વ્યાધિહન્તુર્મહાત્મનઃ

આરાત્સમ્પત્પ્રદાતારૌ સર્વદાતા હરિઃ સ્વયમ્ ॥
વ્યાધિહન્તા દિનકરો યસ્ય યો વિષયો વિધે

તયોસ્તુ મન્ત્રં સંપ્રાપ્ય યયૌ દૈત્યગૃહં વિધિઃ ॥
તદા પ્રણમ્ય તં દૃષ્ટ્વા તસ્મૈ દદતુરાસનમ્

તાવુવાચ સ્વયં બ્રહ્મા રોગગ્રસ્તૌ દયાનિધિઃ ॥
સ્તબ્ધાવાહારરહિતૌ પૂયદુર્ગન્ધસંયુતૌ

બ્રહ્મોવાચ ॥
ગૃહીત્વા કવચં સ્તોત્રં મન્ત્રં પૂજાવિધિક્રમમ્ ॥
ગત્વા હિ પુષ્કરં વત્સૌ ભજથઃ પ્રણતૌ રવિમ્

તાવૂચતુઃ ॥
ભજાવઃ કેન વિધિના કેન મન્ત્રેણ વા વિધે ॥
કિં સ્તોત્રં કવચં કિં વા તદાવાભ્યાં વદાધુના

બ્રહ્મોવાચ ॥
કૃત્વા ત્રિકાલં સ્નાનં ચ મન્ત્રેણાનેન ભાસ્કરમ્ ॥
સંસેવ્ય ભાસ્કરં ભક્ત્યા નીરુજૌ ચ ભવિષ્યથ

ૐ હ્રીં નમો ભગવતે સૂર્ય્યાય પરમાત્મને સ્વાહા ॥
ઇત્યનેન ચ મન્ત્રેણ સાવધાનં દિવાકરમ્ ॥
સંપૂજ્ય ભક્ત્યા દત્ત્વા વૈ ચોપહારાંસ્તુ ષોડશ ॥
એવં સંવત્સરં યાવદ્ધ્રુવં મુક્તૌ ભવિષ્યથઃ

અપૂર્વં કવચં તસ્ય યુવાભ્યાં પ્રદદામ્યહમ્ ॥
યદ્દત્તં ગુરુણા પૂર્વમિન્દ્રાય પ્રીતિપૂર્વકમ્

તત્સહસ્રભગાઙ્ગાય શાપેન ગૌતમસ્ય ચ ॥
અહલ્યાહરણેનૈવ પાપમુક્તાય સઙ્કટે

બૃહસ્પતિરુવાચ ॥
ઇન્દ્ર શૃણુ પ્રવક્ષ્યામિ કવચં પરમાદ્ભુતમ્ ॥
યદ્ધૃત્વા મુનયઃ પૂતા જીવન્મુક્તાશ્ચ ભારતે

કવચં બિભ્રતો વ્યાધિર્ન ભિયા યાતિ સન્નિધિમ્ ॥
યથા દૃષ્ટ્વા વૈનતેયં પલાયન્તે ભુજઙ્ગમાઃ

શુદ્ધાય ગુરુભક્તાય સ્વશિષ્યાય પ્રકાશયેત્ ॥
ખલાય પરશિષ્યાય દત્ત્વા મૃત્યુમવાપ્નુયાત્

જગદ્વિલક્ષણસ્યાસ્ય કવચસ્ય પ્રજાપતિઃ ॥
ઋષિશ્છન્દશ્ચ ગાયત્રી દેવો દિનકરઃ સ્વયમ્ ॥
વ્યાધિપ્રણાશે સૌન્દર્ય્યે વિનિયોગઃ પ્રકીર્ત્તિતઃ

સદ્યોરોગહરં સારં સર્વપાપપ્રણાશનમ્ ॥
ૐ ક્લીં હ્રીં શ્રીં શ્રીસૂર્ય્યાય સ્વાહા મે પાતુ મસ્તકમ્

અષ્ટાદશાક્ષરો મન્ત્રઃ કપાલં મે સદાઽવતુ॥
ૐ હ્રીં હ્રીં શ્રીં શ્રીં સૂર્ય્યાય સ્વાહા મે પાતુ નાસિકામ્

ચક્ષુર્મે પાતુ સૂર્યશ્ચ તારકાં ચ વિકર્તનઃ ॥
ભાસ્કરો મેઽધરં પાતુ દન્તાન્દિનકરઃ સદા

પ્રચણ્ડઃ પાતુ ગણ્ડં મે માર્તણ્ડઃ કર્ણમેવ ચ ॥
મિહિરશ્ચ સદા સ્કન્ધે જંઘે પૂષા સદાઽવતુ

વક્ષઃ પાતુ રવિઃ શશ્વન્નાભિં સૂર્ય્યઃ સ્વયં સદા॥
કંકાલં મે સદા પાતુ સર્વદેવનમસ્કૃતઃ

કરૌ પાતુ સદા બ્રધ્નઃ પાતુ પાદૌ પ્રભાકરઃ॥
વિભાકરો મે સર્વાંગં પાતુ સન્તતમીશ્વરઃ

ઇતિ તે કથિતં વત્સ કવચં સુમનોહરમ્॥
જગદ્વિલક્ષણં નામ ત્રિજગત્સુ સુદુર્લભમ્

પુરા દત્તં ચ મનવે પુલસ્ત્યેન તુ પુષ્કરે ॥
મયા દત્તં ચ તુભ્યં તદ્યસ્મૈ કસ્મૈ ન દેહિ ભોઃ

વ્યાધિતો મુચ્યસે ત્વં ચ કવચસ્ય પ્રસાદતઃ ॥
ભવાનરોગી શ્રીમાંશ્ચ ભવિષ્યતિ ન સંશયઃ

લક્ષવર્ષહવિષ્યેણ યત્ફલં લભતે નરઃ ॥
તત્ફલં લભતે નૂનં કવચસ્યાસ્ય ધારણાત્

ઇદં કવચમજ્ઞાત્વા યો મૂઢો ભાસ્કરં યજેત્ ॥
દશલક્ષપ્રજપ્તોઽપિ મન્ત્રસિદ્ધિર્ન જાયતે

બ્રહ્મોવાચ ॥
ધૃત્વેદં કવચં વત્સૌ કૃત્વા ચ સ્તવનં રવેઃ ॥
યુવાં વ્યાધિવિનિર્મુક્તૌ નિશ્ચિતં તુ ભવિષ્યથઃ

સ્તવનં સામવેદોક્તં સૂર્ય્યસ્ય વ્યાધિમોચનમ્ ॥
સર્વપાપહરં સારં ધનારોગ્યકરં પરમ્

બ્રહ્મોવાચ ॥
તં બ્રહ્મ પરમં ધામ જ્યોતીરૂપં સનાતનમ્ ॥
ત્વામહં સ્તોતુમિચ્છામિ ભક્તાનુગ્રહકારકમ્

ત્રૈલોક્યલોચનં લોકનાથં પાપવિમોચનમ્ ॥
તપસાં ફલદાતારં દુઃખદં પાપિનાં સદા

કર્માનુરૂપફલદં કર્મબીજં દયાનિધિમ્ ॥
કર્મરૂપં ક્રિયારૂપમરૂપં કર્મબીજકમ્

બ્રહ્મવિષ્ણુમહેશાનામંશં ચ ત્રિગુણાત્મકમ્ ॥
વ્યાધિદં વ્યાધિહન્તારં શોકમોહભયાપહમ્ ॥
સુખદં મોક્ષદં સારં ભક્તિદં સર્વકામદમ્

સર્વેશ્વરં સર્વરૂપં સાક્ષિણં સર્વકર્મણામ્ ॥
પ્રત્યક્ષં સર્વલોકાનામપ્રત્યક્ષં મનોહરમ્

શશ્વદ્રસહરં પશ્ચાદ્રસદં સર્વસિદ્ધિદમ્ ॥
સિદ્ધિ સ્વરૂપં સિદ્ધેશં સિદ્ધાનાં પરમં ગુરુમ્

સ્તવરાજમિદં પ્રોક્તં ગુહ્યાદ્ગુહ્યતરં પરમ્ ॥
ત્રિસન્ધ્યં યઃ પઠેન્નિત્યં વ્યાધિભ્યસ્સ પ્રમુચ્યતે

આન્ધ્યં કુષ્ઠં ચ દારિદ્ર્યં રોગઃ શોકો ભયં કલિઃ ॥
તસ્ય નશ્યતિ વિશ્વેશ શ્રીસૂર્ય્યકૃપયા ધ્રુવમ્

મહાકુષ્ઠી ચ ગલિતશ્ચક્ષુર્હીનો મહાવ્રણી ॥
યક્ષ્મગ્રસ્તો મહાશૂલી નાનાવ્યાધિયુતોઽસિ વા

માસં કૃત્વા હવિષ્યાન્નં શ્રુત્વાઽતો મુચ્યતે ધ્રુવમ્ ॥
સ્નાનં ચ સર્વતીર્થાનાં લભતે નાત્ર સંશયઃ ॥

પુષ્કરં ગચ્છતં શીઘ્રં ભાસ્કરં ભજતં સુતૌ ॥
ઇત્યેવમુક્ત્વા સ વિધિર્જગામ સ્વાલયં મુદા

તૌ નિષેવ્ય દિનેશં તં નીરુજૌ સંબભૂવતુઃ॥
ઇત્યેવં કથિતં વત્સ કિં ભૂયઃ શ્રોતુમિચ્છસિ

સર્વવિઘ્નહરં સારં વિઘ્નેશં વિઘ્નનાશનમ્॥
સ્તોત્રેણાનેન તં સ્તુત્વા મુચ્યતે નાત્ર સંશયઃ

ઇતિ શ્રીબ્રહ્મવૈવર્ત્તે મહાપુરાણે તૃતીયે ગણપતિખણ્ડે નારદનારાયણસંવાદે વિઘ્નકારણકથનં નામૈકોનવિંશતિતમોઽધ્યાયઃ