બ્રહ્મવૈવર્ત પુરાણ · અધ્યાય 3.18

નારદ ઉવાચ ॥
નારાયણ મહાભાગ વેદવેદાંગપારગ ॥
પૃચ્છામિ ત્વામહં કિંચિદતિસન્દેહવાન્યતઃ

સુતસ્ય ત્રિદશેશસ્ય શંકરસ્ય મહાત્મનઃ ॥
વિઘ્નનિઘ્નસ્ય યદ્વિઘ્નમીશ્વરસ્ય કથં પ્રભો

પરિપૂર્ણતમઃ શ્રીમાન્પરમાત્મા પરાત્પરઃ ॥
ગોલોકનાથઃ સ્વાંશેન પાર્વતીતનયઃ સ્વયમ્

અહો ભગવતસ્તસ્ય મસ્તકચ્છેદનં વિભો ॥
ગ્રહદૃષ્ટ્યા ગ્રહેશસ્ય કથં મે વક્તુમર્હસિ

નારાયણ ઉવાચ ॥
સાવધાનં શૃણુ બ્રહ્મન્નિતિહાસં પુરાતનમ્ ॥
વિઘ્નેશસ્ય બભૂવેદં વિઘ્નં યેન ચ નારદ

એકદા શંકરઃ સૂર્ય્યં જઘાન પરમષ્ટધા ॥
સુમાલિમાલિહન્તારં શૂલેન બહુવત્સલઃ

શ્રીસૂર્ય્યોઽમોઘશૂલેનાશનિતુલ્યેન તેજસા ॥
જહૌ સ ચેતનાં સદ્યો રથાચ્ચ નિપપાત હ

દદર્શ કશ્યપઃ પુત્રં મૃતમુત્તાનલોચનમ્ ॥
કૃત્વા વક્ષસિ તં શોકાદ્વિલલાપ ભૃશં મુહુઃ

હાહાકારં સુરાશ્ચક્રુર્વિલેપુર્ભયકાતરાઃ ॥
અન્ધીભૂતં જગત્સર્વં બભૂવ તમસા વૃતમ્

નિષ્પ્રભં તનયં દૃષ્ટ્વા ચાશપત્કશ્યપઃ શિવમ્ ॥
તપસ્વી બ્રહ્મણઃ પૌત્રઃ પ્રજ્વન્બ્રહ્મતેજસા

મત્પુત્રસ્ય યથા વક્ષશ્છિન્નં શૂલેન તેઽદ્ય વૈ ॥
ત્વત્પુત્રસ્ય શિરશ્છિન્નં ભવિષ્યતિ ન સંશયઃ

શિવશ્ચ ગલિતક્રોધઃ ક્ષણેનૈવાશુતોષકઃ ॥
બ્રહ્મજ્ઞાનેન તત્પૂર્ણં જીવયામાસ તત્ક્ષણાત્

બ્રહ્મવિષ્ણુમહેશાનામંશશ્ચ ત્રિગુણાત્મકઃ ॥
સૂર્ય્યશ્ચ ચેતનાં પ્રાપ્ય સમુત્તસ્થૌ પિતુઃ પુરઃ

નનામ પિતરં ભક્ત્યા શંકરં ભક્તવત્સલઃ ॥
વિજ્ઞાય શમ્ભોઃ શાપં ચ કશ્યપં સ ચુકોપ હ

વિષયાન્નૈવ જગ્રાહ કોપેનૈવમુવાચ હ ॥
વિષયાંશ્ચ પરિત્યજ્ય ભજે શ્રીકૃષ્ણમીશ્વરમ્

સર્વં તુચ્છમનિત્યં ચ નશ્વરં ચેશ્વરં વિના ॥
વિહાય મઙ્ગલં સત્યં વિદ્વાન્નેચ્છેદમંગલમ્

દેવૈશ્ચ પ્રેરિતો બ્રહ્મા સમાગત્ય સસમ્ભ્રમઃ ॥
બોધયિત્વા રવિં તત્ર યુયોજ વિષયેષ્વજઃ

તસ્મૈ દત્ત્વાઽઽશિષશ્શમ્ભુર્બ્રહ્મા ચ સ્વાલયં મુદા ॥
જગામ કશ્યપશ્ચૈવ સ્વરાશિં રવિરેવ ચ

અથ માલી સુમાલી ચ વ્યાધિગ્રસ્તૌ બભૂવતુઃ ॥
શ્વિત્રૌ ગલિતસર્વાંગૌ શક્તિહીનૌ હતપ્રભૌ

તાવુવાચ સ્વયં બ્રહ્મા યુવાં ચ ભજતાં રવિમ્ ॥
સૂર્ય્યકોપેન મલિનૌ યુવામેવં હતપ્રભૌ

સૂર્ય્યસ્ય કવચં સ્તોત્રં સર્વપૂજાવિધિં વિધિઃ ॥
જગામ કથયિત્વા તૌ બ્રહ્મલોકં સનાતનઃ

તતસ્તૌ પુષ્કરં ગત્વા સિષેવાતે રવિં મુને॥
સ્નાત્વા ત્રિકાલં ભક્ત્યા ચ જપન્તૌ મન્ત્રમુત્તમમ્

તતઃ સૂર્ય્યાદ્વરં પ્રાપ્ય નિજરૂપૌ બભૂવતુઃ ॥
ઇત્યેવં કથિતં સર્વં કિં ભયઃ શ્રોતુમિચ્છસિ

ઇતિ શ્રીબ્રહ્મવૈવર્ત્તે મહાપુરાણે તૃતીયે ગણપતિખણ્ડે નારદનારાયણસંવાદે વિઘ્નેશવિઘ્નકથનંનામાષ્ટાદશોઽધ્યાયઃ