બ્રહ્મવૈવર્ત પુરાણ · અધ્યાય 3.17

નારાયણ ઉવાચ ॥
અથ વિષ્ણુર્જગત્કાન્તો હૃષ્ટઃ કૃત્વા શુભક્ષણમ્ ॥
રત્નસિંહાસને રમ્યે વાસયામાસ ષણ્મુખમ્

નાનાવિધાનિ વાદ્યાનિ કાંસ્યતાલાદિકાનિ ચ ॥
નાનાવિધાનિ યન્ત્રાણિ વાદયામાસ કૌતુકાત્

વેદમન્ત્રાભિષિક્તૈશ્ચ સર્વર્તીર્થોદપૂર્ણકૈઃ ॥
સદ્રત્નકુમ્ભશતકૈઃ સ્નાપયામાસ તં મુદા

સદ્રત્નસારખચિતં કિરીટં મઙ્ગલાઙ્ગદે ॥
અમૂલ્યરત્નખચિતં ભૂષણાનિ બહૂનિ ચ

વહ્નિશુદ્ધાંશુકે દિવ્યે ક્ષીરોદાર્ણવસમ્ભવમ્ ॥
કૌસ્તુભં વનમાલાં ચ તસ્મૈ ચક્રં દદૌ મુદા

બ્રહ્મા દદૌ યજ્ઞસૂત્રં વેદા વૈ વેદમાતરમ્ ॥
સન્ધ્યામન્ત્રં કૃષ્ણમન્ત્રં સ્તોત્રં ચ કવચં હરેઃ

કમણ્ડલું ચ બ્રહ્માસ્ત્રં વિદ્યાં વૈ વૈરિમર્દિનીમ્ ॥
ધર્મો ધર્મમતિં દિવ્યાં સર્વજીવે દયાં દદૌ

પરં મૃત્યુઞ્જયં જ્ઞાનં સર્વશાસ્ત્રાવબોધનમ્ ॥
શશ્વત્સુખપ્રદં તત્ત્વજ્ઞાનં ચ સુમનોહરમ્

યોગતત્ત્વં સિદ્ધિતત્ત્વં બ્રહ્મજ્ઞાનં સુદુર્લભમ્ ॥
શૂલં પિનાકં પરશું શક્તિં પાશુપતં ધનુઃ ॥
સંહારાસ્ત્રવિનિક્ષેપં તત્સંહારે દદૌ શિવઃ

શ્વેતચ્છત્રં રત્નમાલાં દદૌ તસ્મૈ જલેશ્વરઃ ॥
ગજેન્દ્રં ચ હયેન્દ્રં ચ સુધાકુમ્ભં સુધાનિધિઃ

મનોયાયિરથં સૂર્ય્યઃ સન્નાહં ચ મનોરમમ્ ॥
યમદણ્ડં યમશ્ચૈવ મહાશક્તિં હુતાશનઃ ॥
નાનાશસ્ત્રાણ્યુપાયાનિ સર્વે દેવા દદુર્મુદા

કામશાસ્ત્રં કામદેવો દદૌ તસ્મૈ મુદાઽન્વિતઃ ॥
ક્ષીરોદોઽમૂલ્યરત્નાનિ વિશિષ્ટે રત્નનૂપુરે

પાર્વતી સસ્મિતા હૃષ્ટા પરમાનન્દમાનસા ॥
મહાવિદ્યાં સુશીલાં ચ વિદ્યાં મેધાં દયાં સ્મૃતિમ્

બુદ્ધિં સુનિર્મલાં શાન્તિં તુષ્ટિં પુષ્ટિં ક્ષમાં ધૃતિમ્ ॥
સદૃઢાં ચ હરૌ ભક્તિં હરિદાસ્યં દદૌ મુદા

પ્રજાપતિર્દેવસેનાં રત્નભૂષણભૂષિતામ્ ॥
સુવિનીતાં સુશીલાં ચ સુન્દરીં સુમનોહરામ્

દદૌ તસ્મૈ વેદમન્ત્રૈર્વિવાહવિધિના સ્વયમ્ ॥
યાં વદન્તિ મહાષષ્ઠીં પણ્ડિતાઃ શિશુપાલિકામ્

અભિષિચ્ય કુમારં ચ સર્વે દેવા યયુર્ગૃહમ્ ॥
મુનયશ્ચૈવ ગન્ધર્વાઃ પ્રણમ્ય જગદીશ્વરાન્

નારાયણં ચ બ્રહ્માણં ધર્મં તુષ્ટાવ શંકરઃ ॥
પ્રણનામ હરિં તાત ધર્મમાલિંગ્ય નારદ

પ્રીત્યા યયૌ ચ શૈલેન્દ્રઃ સગણઃ શંકરાર્ચિતઃ॥
યે યે તત્રાગતા સર્વે યયુરાનન્દપૂર્વકમ્

પરમાનન્દસંયુક્તો દેવ્યા સહ મહેશ્વરઃ ॥
કાલાન્તરે ચ તાન્સર્વાન્પુનરાનીય શંકરઃ ॥
પુષ્ટિં દદૌ વિવાહેન ગણેશાય મહાત્મને

સુતાભ્યાં સગણૈઃ સાર્દ્ધં પાર્વતી હૃષ્ટમાનસા ॥
સિષેવે સ્વામિનઃ પાદપદ્મં સા સર્વકામદમ્

ઇત્યેવં કથિતં સર્વં કુમારસ્યાભિષેચનમ્ ॥
વિવાહઃ પૂજનં તસ્ય ગણેશસ્ય વિવાહકમ્

પાર્વતીપુત્રલાભશ્ચ દેવાનાં ચ સમાગમઃ ॥
કા તે મનસિ વાઞ્છાઽસ્તિ કિં ભૂયઃ શ્રોતુમિચ્છસિ

ઇતિ શ્રીબ્રહ્મવૈવર્તે મહાપુરાણે તૃતીયે ગણપતિખણ્ડે નારદનારાયણસંવાદે કુમારગણેશવિવાહ કુમારાભિષેકકથનં નામ સપ્તદશોઽધ્યાયઃ