બ્રહ્મવૈવર્ત પુરાણ · અધ્યાય 2.66

નારદ ઉવાચ ॥
શ્રુતં સર્વં નાવશિષ્ટં કિઞ્ચિદેવ હિ નિશ્ચિતમ્ ॥
પ્રકૃતેઃ કવચં સ્તોત્રં બ્રૂહિ મે મુનિસત્તમ

નારાયણ ઉવાચ ॥
પુરા સ્તુતા સા ગોલોકે કૃષ્ણેન પરમાત્મના ॥
સંપૂજ્ય મધુમાસે ચ સંપ્રીતે રાસમણ્ડલે ॥
મધુકૈટભયોર્યુદ્ધે દ્વિતીયે વિષ્ણુના પુરા

તત્રૈવ કાલે સા દુર્ગા બ્રહ્મણા પ્રાણસઙ્કટે ॥
ચતુર્થે સંસ્તુતા દેવી ભક્ત્યા ચ ત્રિપુરારિણા

પુરા ત્રિપુરયુદ્ધે ચ મહાઘોરતરે મુને ॥
પઞ્ચમે સંસ્તુતા દેવી વૃત્રાસુરવધે તથા

શક્રેણ સર્વદેવૈશ્ચ ઘોરે ચ પ્રાણસઙ્કટે ॥
તદા મુનીન્દ્રૈર્મનુભિર્માનવૈઃ સુરથાદિભિઃ

સંસ્તુતા પૂજિતા સા ચ કલ્પે કલ્પે પરાત્પરા ॥
સ્તોત્રં ચ શ્રૂયતાં બ્રહ્મન્સર્વવિઘ્નવિનાશકમ્ ॥
સુખદં મોક્ષદં સારં ભવસન્તારકારણમ્

શ્રીકૃષ્ણ ઉવાચ ॥
ત્વમેવ સર્વજનની મૂલપ્રકૃતિરીશ્વરી ॥
ત્વમેવાદ્યા સૃષ્ટિવિધૌ સ્વેચ્છયા ત્રિગુણાત્મિકા

કાર્ય્યાર્થે સગુણા ત્વં ચ વસ્તુતો નિર્ગુણા સ્વયમ્ ॥
પરબ્રહ્મસ્વરૂપા ત્વં સત્યા નિત્યા સનાતની

તેજસ્સ્વરૂપા પરમા ભક્તાનુગ્રવિગ્રહા ॥
સર્વસ્વરૂપા સર્વેશા સર્વાધારા પરાત્પરા ॥

સર્વબીજસ્વરૂપા ચ સર્વપૂજ્યા નિરાશ્રયા ॥
સર્વજ્ઞા સર્વતોભદ્રા સર્વમંગલમંગલઃ

સર્વબુદ્ધિસ્વરૂપા ચ સર્વશક્તિસ્વરૂપિણી ॥
સર્વજ્ઞાનપ્રદા દેવી સર્વજ્ઞા સર્વભાવિની

ત્વં સ્વાહા દેવદાને ચ પિતૃદાને સ્વધા સ્વયમ્ ॥
દક્ષિણા સર્વદાને ચ સર્વશક્તિસ્વરૂપિણી

નિદ્રા ત્વં ચ દયા ત્વં ચ તૃષ્ણા ત્વં ચાત્મનઃ પ્રિયા ॥
ક્ષુત્ક્ષાન્તિઃ શાન્તિરીશા ચ શાન્તિઃ સૃષ્ટિશ્ચ શાશ્વતી

શ્રદ્ધા પુષ્ટિશ્ચ તન્દ્રા ચ લજ્જા શોભા દયા તથા ॥
સતાં સમ્પત્સ્વરૂપા શ્રીર્વિપત્તિરસતામિહ

પ્રીતિરૂપા પુણ્યવતાં પાપિનાં કલહાઙ્કુરા ॥
શશ્વત્કર્મમયી શક્તિઃ સર્વદા સર્વજીવિનામ્

દેવેભ્યઃ સ્વપદો દાત્રી ધાતુર્ધાત્રી કૃપામયી ॥
હિતાય સર્વદેવાનાં સર્વાસુરવિનાશિની

યોગિનિદ્રા યોગરૂપા યોગદાત્રી ચ યોગિનામ્ ॥
સિદ્ધિસ્વરૂપા સિદ્ધાનાં સિદ્ધિદા સિદ્ધયોગિની

બ્રહ્માણી માહેશ્વરી ચ વિષ્ણુમાયા ચ વૈષ્ણવી ॥
ભદ્રદા ભદ્રકાલી ચ સર્વલોકભયંકરી

ગ્રામે ગ્રામે ગ્રામદેવી ગૃહદેવી ગૃહે ગૃહે ॥
સતાં કીર્ત્તિઃ પ્રતિષ્ઠા ચ નિન્દા ત્વમસતાં સદા

મહાયુદ્ધે મહામારી દુષ્ટસંહારરૂપિણી ॥
રક્ષાસ્વરૂપા શિષ્ટાનાં માતેવ હિતકારિણી

વન્દ્યા પૂજ્યા સ્તુતા ત્વં ચ બ્રહ્માદીનાં ચ સર્વદા ॥
બ્રહ્મણ્યરૂપા વિપ્રાણાં તપસ્યા ચ તપસ્વિનામ્

વિદ્યા વિદ્યાવતાં ત્વં ચ બુદ્ધિર્બુદ્ધિમતાં સતામ્ ॥
મેધા સ્મૃતિસ્વરૂપા ચ પ્રતિભા પ્રતિભાવતામ્

રાજ્ઞાં પ્રતાપરૂપા ચ વિશાં વાણિજ્યરૂપિણી ॥
સૃષ્ટૌ સૃષ્ટિસ્વરૂપા ત્વં રક્ષારૂપા ચ પાલને

તથાઽન્તે ત્વં મહામારી વિશ્વે વિશ્વૈશ્ચ પૂજિતે॥
કાલરાત્રિર્મહારાત્રિર્મોહરાત્રિશ્ચ મોહિની

દુરત્યયા મે માયા ત્વં યયા સંમોહિતં જગત્॥
યયા મુગ્ધો હિ વિદ્વાંશ્ચ મોક્ષમાર્ગં ન પશ્યતિ

ઇત્યાત્મના કૃતં સ્તોત્રં દુર્ગાયા દુર્ગનાશનમ્ ॥
પૂજાકાલે પઠેદ્યો હિ સિદ્ધિર્ભવતિ વાઞ્છિતા

વન્ધ્યા ચ કાકવન્ધ્યા ચ મૃતવત્સા ચ દુર્ભગા॥
શ્રુત્વા સ્તોત્રં વર્ષમેકં સુપુત્રં લભતે ધુવમ્

કારાગારે મહાઘોરે યો બદ્ધો દૃઢબન્ધને॥
શ્રુત્વા સ્તોત્રં માસમેકં બન્ધનાન્મુચ્યતે ધુવમ્

યક્ષ્મગ્રસ્તો ગલત્કુષ્ઠી મહાશૂલી મહાજ્વરી ॥
શ્રુત્વા સ્તોત્રં વર્ષમેકં સદ્યો રોગાત્પ્રમુચ્યતે ॥

પુત્રભેદે પ્રજાભેદે પત્નીભેદે ચ દુર્ગતઃ ॥
શ્રુત્વા સ્તોત્રં માસમેકં લભતે નાત્ર સંશયઃ

રાજદ્વારે શ્મશાને ચ મહારણ્યે રણસ્થલે ॥
હિંસ્રજન્તુસમીપે ચ શ્રુત્વા સ્તોત્રં પ્રમુચ્યતે

ગૃહદાહે ચ દાવાગ્નૌ દસ્યુસૈન્યસમન્વિતે ॥
સ્તોત્રશ્રવણમાત્રેણ લભતે નાત્ર સંશયઃ

મહાદરિદ્રો મૂર્ખશ્ચ વર્ષં સ્તોત્રં પઠેત્તુ યઃ ॥
વિદ્યાવાન્ધનવાંશ્ચૈવ સ ભવેન્નાત્ર સંશયઃ

ઇતિ શ્રીબ્રહ્મવૈવર્તે મહાપુરાણે દ્વિતીયે પ્રકૃતિખણ્ડે નારદનારાયણસંવાદે દુર્ગોપાખ્યાને દુર્ગાસ્તોત્રં નામ ષટ્ષષ્ટિતમોઽધ્યાયઃ