બ્રહ્મવૈવર્ત પુરાણ · અધ્યાય 2.56

શ્રીપાર્વત્યુવાચ ॥
પૂજાવિધાનં સ્તોત્રં ચ શ્રુતમત્યદ્ભુતં મયા ॥
અધુના કવચં બ્રૂહિ શ્રોષ્યામિ ત્વત્પ્રસાદતઃ

શ્રીમહેશ્વર ઉવાચ ॥
શૃણુ વક્ષ્યામિ હે દુર્ગે કવચં પરમાદ્ભુતમ્ ॥
પુરા મહ્યં નિગદિતં ગોલોકે પરમાત્મનઃ

અતિગુહ્યં પરં તત્ત્વં સર્વમન્ત્રૌઘવિગ્રહમ્ ॥
યદ્ધૃત્વા પઠનાદ્બ્રહ્મા સંપ્રાપ્તો વેદમાતરમ્

યદ્ધૃત્વાઽહં તવ સ્વામી સર્વમાતા સુરેશ્વરી ॥
નારાયણશ્ચ યદ્ધૃત્વા મહાલક્ષ્મીમવાપ સઃ

યદ્ધૃત્વા પરમાત્મા ચ નિર્ગુણં પ્રકૃતેઃ પરઃ ॥
બભૂવ શક્તિમાન્કૃષ્ણઃ સૃષ્ટિં કર્તું પુરા વિભુઃ

વિષ્ણુઃ પાતા ચ યદ્ધૃત્વા સંપ્રાપ્તસ્સિન્ધુકન્યકામ્ ॥
શેષો બિભર્તિ બ્રહ્માણ્ડં મૂર્ધ્નિ સર્ષપવદ્યતઃ

પ્રત્યેકં લોમકૂપેષુ બ્રહ્માણ્ડાનિ મહાન્વિરાટ્॥
બિભર્તિ ધારણાદ્યસ્ય સર્વાધારો બભૂવ સઃ

યદ્ધારણાચ્ચ પઠનાદ્ધર્મ્મઃ સાક્ષી ચ સર્વતઃ॥
યદ્ધારણાત્કુબેરશ્ચ ધનાધ્યક્ષશ્ચ ભારતે

ઇન્દ્રઃ સુરાણામીશશ્ચ પઠનાદ્ધારણાદ્વિભુઃ ॥
નૃપાણાં મનુરીશશ્ચ પઠનાદ્ધારણાત્પ્રભુઃ ॥ ।

શ્રીમાંશ્ચન્દ્રશ્ચ યદ્ધૃત્વા રાજસૂયં ચકાર સઃ ॥
સ્વયં સૂર્યસ્ત્રિલોકેશઃ પઠનાદ્ધારણાદ્ધરિઃ

યદ્ધૃત્વા પઠનાદગ્નિર્જગત્પૂતં કરોતિ ચ॥
યદ્ધૃત્વા વાતિ વાતોઽયં પુનાતિ ભુવનત્રયમ્

યદ્ધૃત્વા ચ સ્વતન્ત્રો હિ મૃત્યુશ્ચરતિ જન્તુષુ॥
ત્રિઃસપ્તકૃત્વો નિઃક્ષત્રાં ચકાર ચ વસુન્ધરામ્

જામદગ્ન્યશ્ચ રામશ્ચ પઠનાદ્ધારણાત્પ્રભૂ ॥
પપૌ સમુદ્રં યદ્ધૃત્વા પઠનાત્કુમ્ભસમ્ભવઃ

સનત્કુમારો ભગવાન્યદ્ધૃત્વા જ્ઞાનિનાં ગુરુઃ ॥
જીવન્મુક્તૌ ચ સિદ્ધૌ ચ નરનારાયણાવૃષી

યદ્ધૃત્વા પઠનાત્સિદ્ધો વસિષ્ઠો બ્રહ્મપુત્રકઃ॥
સિદ્ધેશઃ કપિલો યસ્માદ્યસ્માદ્દક્ષઃ પ્રજાપતિઃ

યસ્માદ્ભૃગુશ્ચ માં દ્વેષ્ટિ કૂર્મ્મઃ શેષં બિભર્ત્તિ ચ ॥
સર્વાધારો યતો વાયુર્વરુણઃ પવનો યતઃ

ઈશાનો દિક્પતિશ્ચૈવ યમઃ શાસ્તા યતઃ શિવે ॥
કાલઃ કાલાગ્નિરુદ્રશ્ચ સંહર્ત્તા જગતાં યતઃ

યદ્ધૃત્વા ગૌતમઃ સિદ્ધઃ કશ્યપશ્ચ પ્રજાપતિઃ ॥
વસુદેવસુતાં પ્રાપ ચૈકાંશેન તુ તત્કલામ્

પુરા સ્વજાયાવિચ્છેદે દુર્વાસા મુનિપુઙ્ગવઃ॥
સંપ્રાપ રામઃ સીતાં ચ રાવણેન હૃતાં પુરા

પુરા નલશ્ચ સંપ્રાપ દમયન્તીં યતઃ સતીમ્ ॥
શઙ્ખચૂડો મહાવીરો દૈત્યાનામીશ્વરો યતઃ

વૃષો વહતિ માં દુર્ગે યતો હિ ગરુડો હરિમ્ ॥
એવં સંપ્રાપ સંસિદ્ધિં સિદ્ધાશ્ચ મુનયઃ પુરા

યદ્ધૃત્વા ચ મહાલક્ષ્મીઃ પ્રદાત્રી સર્વસમ્પદામ્ ॥
સરસ્વતી સતાં શ્રેષ્ઠા યતઃ ક્રીડાવતી રતિઃ

સાવિત્રી વેદમાતા ચ યતઃ સિદ્ધિમવાપ્નુયાત્॥
સિન્ધુકન્યા મર્ત્યલક્ષ્મીર્યતો વિષ્ણુમવાપ સા

યદ્ધૃત્વા તુલસી પૂતા ગઙ્ગા ભુવનપાવની ॥
યદ્ધૃત્વા સર્વસસ્યાઢ્યા સર્વાધારા વસુન્ધરા

યદ્ધૃત્વા મનસાદેવી સિદ્ધા વૈ વિશ્વપૂજિતા ॥
યદ્ધૃત્વા દેવમાતા ચ વિષ્ણું પુત્રમવાપ સા

પતિવ્રતા ચ યદ્ધૃત્વા લોપામુદ્રાઽપ્યરુન્ધતી ॥
લેભે ચ કપિલં પુત્રં દેવહૂતી યતઃ સતી

પ્રિયવ્રતોત્તાનપાદૌ સુતૌ પ્રાપ ચ તત્પ્રસૂઃ ॥
ત્વન્માતા ચાપિ સંપ્રાપ ત્વાં દેવીં ગિરિજાં યતઃ

એવં સર્વે સિદ્ધગણાઃ સર્વૈશ્વર્ય્યમવાપ્નુયુઃ ॥
શ્રીજગન્મઙ્ગલસ્યાસ્ય કવચસ્ય પ્રજાપતિઃ

ઋષિચ્છન્દોઽસ્ય ગાયત્રી દેવી રાસેશ્વરી સ્વયમ્ ॥
શ્રીકૃષ્ણભક્તિ સંપ્રાપ્તૌ વિનિયોગઃ પ્રકીર્ત્તિતઃ

શિષ્યાય કૃષ્ણભક્તાય બ્રાહ્મણાય પ્રકાશયેત્ ॥
શઠાય પરશિષ્યાય દત્ત્વા મૃત્યુમવાપ્નુયાત્

રાજ્યં દેયં શિરો દેયં ન દેયં કવચં પ્રિયે ॥
કણ્ઠે ધૃતમિદં ભક્ત્યા કૃષ્ણેન પરમાત્મના

મયા દૃષ્ટં ચ ગોલોકે બ્રહ્મણા વિષ્ણુના પુરા ॥
ૐ રાધેતિ ચતુર્થ્યન્તં વહ્નિજાયાન્તમેવ ચ

કૃષ્ણેનોપાસિતો મન્ત્રઃ કલ્પવૃક્ષઃ શિરોઽવતુ ॥
ૐ હ્રીં શ્રીં રાધિકાં ઙેન્તં વહ્નિજાયાન્તમેવ ચ

કપાલં નેત્રયુગ્મં ચ શ્રોત્ર યુગ્મં સદાઽવતુ ॥
ૐ એં હ્રીં શ્રીં રાધિકાયૈ વહ્નિજાયાન્તમેવ ચ

મસ્તકં કેશસંઘાંશ્ચ મન્ત્રરાજઃ સદાઽવતુ ॥
ઓં રાં રાધાચતુર્થ્યન્તં વહ્નિજાયાન્તમેવ ચ

સર્વસિદ્ધિપ્રદઃ પાતુ કપોલં નાસિકાં મુખમ્ ॥
ક્લીં શ્રીકૃષ્ણપ્રિયા ઙેન્તં કણ્ઠં પાતુ નમોઽન્તકમ્

ઓં રાં રાસેશ્વરીં ઙેન્તં સ્કંધં પાતુ નમોઽન્તકમ્ ॥
ઓં રાં રાસવિલાસિન્યૈ સ્વાહા પૃષ્ઠં સદાઽવતુ

વૃન્દાવનવિલાસિન્યૈ સ્વાહા વક્ષઃ સદાઽવતુ ॥
તુલસીવનવાસિન્યૈ સ્વાહા પાતુ નિતમ્બકમ્

કૃષ્ણપ્રાણાધિકા ઙેન્તં સ્વાહાન્તં પ્રણવાદિકમ્ ॥
પાદયુગ્મં ચ સર્વાઙ્ગં સન્તતં પાતુ સર્વતઃ

પ્રાચ્યાં રક્ષતુ સા રાધા વહ્નૌ કૃષ્ણપ્રિયાઽવતુ ॥
દક્ષે રાસેશ્વરી પાતુ ગોપીશા નૈરૃતેઽવતુ

પશ્ચિમે નિર્ગુણા પાતુ વાયવ્યે કૃષ્ણપૂજિતા ॥
ઉત્તરે સન્તતં પાતુ મૂલપ્રકૃતિરીશ્વરી

સર્વેશ્વરી સદૈશાન્યાં પાતુ માં સર્વપૂજિતા ॥
જલે સ્થલે ચાન્તરિક્ષે સ્વપ્ને જાગરણે તથા

મહાવિષ્ણોશ્ચ જનની સર્વતઃ પાતુ સન્તતમ્ ॥
કવચં કથિતં દુર્ગે શ્રીજગન્મઙ્ગલં પરમ્

યસ્મૈ કસ્મૈ ન દાતવ્યં ગુહ્યાદ્ગુહ્યતરં પરમ્ ॥
તવ સ્નેહાન્મયાઽઽ ખ્યાતં પ્રવક્તવ્યં ન કસ્યચિત્

ગુરુમભ્યર્ચ્ય વિધિવદ્વસ્ત્રાલઙ્કારચન્દનૈઃ॥
કણ્ઠે વા દક્ષિણે બાહૌ ધૃત્વા વિષ્ણુસમો ભવેત્

શતલક્ષજપેનૈવ સિદ્ધં ચ કવચં ભવેત્ ॥
યદિ સ્યાત્સિદ્ધકવચો ન દગ્ધો વહ્નિના ભવેત્

એતસ્માત્કવચાદ્દુર્ગે રાજા દુર્ય્યોધનઃ પુરા ॥
વિશારદો જલસ્તમ્ભં વહ્નિસ્તમ્ભં ચ નિશ્ચિતમ્

મયા સનત્કુમારાય પુરા દત્તં ચ પુષ્કરે॥
સૂર્ય્યપર્વણિ મેરૌ ચ સ સાન્દીપનયે દદૌ

બલ્લાય તેન દત્તં ચ દદૌ દુર્ય્યોધનાય સઃ॥
કવચસ્ય પ્રસાદેન જીવન્મુક્તો ભવેન્નરઃ

નિત્યં પઠતિ ભક્ત્યેદં તન્મન્ત્રોપાસકશ્ચ યઃ॥
વિષ્ણુતુલ્યો ભવેન્નિત્યં રાજસૂયફલં લભેત્

સ્નાનેન સર્વતીર્થાનાં સર્વદાનેન યત્ફલમ્॥
સર્વવ્રતોપવાસેન પૃથિવ્યાશ્ચ પ્રદક્ષિણૈઃ

સર્વયજ્ઞેષુ દીક્ષાયાં નિત્યં વૈ સત્યરક્ષણે ॥
નિત્યં શ્રીકૃષ્ણસેવાયાં કૃષ્ણનૈવેદ્યભક્ષણે ॥

પાઠે ચતુર્ણાં વેદાનાં યત્ફલં ચ લભેન્નરઃ ॥
તત્ફલં લભતે નૂનં પઠનાત્કવચસ્ય ચ

રાજદ્વારે શ્મશાને ચ સિંહવ્યાઘ્રાન્વિતે વને ॥
દાવાગ્નૌ સંકટે ચૈવ દસ્યુચૌરાન્વિતે ભયે

કારાગારે વિપદ્ગ્રસ્તે ઘોરે ચ દૃઢબન્ધને ॥
વ્યાધિયુક્તો ભવેન્મુક્તો ધારણાત્કવચસ્ય ચ

ઇત્યેતત્કથિતં દુર્ગે તવૈવેદં મહેશ્વરિ॥
ત્વમેવ સર્વરૂપા માં માયા પૃચ્છસિ માયયા

શ્રીનારાયણ ઉવાચ ॥
ઇત્યુક્ત્વા રાધિકાખ્યાનં સ્મારંસ્મારં ચ માધવમ્ ॥
પુલકાઙ્કિતસર્વાઙ્ગઃ સાશ્રુનેત્રો બભૂવ સઃ

ન કૃષ્ણસદૃશો દેવો ન ગઙ્ગાસદૃશી સરિત્ ॥
ન પુષ્કરાત્પરં તીર્થં ન વર્ણો બ્રાહ્મણાત્પરઃ

પરમાણોઃ પરં સૂક્ષ્મં મહાવિષ્ણોઃ પરો મહાન્ ॥
નભઃ પરં ચ વિસ્તીર્ણં યથા નાસ્ત્યેવ નારદ

યથા ન વૈષ્ણવાજ્જ્ઞાની યોગીન્દ્રઃ શઙ્કરાત્પરઃ ॥
કામક્રોધલોભમોહા જિતાસ્તેનૈવ નારદ

સ્વપ્ને જાગરણે શશ્વત્કૃષ્ણધ્યાનરતઃ શિવઃ ॥
યથા કૃષ્ણસ્તથા શમ્ભુર્ન ભેદો માધવેશયોઃ

યથા શમ્ભુર્વૈષ્ણવેષુ યથા દેવેષુ માધવઃ ॥
તથેદં કવચં વત્સ કવચેષુ પ્રશસ્તકમ્

શિશબ્દો મઙ્ગલાર્થશ્ચ વકારો દાતૃવાચકઃ ॥
મઙ્ગલાનાં પ્રદાતા યઃ સ શિવઃ પરિકીર્ત્તિતઃ

નરાણાં સન્તતં વિશ્વે શં કલ્યાણં કરોતિ યઃ ॥
કલ્યાણં મોક્ષ ઇત્યુક્તં સ એવં શઙ્કરઃ સ્મૃતઃ

બ્રહ્માદીનાં સુરાણાં ચ મુનીનાં વેદવાદિનામ્॥
તેષાં ચ મહતાં દેવો મહાદેવઃ પ્રકીર્તિતઃ

મહતી પૂજિતા વિશ્વે મૂલપ્રકૃતિરીશ્વરી। ॥
તસ્યા દેવઃ પૂજિતશ્ચ મહાદેવઃ સ ચ સ્મૃતઃ

વિશ્વસ્થાનાં ચ સર્વેષાં મહતામીશ્વરઃ સ્વયમ્ ॥
મહેશ્વરં ચ તેનેમં પ્રવદન્તિ મનીષિણઃ

હે બ્રહ્મપુત્ર ધન્યોઽસિ યદ્ગુરુશ્ચ મહેશ્વરઃ ॥
શ્રીકૃષ્ણ ભક્તિદાતા યો ભવાન્પૃચ્છતિ માં ચ કિમ્

ઇતિ શ્રીબ્રહ્મવૈવર્ત્તે મહાપુરાણે દ્વિતીયે પ્રકૃતિખણ્ડે નારદનારાયણસંવાદે રાધિકોપાખ્યાને તન્મન્ત્રાદિકથનં નામ ષટ્પઞ્ચાશત્તમોઽધ્યાય