બ્રહ્માંડ પુરાણ · અધ્યાય 3.26

ઇતિ શ્રીબ્રહ્માણ્ડમહાપુરાણે ઉત્તરભાગે હયગ્રીવાગસ્ત્યસંવાદે લલિતોપાખ્યાને વિષઙ્ગપલાયનં નામ પઞ્ચવિંશો ઽધ્યાય
પ્રથમયુદ્ધદિવસઃ ।
દશાક્ષૌહિણિકાયુક્તઃ કુટિલાક્ષો ઽપિ વીર્યવાન્ ।
દણ્ડનાથાશરૈસ્તીક્ષ્ણૈ રણે ભગ્નઃ પલાયિતઃ ।
દશાક્ષૌહિણિકં સૈન્યં તયા રાત્રૌ વિનાશિતમ્

ઇમં વૃત્તાન્તમાકર્ણ્ય ભણ્ડઃ ક્ષોભમથાયયૌ ।
રાત્રૌ કપટસંગ્રામં દુષ્ટાનાં નિર્જરદ્રુહામ્ ।
મન્ત્રિણી દણ્ડનાથા ચ શ્રુત્વા નિર્વેદમાપતુઃ

અહો બત મહત્કષ્ટં દૈત્યૈર્દેવ્યાઃ સમાગતમ્ ।
ઉત્તાનબુદ્ધિભિર્દૂરમસ્માભિશ્ચલિતં પુરઃ

મહાચક્રરથેન્દ્રસ્ય ન જાતં રક્ષણં બલૈઃ ।
એતં ત્વવસરં પ્રાપ્ય રાત્રૌ દુષ્ટૈઃ પરાકૃતમ્

કો વૃત્તાન્તો ઽભવત્તત્ર સ્વામિન્યા કિં રણઃ કૃતઃ ।
અન્યા વા શક્તયસ્તત્ર ચક્રુર્યુદ્ધં મહાસુરૈઃ

વિમ્રષ્ટવ્યમિદં કાર્યં પ્રવૃત્તિસ્તત્ર કીદૃશી ।
મહાદેવ્યાશ્ચ હૃદયે કઃ પ્રસંગઃ પ્રવર્તતે

ઇતિ શઙ્કાકુલાસ્તત્ર દણ્ડનાથાપુરોગમાઃ ।
મન્ત્રિણીં પુરતઃ કૃત્વા પ્રચેલુર્લલિતાં પ્રતિ

શક્તિચક્રચમૂનાથાઃ સર્વાસ્તાઃ પૂજિતા દ્રુતમ્ ।
વ્યતીતાયાં વિભાવર્યાં રથેન્દ્રં પર્યવારયન્

અવરુહ્ય સ્વયાનાભ્યાં મન્ત્રિણીદણ્ડનાયિકે ।
અધસ્તાત્સૈન્યમાવેશ્ય તદારુરુહતૂ રથમ્

ક્રમેણ નવ પર્વાણિ વ્યતીત્ય ત્વરિતક્રમૈઃ ।
તત્તત્સર્વગતૈઃ શક્તિચક્રૈઃ સમ્યઙ્ નિવેદિતૈઃ

અભજેતાં મહારાજ્ઞીં મન્ત્રિણીદણ્ડનાયિકે ।
તે વ્યજિજ્ઞપતાં દેવ્યા અષ્ટાઙ્ગસ્પૃષ્ટભૂતલે

મહાપ્રમાદઃ સમભૂદિતિ નઃ શ્રુતમંબિકે ।
કૂટયુદ્ધપ્રકારેણ દૈત્યૈરપકૃતં ખલૈઃ

સ દુરાત્મા દુરાચારઃ પ્રકાશસમારાત્ત્રસન્ ।
કુહકવ્યવહારેણ જયસિદ્ધિં તુ કાક્ષતિ

દૈવાન્નઃ સ્વામિનીગાત્રે દુષ્ટાનામમરદ્રુહામ્ ।
શરાદિકપરામર્શો ન જાતસ્તેન જીવતિ

એકાવલંબનં કૃત્વા મહારાજ્ઞિ ભવત્પદમ્ ।
વયં સર્વા હિ જીવામઃ સાધયામઃ સમીહિતમ્

અતો ઽસ્માભિઃ પ્રકર્તવ્યં શ્રીમત્યઙ્ગસ્ય રક્ષણમ્ ।
માયાવિનશ્ચ દૈત્યેન્દ્રાસ્તત્ર મન્ત્રો વિધીયતામ્

આપત્કાલેષુ જેતવ્યા ભણ્ડાદ્યા દાનવાધમાઃ ।
કૂટયુદ્ધં ન કુર્વન્તિ ન વિશન્તિ ચમૂમિમામ્

તથા મહેન્દ્રશૈલસ્ય કાર્યં દક્ષિણદેશતઃ ।
શિબિરં બહુવિસ્તારં યોજનાનાં શતાવધિ

વહ્લિપ્રાકારવલયં રક્ષણાર્થં વિધીયતામ્ ।
અસ્મત્સેનાનિવેશસ્ય દ્વિષાં દર્પશમાય ચ

શતયોજનમાત્રસ્તુ મધ્યતેશઃ પ્રકલ્પ્યતામ્ ।
વહ્નિપ્રાકારાચક્રસ્ય દ્વારન્દક્ષિણતો ભવેત્

યતો દક્ષિણદેશસ્થં શૂન્યકં વિદ્વિષાં પુરમ્ ।
દ્વારે ચ બહવઃ કલ્પ્યાઃ પરિવારા ઉદાયુધાઃ

નિર્ગચ્છતાં પ્રવિશતાં જનાનામુપરોધકાઃ ।
અનાલસ્યા અનિદ્રાશ્ચ વિધેયાઃ સતતોદ્યતાઃ

એવં ચ સતિ દુષ્ટાનાં કૂટયુદ્ધં ચિકીર્ષિતમ્ ।
અવેલાસુ ચ સંધ્યાસુ મધ્યરાત્રિષુ ચ દ્વિષામ્ ।
અશક્યમેવ ભવતિ પ્રૌઢમાક્રમણં હઠાત્

નો ચેદ્દુરાશયા દૈત્યા બહુમાયાપરિગ્રહાઃ ।
પશ્યતોહરવત્સર્વં વિલુઠન્તિ મહદ્બલમ્

મન્ત્રિણ્યા દણ્ડનાથાયા ઇતિ શ્રુત્વા વચસ્તદા ।
શુચિદન્તરુચા મુક્તા વહન્તી લલિતાબ્રવીત્

ભવતીનામયં મન્ત્રશ્ચારુબુદ્ધ્યા વિચારિતઃ ।
અયં કુશલધીમાર્ગોનીતિરેષા સનાતની

સ્વચક્રસ્ય પુરો રક્ષાં વિધાય દૃઢસાધનૈઃ ।
પરચક્રાક્રમઃ કાર્યો જિગીષદ્ભિર્મહાજનૈઃ

ઇત્યુક્ત્વા મન્ત્રિણીદણ્ડનાથે સા લલિતેશ્વરી ।
જ્વાલામાલિનિકાં નિત્યામાહૂયેદમુવાચ હ

વત્સે ત્વં વહ્નિરૂપાસિ જ્વાલામાલામયાકૃતિઃ ।
ત્વયા વિધીયતાં રક્ષા બલસ્યાસ્ય મહીયસઃ

શતયોજનવિસ્તારં પરિવૃત્ય મહીતલમ્ ।
ત્રિંશદ્યોજનમુન્નદ્ધં જ્વાલાકારત્વમાવ્રજ

દ્વારયોજનમાત્રં તુ મુક્ત્વાન્યત્ર જ્વલત્તનુઃ ।
વહ્નિજ્વાલાત્વમાપન્ના સંરક્ષ સકલં બલમ્

ઇત્યુક્ત્વા મન્ત્રિણીદણ્ડનાથે સા લલિતેશ્વરી ।
મહેન્દ્રોત્તરભૂભાગં ચલિતું ચક્ર ઉદ્યમમ્

સા ચ નિત્યાનિત્યમયી જ્વલજ્જ્વા લામયાકૃતિઃ ।
ચતુર્દશીતિથિમયી તથેતિ પ્રણનામ તામ્

તયૈવ પૂર્વનિર્દિષ્ટં મહેન્દ્રોત્તરભૂતલમ્ ।
કુણ્ડલીકૃત્ય જજ્વાલશાલરૂપેણ સા પુનઃ

નભોવલયજંબાલજ્વાલામાલામયાકૃતિઃ ।
બભાસે દણ્ડનાથાયા મન્ત્રિનાથચમૂરપિ

અન્યા સામપિ શક્તીનાં મહતીનાં મહદ્બલમ્ ।
વિશઙ્કટોદરં સાલં પ્રવિવેશ ગતક્લમા

રાજચક્રરથેન્દ્રં તુ મધ્યે સંસ્થાપ્ય દણ્ડિની ।
વામપક્ષે રથં સ્વીયં દક્ષિણે શ્યામલારથમ્

પશ્ચાદ્ભાગે સમ્પદેશીં પુરસ્તાશ્ચ હયાસનામ્ ।
એવં સંવેશ્ય પરિતશ્ચક્રરાજરથસ્ય ચ

દ્વારે નિવેશયામાસ વિંશત્યક્ષૌહિણીયુતામ્ ।
જ્વલદ્દણ્ડાયુધોદગ્રાં સ્તમ્ભિનીં નામ દેવતામ્

યા દેવી દણ્ડનાથાયા વિઘ્નદેવીતિ વિશ્રુતા ।
એવં સુરક્ષિતં કૃત્વા શિબિરં યોત્રિણી તથા ।
પૂષણ્યુદિતભૂયિષ્ઠે પુનર્યુદ્ધમુપાશ્રયત્

કૃત્વા કિલકિલારાવં તતઃ શક્તિમહાચમૂઃ ।
અગ્નિપ્રાકારકદ્વારાન્નિર્જગામ્ મહારવા

ઇત્થં સુરક્ષિતં શ્રુત્વા લલિતાશિબિરોદરમ્ ।
ભૂયઃ સંજ્વરમાપન્નઃ પ્રચણ્ડો ભણ્ડદાનવઃ

મન્ત્રયિત્વા પુનસ્તત્ર કુટિલાક્ષપુરોગમૈઃ ।
વિષઙ્ગેણ વિશુક્રેણાસમમાત્મસુતૈરપિ

એકૌઘસ્ય પ્રસારેણ યુદ્ધં કર્તું મહાબલઃ ।
ચતુર્બાહુમુખાન્પુત્રાંશ્ચતુર્જલધિસન્નિભાન્

ચતુરાન્યુદ્ધકૃત્યેષુ સમાહૂય સ દાનવઃ ।
પ્રેષયામાસ યુદ્ધાય ભણ્ડશ્ચણ્ડક્રુધા જ્વલન્

ત્રિંશત્સંખ્યાશ્ચ તત્પુત્રા મહાકાયા મહાબલાઃ ।
તેષાં નામાનિ વક્ષ્યામિ સમાકર્ણય કુમ્ભજ

ચતુર્બાહુશ્ચકોરાક્ષસ્તૃતીયસ્તુ ચતુઃ શિરાઃ ।
વજ્રઘોષશ્ચોર્ધ્વકેશો મહાકાયો મહાહનુઃ

મખશત્રુર્મખસ્કન્દીસિંહઘોષઃ સિરાલકઃ ।
લડુનઃ પટ્ટસેનશ્ચ પુરાજિત્પૂર્વમારકઃ

સ્વર્ગશત્રુઃ સ્વર્ગબલો દુર્ગાખ્યઃ સ્વર્ગકણ્ટકઃ ।
અતિમાયો બૃહન્માય ઉપમાયશ્ચ વીર્યવાન્

ઇત્યેતે દુર્મદાઃ પુત્રા ભણ્ડદૈત્યસ્ય દુર્દ્ધિયઃ ।
પિતુઃ સદૃશદોર્વીર્યાઃ પિતુઃ સદૃશવિગ્રહાઃ

આગત્ય ભણ્ડચરણાવભ્યવન્દત ભક્તિતઃ ।
તાનુદ્વીક્ષ્ય પ્રસન્નાભ્યાં લોચનાભ્યાં સ દાનવઃ ।
સગૌરવમિદં વાક્યં બભાષે કુલઘાતકઃ

ભો ભો મદીયાસ્તનયા ભવતાં કઃ સમો ભુવિ ।
ભવતામેવ સત્યેન જિતં વિશ્વં મયા પુરા

શક્રસ્યા ગ્નેર્યમસ્યાપિ નિરૃતેઃ પાશિનસ્તથા ।
કચેષુ કર્ષણં કોપાત્કૃતં યુષ્માભિરાહવે

અસ્ત્રાણ્યપિ ચ શસ્ત્રાણિ જાનીથ નિખિલાન્યપિ ।
જાગ્રત્સ્વેવ હી યુષ્માસુ કુલભ્રંશો ઽયમાગતઃ

માયાવિની દુલલિતા કાચિત્સ્ત્રી યુદ્ધદુર્મદા ।
બહુભિઃ સ્વસમાનાભિઃ સ્ત્રીભિર્યુક્તા હિનસ્તિ નઃ

તદેનાં સમરે ઽવશ્યમાત્મવશ્યાં વિધાસ્યથ ।
જીવગ્રાહં ચ સા ગ્રાહ્યા ભવદ્ભિર્જ્વલદાયુધૈઃ

અપ્રમેયપ્રકોપાન્ધાન્યુષ્માનેકાં સ્ત્રિયં પ્રતિ ।
સમ્પ્રેષણમનૌચિત્યં તથાપ્યેષ વિધેઃ ક્રમઃ

ઇમમેકં સહધ્વં ચ શૌર્યકીતિવિપર્યયમ્ ।
ઇત્યુક્ત્વા ભણ્ડદૈત્યેન્દ્રસ્તાન્પ્રહૈષીદ્રણં પ્રતિ ।
દ્વિશતં ચાક્ષૌહિણીનાં તત્સહાયતયાહિનોત્

દ્વિશત્યક્ષૌહિણીસેના મુખ્યસ્ય તિલકાયિતા ।
બદ્ધભ્રુકુટયઃ શસ્ત્રપાણયો નિર્યયુર્ગૃહાત્

નિર્ગમે ભણ્ડપુત્રાણાં ભૂઃ પ્રકમ્પમલમ્બત ।
ઉત્પાતા વિવિધા જાતા વિત્રસ્તં ચાભવજ્જગત્

તાન્કુમારાન્મહાસત્ત્વાંલ્લાજવર્ષૈરવાકિરન્ ।
વિથીષુ યાનૈશ્ચલિતાન્પૌરવૃદ્ધપુરન્ધ્રયઃ

બન્દિનો માગધાશ્ચૈવ કુમારાણાં સ્તુતિં વ્યધુઃ ।
મઙ્ગલારાર્તિકં ચક્રુર્દ્વારેદ્વારે પુરાઙ્ગનાઃ

ભિદ્યમાનેવ વસુધા કૃષ્યમાણમિવાબરમ્ ।
આસીત્તેષાં વિનિર્યાણે ઘૂર્ણમાન ઇવાર્ણવઃ

દ્વિશત્યક્ષૌહિણીસેનાં ગૃહીત્વા ભણ્ડસૂનવઃ ।
ક્રોધોદ્યદ્ભ્રુકુટીક્રૂરવદના નિર્યયુઃ પુરાત્

શક્તિસૈન્યાનિ સર્વાણિ ભક્ષયામઃ ક્ષણાદ્રણે ।
તેષામાયુધચક્રાણિ ચૂર્ણયામઃ શિતૈશરૈઃ

અગ્નિપ્રાકારવલયં શમયામશ્ચ રંહસા ।
દુર્વિદગ્ધાં તાં લલિતાં બન્દીકુર્મશ્ચ સર્વરમ્

ઇત્યન્યોન્યં પ્રવલ્ગન્તો વીરભાષણઘોષણૈઃ ।
આસેદુરગ્નિપ્રાકારસમીપં ભણ્ડસૂનવઃ

યૌવનેન મદેનાન્ધા ભૂયસા રુદ્ધદૃષ્ટયઃ ।
ભ્રુકુટીકુટિલાશ્ચક્રુઃ સિંહનાદંમહાત્તરમ્

વિદીર્ણમિવ તેનાસીદ્બ્રહ્માણ્ડ ચણ્ડિમસ્પૃશા ।
ઉત્પાતવારિદોત્સૃષ્ટઘોરનિર્ઘાતરંહસા

એતસ્યાનનુભૂતસ્ય મહાશબ્દસ્ય ડમ્બરઃ ।
ક્ષોભયામાસ શક્તીનાં શ્રવાંસિ ચ મનાંસિ ચ

આગત્ય તે કલકલં ચક્રુઃસાર્ધં સ્વસૈનિકૈઃ ।
વિવિધાયુધસમ્પાતમૂર્ચ્છદ્વૈમાનિકચ્છટમ્

ચતુર્બાહુમખાન્ભૂત્વા ભણ્ડદૈત્યકુમારકાન્ ।
આગતાન્યુદ્ધકૃત્યાય બાલા કૌતૂહલં દધે

કુમારી લલિતાદેવ્યાસ્તસ્યા નિકટવાસિની ।
સમસ્તશક્તિચક્રાણાં પૂજ્ય વિક્રમશાલિની

લલિતાસદૃશાકારા કુમારી કોપમાદધે ।
યા સદા નવવર્ષેવ સર્વવિદ્યામહાખનિઃ

બાલારુણતનુઃ શ્રોણીશોણવર્ણવપુર્લતા ।
મહારાજ્ઞી પાદપીઠે નિત્યમાહિતસંનિધિઃ

તસ્યા બહિશ્ચરાઃ પ્રાણા યા ચતુર્થં વિલોચનમ્ ।
તાનાગતાન્ભણ્ડસુતાન્સંહરિષ્યામિ સત્વરમ્

ઇતિ નિશ્ચિત્ય બાલાંબા મહારાજ્ઞ્યૈ વ્યજિજ્ઞપત્ ।
માતર્ભણ્ડમહાદૈત્યસૂનવો યોદ્ધુમાગતાઃ

તૈઃ સમં યોદ્ધુમિચ્છામિ કુમારિત્વાત્સકૌતુકા ।
સફુરન્તાવિવ મે બાહૂ યુદ્ધકણ્ડૂયયાનયા

ક્રીડા મમૈષા હન્તવ્યા ન ભવત્યા નિવારણૈઃ ।
અહં હિ વાલિકા નિત્યં ક્રીડનેષ્વનુરાગિણી

ક્ષણં રણક્રીડયા ચ પ્રીતિં યાસ્યામિ ચૈતસા ।
ઇતિ વિજ્ઞાપિતા દેવી પ્રત્યુવાચ કુમારિકામ્

વત્સે ત્વમતિમૃદ્વઙ્ગી નવવર્ષા નવક્રમા ।
નવીનયુદ્ધશિક્ષા ચ કુમારી ત્વં મમૈકિકા

ત્વાં વિના ક્ષણમાત્રં મે ન નિશ્વાસઃ પ્રવર્તતે ।
મમોચ્છ્વસિતમેવાસિ ન ત્વં યાહિ મહાહવમ્

દણ્ડિની મન્ત્રિણી ચૈવ શક્તયો ઽન્યાશ્ચ કોટિશઃ ।
સંત્યેવ સમરે કર્તું વત્સે ત્વં કિં પ્રમાદ્યસિ

ઇતિ શ્રીલલિતાદેવ્યા નિરુદ્ધાપિ કુમારિકા ।
કૌમારકૌતુકાવિષ્ટા પુનર્યુદ્ધમયાચત

સુદૃઢં નિશ્ચયં દૃષ્ટ્વા તસ્યાઃ શ્રીલલિતાંબિકા ।
અનુજ્ઞાં કૃતવત્યેવ ગાઢમાશ્લિષ્ય બાહુભિઃ

સ્વકીયકવચાદેકમાચ્છિદ્ય કવચં દદૌ ।
સ્વાયુધેભ્યશ્ચાયુધાનિ વિતીર્યવિસસર્જ તામ્

કર્ણીરથં મહારાજ્ઞ્યા ચાપદણ્ડાત્સમુદ્ધૃતમ્ ।
હંસયુગ્યશતૈર્યુક્તમારુરોહ કુમારિકા

તસ્યાં રણે પ્રવૃત્તાયાં સર્વપર્વસ્થદેવતાઃ ।
બદ્ધાઞ્જલિપુટા નેમુઃ પ્રધૃતાસિપરંપરાઃ

તાભિઃ પ્રણમ્યમાના સા ચક્રરાજરથોત્તમાત્ ।
અવરુહ્ય તલે સૈન્યં વર્તમાનમગાહત

તામાયાન્તીમથો દૃષ્ટ્વા કુમારીં કોપપાટલામ્ ।
મન્ત્રિણીદણ્ડનાથે ચ સભયે વાચમૂચતુઃ

કિં ભર્તૃદારિકે યુદ્ધે વ્યવસાયઃ કૃતસ્ત્વયા ।
અકાણ્ડે કિં મહારાજ્ઞ્યા પ્રેષિતાસિ રણં પ્રતિ

તદેતદુચિતંનૈવ વર્તમાને ઽપિ સૈનિકે ।
ત્વં મૂર્તં જીવિતમસિ શ્રીદેવ્યા બાલિકે યતઃ

નિવર્તસ્વ રણોત્સાહાત્પ્રણામસ્તે વિધીયતે ।
ઇતિ તાભ્યાં પ્રાર્થિતાપિ પ્રાચલદ્દૃઢનિશ્ચયા

અત્યન્તં વિસ્મયાવિષ્ટે મન્ત્રિણીદણ્ડનાયિકે ।
સહૈવ તસ્યા રક્ષાર્થં ચેલતુઃ પાર્શ્વયોર્દ્વયોઃ

અથાગ્નિવરણદ્વારા તાભ્યામનુગતા સતી ।
પ્રભૂતસેનાયુક્તાભ્યાં નિર્જગામ કુમારિકા

સનાથશક્તિસેનાનાં સર્વાસામનુગૃહ્ણતી ।
પ્રણામાઞ્જલિજાલાનિ કર્ણીરથકૃતાસના

ભણ્ડસ્ય તનયાન્દુષ્ટાનભ્યદ્રવદરિન્દમા ।
તસ્યાઃ પ્રાદેશિકં સૈન્યં કુમાર્યા ન હિ વિદ્યતે

સર્વં હિ લલિતાસૈન્યં તત્સૈન્યં સમજાયત ।
તતઃ પ્રવવૃતે યુદ્ધમત્યુદ્ધતાપરાક્રમમ્

વવર્ષ શરજાલાનિ દૈત્યેન્દ્રેષુ કુમારિકા ।
ભણ્ડાસુરકુમારૈસ્તૈર્મહારાજ્ઞીકુમારિકા ।
યદ્યુદ્ધમતનોત્તત્તુ સ્પૃહણીયં સુરાસુરૈઃ

અત્યન્તવિસ્મિતા દૈત્યકુમારા નવવર્ષિણીમ્ ।
કર્મીરથસ્થામાલોક્ય કિરન્તીંશરમણ્ડલમ્

ક્ષણેક્ષણે બાલિકયા ક્રિયમાણં મહારણમ્ ।
વ્યજિજ્ઞપન્મહારાજ્ઞ્યૈ ભ્રમન્ત્યઃ પરિચારિકાઃ

મન્ત્રિણીદણ્ડનાથે ચ ન તાં વિજહતૂ રણે ।
પ્રેક્ષકત્વ મનુપ્રાપ્તે તૃષ્ણીમેવ બભૂવતુઃ

સર્વેષાં દૈત્યપુત્રાણામેકરૂપા કુમારિકા ।
પ્રત્યેકભિન્ના દદૃશે બિંબમાલેવ ભાસ્વતઃ

સાયકૈરગ્નિચૂડાલૈસ્તેષાં મર્માણિ ભિન્દતી ।
રક્તોત્પલમિવ ક્રોધસંરક્તં બિભ્રતી મુખમ્

આશ્ચર્યં બ્રુવતો વ્યોમ્નિ પશ્યતાં ત્રિદિવૌકસામ્ ।
સાધુવાદૈર્બહુવિધૈર્મત્રિણીદણ્ડનાથયોઃ

અર્ચ્યમાના રણં ચક્રે લઘુહસ્તા કુમારિકા ।
દ્વિતીયં યુદ્ધદિવસં સમસ્તમપિ સા રણે

પ્રકાશયામાસ બલં લલિતાદુહિતા નિજમ્ ।
અસ્ત્રપ્રત્યસ્ત્રમોક્ષેણ તાન્સર્વાનપિ ભિન્દતી

નારાયણાસ્ત્રમોક્ષેણ મહરાજ્ઞીકુમારિકા ।
દ્વિશત્યક્ષૌહિણીસૈન્યં ભસ્મસાદકરોત્ક્ષણાત્

અક્ષૌહિણીનાં ક્ષયતઃ ક્ષણાત્કોપમુપાગતાઃ ।
આકૃષ્ટગુરુધન્વાનસ્તે ઽપતન્નેકહેલયા

તતઃ કલકલે જાતે શક્તીનાં ચ દિવૌકસામ્ ।
યુગપત્ત્રિંશતો બાણાનસૃજત્સા કુમારિકા

હસ્તલાઘવમાશ્રિત્ય મુક્તૈશ્ચન્દ્રાર્ધસાયકૈઃ ।
ત્રિંશતા ત્રિંશતો ભણ્ડપુત્રાણા સાહતં શિરઃ

ઇતિ ભણ્ડસ્ય પુત્રેષુ પ્રાપ્તેષુ યમસાદનમ્ ।
અત્યન્તવિસ્મયાવિષ્ટા વબૃષુઃ પુષ્પમભ્રગાઃ

સા ચ પુત્રી મહારાજ્ઞ્યાઃ વિધ્વસ્તાસુરમૈનિકા ।
મન્ત્રિણીદણ્ડનાથાભ્યામાલિઙ્ગ્યત ભૃશં મુદા

તસ્યાઃ પરાક્રમોન્મેષૈર્નૃત્યન્ત્યોજયદાયિભિઃ ।
શક્તયસ્તુમુલં ચક્રુઃ સાધુવાદૈર્જગત્ત્રયમ્

સર્વાશ્ચ શક્તિસેનાન્યો દણ્ડનાથાપુરઃસરાઃ ।
તદાશ્ચર્યં મહારાજ્ઞ્યૈ નિવેદયિતુમુદ્ગતાઃ

તાભિર્નિવેદ્યમાનાનિ સા દેવી લલિતાંબિકા ।
પુત્રીભુજાવદાનાનિ શ્રુત્વા પ્રીતિં સમાયયૌ

સમસ્તમપિ તચ્ચક્રં શક્તીનાં તત્પરાક્રમૈઃ ।
અદૃષ્ટપૂર્વૈર્દેવેષુ વિસ્મયસ્ય વશં ગતમ્