બ્રહ્માંડ પુરાણ · અધ્યાય 3.18

ઇતિ શ્રીબ્રહ્માણ્ડમહાપુરાણે ઉત્તરભાગે હયગ્રીવાગસ્ત્યસંવાદે લલિતોપાખ્યાને દણ્ડનાથાશ્યામલાસેનાયાત્રા નામ સપ્તદશો ઽધ્યાયઃ
અથ રાજનાયિકા શ્રિતાજ્વલિતાઙ્કુશા ફણિસમાનપાશભૃત્ ।
કલનિક્વણદ્વલયમૈક્ષ્વં ધનુર્દધતી પ્રદીપ્તકુસુમેષુપઞ્ચકા

ઉદયત્સહત્સ્રમહસા સહસ્રતો ઽપ્યતિપાટલં નિજવપુઃ પ્રભાઝરમ્ ।
કિરતી દિશાસુ વદનસ્ય કાન્તિભિઃ સૃજતીવ ચન્દ્રમયમભ્રમણ્ડલમ્

દશયોજનાયતિમાતા જગત્ત્રયીમભિવૃણ્વતા વિશદમૌક્તિકાત્મના ।
ધવલાતપત્રવલયેન ભાસુરા શશિમણ્ડલસ્ય સખિતામુપેયુષા

અભિવીજિતા ચ મણિકાન્તશોભિના વિજયાદિમુખ્યપરિચારિકાગણૈઃ ।
નવચન્દ્રિકાલહરિકાન્તિકન્દલીચતુરેણ ચામરચતુષ્ટયેન ચ

શક્ત્યૈકરાજ્યપદવીમભિસૂચયન્તી સામ્રાજ્યચિહ્નશતમણ્ડિતસૈન્યદેશા ।
સંગીતવાદ્યરચનાભિરથામરીણાં સંસ્તૂયમાનવિભવા વિશદપ્રકાશા

વાચામગોચરમગોચરમેવ બુદ્ધેરીદૃક્તયા ન કલનીયમનન્યતુલ્યમ્

ત્રૈલોક્યગર્ભપરિપૂરિતશક્તિચક્રસામ્રાજ્યસંપદભિમાનમભિસ્પૃશન્તી ।
આબદ્ધભક્તિવિપુલાઞ્જલિશેખરાણામારાદહંપ્રથમિકા કૃતસેવનાનામ્

બ્રહ્મેશવિષ્ણુવૃષમુખ્યસુરોત્તમાનાં વક્ત્રાણિવર્ષિતનુતીનિ કટાક્ષયન્તી ।
ઉદ્દીપ્તપુષ્પશરપઞ્ચકતઃ સમુત્થૈજ્યોતિર્મયં ત્રિભુવનં સહસા દધાના

વિદ્યુત્સમદ્યુતિભિરપ્સરસાં સમૂહૈર્વિક્ષિપ્યમાણજયમઙ્ગલલાજવર્ષા ।
કામેશ્વરીપ્રભૃતિભિઃ કમનીયભાભિઃ સંગ્રામવેષરચનાસુમનોહરાભિઃ

દીપ્તાયુધદ્યુતિતિરસ્કૃત ભાસ્કરાભિર્નિત્યાભિરઙ્ઘ્રિસવિધે સમુપાક્યમાના ।
શ્રીચક્રનામતિલકં દશયોજનાતિતુઙ્ગધ્વજોલ્લિખિતમેઘકદંબમુચ્ચૈઃ

તીવ્રાભિરાવણસુશક્તિપરંપરભિર્યુક્તં રથં સમરકર્મણિ ચાલયન્તી ।
પ્રોદ્યત્પિશઙ્ગરુચિભાગમલાંશુકેન વીતામનોહરરુચિસ્સમરે વ્યભાસીત્

પઞ્ચાધિકૈર્વિશતિનામરત્નૈઃ પ્રપઞ્ચપાપપ્રશમાતિદક્ષૈઃ ।
સંસ્તૂયમાના લલિતા મરુદ્ભિઃ સંગ્રામમુદ્દિશ્ય સમુચ્ચચાલ

અગસ્ત્ય ઉવાચ
વીજિવક્ત્ર મહાબુદ્ધે પઞ્ચવિંશતિનામભિઃ ।
લલિતાપરમેશાન્યા દેહિ કર્ણરસાયનમ્

હયગ્રીવ ઉવાચ
સિંહાસના શ્રીલલિતા મહારાજ્ઞી પરાઙ્કુશા ।
ચાપિની ત્રિપુરા ચૈવ મહાત્રિપુરસુન્દરી

સુન્દરી ચક્રનાથા ચ સામ્રાજી ચક્રિણી તથા ।
ચક્રેશ્વરી મહાદેવી કામેશી પરમેશ્વરી

કામરાજપ્રિયા કામકોટિગા ચક્રવર્તિની ।
મહાવિદ્યા શિવાનઙ્ગવલ્લભા સર્વપાટલા

કુલનાથામ્નાયનાથા સર્વામ્નાયનિવાસિની ।
શૃઙ્ગારનાયિકા ચેતિ પઞ્ચવિંશતિનામભિઃ

સ્તુવન્તિ યે મહાભાગાં લલિતાં પરમેશ્વરીમ્ ।
તે પ્રાપ્નુવન્તિ સૌભાગ્યમષ્ટૌ સિદ્ધીર્મહદ્યશઃ

ઇત્થં પ્રચણ્ડસંરંભં ચાલયન્તી મહદ્બલમ્ ।
ભણ્ડાસુરં પ્રતિ ક્રુદ્ધા ચચાલ લલિતાંબિકા