બ્રહ્માંડ પુરાણ · અધ્યાય 3.16

ઇતિ શ્રીબ્રહ્માણ્ડમહાપુરાણે ઉત્તરભાગે હયગ્રીવાગસ્ત્યસંવાદે લલિતોપાખ્યાને વૈવાહિકોત્સવો નામ પઞ્ચદશો ઽધ્યાયઃ
અથ સા જગતાં માતા લલિતા પરમેશ્વરી ।
ત્રૈલોક્યકણ્ટકં ભણ્ડં દૈત્યં જેતું વિનિર્યયૌ

ચકાર મર્દલાકારાનંભોરાશીંસ્તુ સપ્ત તે ।
પ્રભૂતમર્દ્દલધ્વાનૈઃ પૂરયામાસુરંબરમ્

મૃદઙ્ગમુરજાશ્ચૈવ પટહો ઽતુકુલીઙ્ગણાઃ ।
સેલુકાઝલ્લરીરાઙ્ઘાહુહુકાહુણ્ડુકાઘટાઃ

આનકાઃ પણવાશ્ચૈવ ગોમુખાશ્ચાર્ધચન્દ્રિકાઃ ।
યવમધ્યા મુષ્ટિમધ્યા મર્દ્દલાડિણ્ડિમા અપિ

ઝર્ઝરાશ્ચ બરીતાશ્ચ ઇઙ્ગ્યાલિઙ્ગ્યપ્રભેદજાઃ ।
ઉદ્ધકાશ્ચૈતુહુણ્ડાશ્ચ નિઃસાણા બર્બરાઃ પરે

હુઙ્કારા કાકતુણ્ડાશ્ચ વાદ્યભેદાસ્તથાપરે ।
દધ્વનુઃ શક્તિસેનાભિરાહતાઃ સમરોદ્યમે

લલિતાપરમેશાન્યા અઙ્કુશાસ્ત્રાન્સમુદ્ગતા ।
સંપત્કરી નામ દેવી ચચાલ સહ શક્તિભિઃ

અનેકકોટિમાતઙ્ગતુરઙ્ગરથપઙ્ક્તિભિઃ ।
સેવિતા તરુણાદિત્યપાટલા સંપદીશ્વરી

મત્તમુદ્દણ્ડસંગ્રામરસિકં શૈલસન્નિભમ્ ।
રણકોલાહલં નામ સારુરોહ મતઙ્ગજમ્

તામન્વગા યયૌ સેના મહતી ધોરરાવિણી ।
લોલાભિઃ કેતુમાલાભિરુલ્લિખન્તી ધનાધનાત્

તસ્યાશ્ચ સંપન્નાથાયાઃ પીનસ્તનસુસંકટઃ ।
કણ્ટકો ઘનસંનાહો રુરુચે વક્ષસિસ્થિતઃ

કંપમાના ખડ્ગલતા વ્યરુચત્તત્કરે ધૃતા ।
કુટિલા કાલનાથસ્ય ભૃકુટીવ ભયઙ્કરા

ઉત્પાતવાતસંપાતાચ્ચલિતા ઇવ પર્વતાઃ ।
તામન્વગા યયુઃ કોટિસંખ્યાકાઃ કુઞ્જરોત્તમાઃ

અથ શ્રીલલિતાદેવ્યા શ્રીપાશાયુધસંભવા ।
અતિત્વરિતવિક્રાન્તિરશ્વારૂઢાચલત્પુરઃ

તયા સહ હયપ્રાયં સૈન્યં હેષાતરઙ્ગિતમ્ ।
વ્યચરત્ખુરકુદ્દાલવિદારિતમહીતલમ્

વનાયુજાશ્ચ કાંબોજાઃ પારદાઃ સિંધુદેશજાઃ ।
ટઙ્કણાઃ પર્વતીયાશ્ચ પારસીકાસ્તથા પરે

અજાનેયા ઘટ્ટધરા દરદાઃ કાલ વન્દિજાઃ ।
વાલ્મીકયાવનોદ્ભૂતા ગાન્ધર્વાશ્ચાથ યે હયાઃ

પ્રાગ્દેશજાતાઃ કૈરાતા પ્રાન્તદેશોદ્ભવાસ્તથા ।
વિનીતાઃ સાધુવોઢારો વેગિનઃ સ્થિરચેતસઃ

સ્વામિચિત્તવિશેષજ્ઞા મહાયુદ્ધસહિષ્ણવઃ ।
લક્ષણૈર્બહુભિર્યુક્તા જિતક્રોધા જિતશ્રમાઃ

પઞ્ચધારાસુ શક્ષઢ્યા વિનીતાશ્ચ પ્લવાન્વિતાઃ

ફલશુક્તિશ્રિયા યુક્તાઃ શ્વેતશુક્તિસમન્વિતાઃ ।
દેવપદ્મં દેવમણિં દેવસ્વસ્તિકમેવ ચ

અથ સ્વસ્તિકશુક્તિશ્ચ ગડુરં પુષ્પગણ્ડિકામ્ ।
એતાનિ શુભલક્ષ્માણિ જ્યરાજ્યપ્રદાનિ ચ ।
વહન્તો વાતજવના વાજિનસ્તાં સમન્વયુઃ

અપરાજિતનામાનમતિતેજસ્વિનં ચલમ્ ।
અત્યન્તોત્તુઙ્ગવર્ષ્માણં કવિકાવિલસન્મુખમ્

પાર્શ્વદ્વયે ઽપિ પતિતસ્ફુરત્કેસરમણ્ડલમ્ ।
સ્થૂલવાલધિવિક્ષેપક્ષિપ્યમાણપયોધરમ્

જઙ્ઘાકાણ્ડસમુન્નદ્ધમણિકિઙ્કિણિભાસુરમ્ ।
વાદયન્તમિવોચ્ચણ્ડૈઃ ખુરનિષ્ઠુરકુટ્ટનૈઃ

ભૂમણ્ડલમહાવાદ્યં વિજયસ્ય સમૃદ્ધયે ।
ઘોષમાણં પ્રતિ મુહુઃ સંદર્શિતગતિક્રમમ્

આલોલચામરવ્યાજાદ્વહન્તં પક્ષતી ઇવ ।
ભાણ્ડૈર્મનોહરૈર્યુક્તં ઘર્ઘરીજાલમણ્ડિતમ્

એષાં ઘોષસ્ય કપટાદ્ધુઙ્કુર્વતીમિ વાસુરાન્ ।
અશ્વારૂઢા મહાદેવી સમારૂઢા હયં યયૌ

ચતુર્ભિર્વાહુભિઃ પાશમઙ્કુશં વેત્રમેવ ચ ।
હયવલ્ગાં ચ દધતી બહુવિક્રમશોભિની

તરુણાદિત્યસઙ્કાશા જ્વલત્કાઞ્ચીતરઙ્ગિણી ।
સઞ્ચચાલ હયારૂઢા નર્તયન્તીવ વાજિનમ્

અથ શ્રીદણ્ડનાથાયા નિર્યાણપટહધ્વનિઃ ।
ઉદ્દણ્ડસિન્ધુનિસ્વાનશ્ચકાર બધિરં જગત્

વજ્રબાણૈઃ કઠોરૈશ્ચભિન્દન્ત્યઃ કકુભો દશ ।
અન્યુદ્ધતભુજાશ્માનઃ શક્તયઃ કાશ્ચિદુચ્છ્રિતાઃ

કાશ્ચિચ્છ્રીદણ્ડનાથાયાઃ સેનાનાસીરસઙ્ગતાઃ ।
ખડ્ગં ફલકમાદાય પુપ્લુવુશ્ચણ્ડસક્તયઃ

અત્યન્તસૈન્યસમ્બાધં વેત્રસંતાડનૈઃ શતૈઃ ।
નિવારયન્ત્યો વેત્રિણ્યો વ્યુચ્છલન્તિ સ્મશક્તયઃ

અથ તુઙ્ગધ્વજશ્રેણીર્મહિષાઙ્કા મૃગાઙ્કિકામ્ ।
સિહાઙ્કાશ્ચૈવ બિભ્રાણાઃ શક્તયો વ્યચલન્પુરા

તતઃ શ્રીદણ્ડનાથાયાઃ શ્વેતચ્છત્રં સહસ્રશઃ ।
સ્ફુરત્કરાઃ પ્રચલિતાઃ શક્તયઃ કાશ્ચિદાદદુઃ