બ્રહ્માંડ પુરાણ · અધ્યાય 3.14

ઇતિ શ્રીબ્રહ્માણ્ડમહાપુરાણે ઉત્તરભાગે હયગ્રીવાગસ્ત્યસંવાદે લલિતોપાખ્યાને લલિતાસ્તવરાજો નામ ત્રયોદશો ઽધ્યાયઃ
હયગ્રીવ ઉવાચ
એતસ્મિન્નેવ કાલે તુ બ્રહ્મા લોકપિતામહઃ ।
આજગામાથ દેવેશીં દ્રષ્ટુકામો મહર્ષિભિઃ

આજગામ તતો વિષ્ણુરારૂઢો વિનતાસુતમ્ ।
શિવો ઽપિ વૃષમારૂઢઃ સમાયાતો ઽખિલેશ્વરીમ્

દેવર્ષયો નારદાદ્યાઃ સમાજગ્મુર્મહેશ્વરીમ્ ।
આયયુસ્તાં મહાદેવીં સર્વે ચાપ્સરસાં ગણાઃ

વિશ્વાવસુપ્રભૃતયો ગન્ધર્વાશ્ચૈવ યક્ષકાઃ ।
બ્રહ્મણાથ સમાદિષ્ટો વિશ્વકર્મા વિશાંપતિઃ

ચકાર નગરં દિવ્યં યથામરપુરં તથા ।
તતો ભગવતી દુર્ગા સર્વમન્ત્રાધિદેવતા

વિદ્યાધિદેવતા શ્યામા સમાજગ્મતુરંબિકામ્ ।
બ્રાહયાદ્યા માતરશ્ચૈવ સ્વસ્વભૂતગણાવૃતાઃ

સિદ્ધયો હ્યણિમાદ્યાશ્ચ યોગિન્યશ્ચૈવ કોટિશઃ ।
ભૈરવાઃ ક્ષેત્રપાલાશ્ચ મહાશાસ્તા ગણાગ્રણીઃ

મહાગણેશ્વરઃ સ્કન્દો બટુકો વીરભદ્રકઃ ।
આગત્ય તે મહાદેવીં તુષ્ટુવુઃ પ્રણતાસ્તદા

તત્રાથ નગરીં રમ્યાં સાટ્ટપ્રાકારતોરણામ્ ।
ગજાશ્વરથશાલાઢ્યાં રાજવીથિવિરાજિતામ્

સામન્તાનામમાત્યાનાં સૈનિકાનાં દ્વિજન્મ નામ્ ।
વેતાલદાસદાસીનાં ગૃહાણિ રુચિરાણિ ચ

મધ્યં રાજગૃહં દિવ્યં દ્વારગોપુરભૂષિતમ્ ।
શાલાભિર્બહુભિર્યુક્તં સભા ભિરુષશોભિતમ્

સિંહાસનસભાં ચૈવ નવરત્નમયીં શુભામ્ ।
મધ્યે સિંહાસનં દિવ્યં ચિન્તામણિવીનિર્મિતમ્

સ્વયં પ્રકાશમદ્વન્દ્વમુદયાદિત્યસંનિભમ્ ।
વિલોક્ય ચિન્તયામાસ બ્રહ્મા લોકપિતામહઃ

યસ્ત્વેતત્સમધિષ્ઠાય વર્તતે બાલિશો ઽપિવા ।
પુરસ્યાસ્ય પ્રભાવેણ સર્વલોકાધિકો ભવેત્

ન કેવલા સ્ત્રી રાજ્યાર્હા પુરુષો ઽપિ તયા વિના ।
મઙ્ગલાચાર્યસંયુક્તં મહાપુરુષલક્ષણમ્ ।
અનુકૂલાઙ્ગનાયુક્તમભિષિઞ્ચેદિતિ શ્રુતિઃ

વિભાતીયં વરારોહા ભૂર્તા શૃઙ્ગારદેવતા ।
વરો ઽસ્યાસ્ત્રિષુ લોકેષુ ન ચાન્યઃ શઙ્કરાદૃતે

જડિલો મુણ્ડધારી ચ વિરૂપાક્ષઃ કપાલભૃત્ ।
કલ્માષી ભસ્મદિગ્ધાઙ્ગઃ શ્મશાનાસ્થિવિભૂષણઃ

અમઙ્ગલાસ્પદં ચૈનં વરયેત્સા સુમઙ્ગલા ।
ઇતિ ચિન્તયમાનસ્ય બ્રહ્મણો ઽગ્રે મહેશ્વરઃ

કોટિકન્દર્પલાવણ્યયુક્તો દિવ્ય શરીરવાન્ ।
દિવ્યાંબરધરઃ સ્રગ્વી દિવ્યગન્ધાનુલેપનઃ

કિરીટહારકેયૂરકુણ્ડલાદ્યૈરલઙ્કૃતઃ ।
પ્રાદુર્બભૂવ પુરતો જગન્મોહન રુપધૃક્

તં કુમારમથાલિઙ્ગ્ય બ્રહ્મા લોકપિતામહઃ ।
ચક્રે કામેશ્વરં નામ્ના કમનીયવપુર્ધરમ્

તસ્યાસ્તુ પરમાશક્તેરનુરૂપો વરસ્ત્વયમ્ ।
ઇતિ નિશ્ચિત્ય તેનૈવ સહિતાસ્તામથાયયુઃ

અસ્તુવંસ્તે પરાં શક્તિં બ્રહ્મવિષ્ણુમહેશ્વરાઃ ।
તાં દૃષ્ટ્વા મૃગશાવાક્ષીં કુમારો નીલલોહિતઃ ।
અભવન્મન્મથાવિષ્ટો વિસ્મૃત્ય સકલાઃ ક્રિયાઃ

સાપિ તં વીક્ષ્ય તન્વઙ્ગો મૂર્તિંમન્તમિવ સ્મરમ્ ।
મદનાવિષ્ટસર્વાઙ્ગી સ્વાત્મરૂપમમન્યત ।
અન્યોન્યાલોકનાસક્તૌ તાવૃભૌ મદનાતુરૌ

સર્વભાવવિશેષજ્ઞૌ ધૃતિમન્તૌ મનસ્વિનૌ ।
પરૈરજ્ઞાતચારિત્રૌ મુહૂર્તાસ્વસ્થચેતનૌ

અથોવાચ મહાદેવીં બ્રહ્મા લોકૈકનાયિકામ્ ।
ઇમે દેવાશ્ચ ઋષયો ગન્ધર્વાપ્સરસાં ગણાઃ ।
ત્વામીશાં દ્રષ્ટુમિચ્છન્તિ સપ્રિયાં પરમાહવે

કો વાનુરૂપસ્તે દેવિ પ્રિયો ધન્યતમઃ પુમાન્ ।
લોકસંરક્ષણાર્થાય ભજસ્વ પુરુષં પરમ્

રાજ્ઞી ભવ પુરસ્યાસ્ય સ્થિતા ભવ વરાસને ।
અભિષિક્તાં મહાભાગૈર્દેવાર્ષે ભિરકલ્મષૈઃ

સામ્રાજ્યચિહ્નસંયુક્તાં સર્વાભરણસંયુતામ્ ।
સપ્રિયામાસનગતાં દ્રષ્ટુમિચ્છામહે વયમ્