બ્રહ્માંડ પુરાણ · અધ્યાય 3.13

ઇતિ શ્રીબ્રહ્માણ્ડમહાપુરાણે ઉત્તરભાગે હયગ્રીવાગસ્ત્યસંવાદે લલિતોપાખ્યાને લલિતાપ્રાદુર્ભાવો નામ દ્વાદશો ઽધ્યાયઃ
દેવા ઊચુઃ
જય દેવિ જગન્માતર્જય દેવિ પરાત્પરે ।
જય કલ્યાણનિલયે જય કામકલાત્મિકે

જયકારિ ચ વામાક્ષિ જય કામાક્ષિ સુન્દરિ ।
જયાખિલસુરારાધ્યે જય કામેશિ માનદે

જય બ્રહ્મમયે દેવિ બ્રહ્માત્મકરસાત્મિકે ।
જય નારાયણિ પરે નન્દિતાશેષવિષ્ટપે

જય શ્રીકણ્ઠદયિતે જય શ્રીલલિતેંબિકે ।
જય શ્રીવિજયે દેવિ વિજય શ્રીસમૃદ્ધિદે

જાતસ્ય જાયમાનસ્ય ઇષ્ટાપૂર્તસ્ય હેતવે ।
નમસ્તસ્યૈ ત્રિજગતાં પાલયિત્ર્યૈ પરાત્પરે

કલામુહૂર્તકાષ્ઠાહર્ માસર્તુશરદાત્મને ।
નમઃ સહસ્રશીર્ષાયૈ સહસ્રમુખલોચને

નમઃ સહસ્રહસ્તાબ્જપાદપઙ્કજશોભિતે ।
અણોરણુતરે દેવિ મહતો ઽપિ મહીયસિ

પરાત્પરતરે માતસ્તેજસ્તેજીયસામપિ ।
અતલં તુ ભવેત્પાદૌ વિતલં જાનુની તવ

રસાતલં કટીદેશઃ કુક્ષિસ્તે ધરણી ભવેત્ ।
હૃદયં તુ ભુવર્લોકઃ સ્વસ્તે મુખમુદાહૃતમ્

દૃશશ્ચન્દ્રાર્કદહના દિશસ્તે બાહવોંબિકે ।
મરુતસ્તુ તવોચ્છ્વાસા વાચસ્તે શ્રુતયો ઽખિલાઃ

ક્રીડા તે લોકરચના સખા તે ચિન્મયઃ શિવઃ ।
આહારસ્તે સદાનન્દો વાસસ્તે હૃદયે સતામ્

દૃશ્યાદૃશ્ય સ્વરૂપાણિ રૂપાણિ ભુવનાનિ તે ।
શિરોરુહા ઘનાસ્તે તુ તારકાઃ કુસુમાનિ તે

ધર્માદ્યા બાહવસ્તે સ્યુરધર્માદ્યાયુધાનિ તે ।
યમાશ્ચ નિયમાશ્ચૈવ કરપાદરુહાસ્તથા

સ્તનૌ સ્વાહાસ્વધાકરૌ લોકોજ્જીવનકારકૌ ।
પ્રાણાયામસ્તુ તે નાસા રસના તે સરસ્વતી

પ્રત્યાહારસ્ત્વિદ્રિંયાણિ ધ્યાનં તે ધીસ્તુ સત્તમા ।
મનસ્તે ધારણાશક્તિર્હૃદયં તે સમાધિકઃ

મહીરુહાસ્તેઙ્ગરુહાઃ પ્રભાતં વસનં તવ ।
ભૂતં ભવ્યં ભવિષ્યચ્ચ નિત્યં ચ તવ વિગ્રહઃ

યજ્ઞરૂપા જગદ્ધાત્રી વિશ્વરૂપા ચ પાવની ।
આદૌ યા તુ દયાભૂતા સસર્જ નિખિલાઃ પ્રજાઃ

હૃદયસ્થાપિ લોકાનામદૃશ્યા મોહનાત્મિકા

નામરૂપવિભાગં ચ યા કરોતિ સ્વલીલયા ।
તાન્યધિષ્ઠાય તિષ્ઠન્તી તેષ્વસક્તાર્થકામદા ।
નમસ્તસ્યૈ મહાદેવ્યૈ સર્વશક્ત્યૈ નમોનમઃ

યદાજ્ઞયા પ્રવર્તન્તે વહ્નિસૂર્યૈદુમારુતાઃ ।
પૃથિવ્યાદીનિ ભૂતાનિ તસ્યૈ દેવ્યૈ નમોનમઃ

યા સસર્જાદિધાતારં સર્ગાદાવાદિભૂરિદમ્ ।
દધાર સ્વયમેવૈકા તસ્યૈ દેવ્યૈ નમોનમઃ

યથા ધૃતા તુ ધરિણી યયાકાશમમેયયા ।
યસ્યામુદેતિ સવિતા તસ્યૈ દેવ્યૈ નમોનમઃ

યત્રોદેતિ જગત્કૃત્સ્નં યત્ર તિષ્ઠતિ નિર્ભરમ્ ।
યત્રાન્તમેતિ કાલે તુ તસ્યૈ દેવ્યૈ નમોનમઃ

નમોનમસ્તે રજસે ભવાયૈ નમોનમઃ સાત્ત્વિકસંસ્થિતાયૈ ।
નમોનમસ્તે તમસે હરાયૈ નમોનમો નિર્ગુણતઃ શિવાયૈ

નમોનમસ્તે જગદેકમાત્રે નમોનમસ્તે જગદેકપિત્રે ।
નમોનમસ્તે ઽખિલરૂપતન્ત્રે નમોનમસ્તે ઽખિલયન્ત્રરૂપે

નમોનમો લોકગુરુપ્રધાને નમોનમસ્તે ઽખિલવાગ્વિભૂત્યૈ ।
નમો ઽસ્તુ લક્ષ્મ્યૈ જગદેકતુષ્ટ્યૈ નમોનમઃ શાંભવિ સર્વશક્ત્યૈ

અનાદિમધ્યાન્તમપાઞ્ચભૌતિકં હ્યવાઙ્મનોગમ્યમતર્ક્યવૈભવમ્ ।
અરૂપમદ્વન્દ્વમદૃષ્ટગોચરં પ્રભાવમગ્ર્યં કથમંબ વર્ણયે

પ્રસીદ વિશ્વેશ્વરિ વિશ્વવન્દિતે પ્રસીદ વિદ્યેશ્વરિ વેદરૂપિણિ ।
પ્રસીદ માયામયિ મન્ત્રાવિગ્રહે પ્રસીદ સર્વેશ્વરિ સર્વરૂપિણિ

ઇતિ સ્તત્વા મહાદેવીં દેવાઃ સર્વે સવાસવાઃ ।
ભૂયોભૂયો નમસ્કૃત્ય શરણં જગમુરઞ્જસા

તતઃ પ્રસન્ના સા દેવી પ્રણતં વીક્ષ્ય વાસવમ્ ।
વરેણ ચ્છન્દયામાસ વરદાખિલદેહિનામ્

ઇન્દ્ર ઉવાચ
યદિ તુષ્ટાસિ કર્યાણિ વરં દૈત્યેન્દ્ર પીડિતઃ ।
દુર્ધરં જીવિતં દેહિ ત્વાં ગતાઃ શરણાર્થિનઃ

શ્રીદેવ્યુવાચ
અહમેવ વિનિર્જિત્ય ભણ્ડં દૈત્યકુલોદ્ભવમ્ ।
અચિરાત્તવ દાસ્યામિ ત્રૈલોક્યં સચરાચરમ્

નિર્ભયા મુદિતાઃ સન્તુ સર્વે દેવગણાસ્તથા ।
યે સ્તોષ્યન્તિ ચ માં ભક્ત્યા સ્તવેનાનેન માનવાઃ

ભાજનં તે ભવિષ્યન્તિ ધર્મશ્રીયશસાં સદા ।
વિદ્યાવિનયસંપન્ના નીરોગા દીર્ઘજીવિનઃ

પુત્રમિત્રકલ ત્રાઢ્યા ભવન્તુ મદનુગ્રહાત્ ।
ઇતિ લબ્ધવરા દેવા દેવેન્દ્રો ઽપિ મહાબલઃ

આમોદં પરમં જગ્મુસ્તાં વિલોક્ય મુહુર્મુહુઃ