બ્રહ્માંડ પુરાણ · અધ્યાય 2.43

ઇતિ શ્રીબ્રહ્માણ્ડે મહાપુરાણે વાયુપ્રોક્તે મધ્યભાગે તૃતીય
ઉપોદ્ધાતપાદે ભાર્ગવચરિતે દ્વિચત્વારિંશત્તમો ઽધ્યાયઃ ॥ 42॥
વસિષ્ઠ ઉવાચ
એવં સુસ્નિગ્ધચિત્તેષુ તેષુ તિષ્ઠત્સુ ભૂપતે ।
ભવાન્યુત્સંગતો રામઃ સમુત્થાય કૃતાજલિઃ

તુષ્ટાવ પ્રયતો ભૂત્વા નિર્વિશેષ વિશેષવત્ ।
અદ્વયં દ્વૈતમાપન્નં નિર્ગુણં સગુણાત્મકમ્

રામ ઉવાચ
પ્રકૃતિવિકૃતિજાતં વિશ્વમેતદ્વિધાતું મમ કિયદનુભાતં વૈભવં તત્પ્રમાતુમ્ ।
અવિદિતતનુનામાભીષ્ટવસ્ત્વેકધામાભવદથ ભવ ભામા પાતુ માં પૂર્ણકામા

પ્રકટિતગુણાભાનં કાલસંખ્યાવિધાનં સકલભવનિદાનં કીર્ત્યતે યત્પ્રધાનમ્ ।
તદિહ નિખિલતાતઃ સંબભૂવોક્ષપાતઃ કૃતકૃતકનિપાતઃ પાતુ મામદ્ય માતઃ

દનુજકુલવિનાશીલેખપાતાવિનાશી પ્રથમકુલવિકાશી સર્વવિદ્યાપ્રકાશી ।
પ્રસભરચિતકાશી ભક્તદત્તાખિલાશીરવતુ વિજિતપાશી માંસદા ષણ્મુખાશી

હરનિકટ નિવાસી કૃષ્ણસેવાવિલાસી પ્રણતજનવિભાસી ગોપકન્યાપ્રહાસી ।
હરકૃતબહુમાનો ગોપિકેશૈકતાનો વિદિતબહુવિધાનો જાયતાં કીર્તિહા નૌ

પ્રભુનિયતમાના યો નુન્નભક્તાન્તરાયો ત્દૃતદુરિતનિકાયો જ્ઞાનદાતાપરાયોઃ ।
સકલગુણગરિષ્ઠો રાધિકાઙ્કેનિવિષ્ટો મમ કૃતમપરાધં ક્ષન્તુમર્હત્વગાધમ્

યા રાધા જગદુદ્ભવસ્થિતિલયેષ્વારાધ્યતે વા જનૈઃ શબ્દં બોધયતીશવક્ત્રંવિગલત્પ્રેમામૃતાસ્વાદનમ્ ।
રાસેશી રસિકેશ્વરી રમણત્દૃન્નિષ્ઠાનિજાનન્દિની નેત્રી સા પરિપાતુ મામવનતં રાધેતિ ય કીર્ત્યતે

યસ્યા ગર્ભસમુદ્ભવો હ્યતિવિરાડ્યસ્યાંશભૂતો વિરાટ્ યન્નાભ્યંબુરુહોદ્ભવેન વિધિનૈકાન્તોપદિષ્ટેન વૈ સૃષ્ટં સર્વમિદં ચરાચરમયં વિશ્વં ચ યદ્રોમસુ બ્રહ્માણ્ડાનિ વિભાન્તિ તસ્ય જનની શશ્વત્પ્રસન્નાસ્તુ સા

પાયાદ્યઃ સ ચરાચરસ્ય જગતો વ્યાપી વિભુઃ સચ્ચિદાનન્દાબ્ધિઃ પ્રકટસ્થિતો વિલસતિ પ્રેમાન્ધયા રાધયા ।
કૃષ્ણઃ પૂર્ણતમો મમોપરિ દયાક્લિન્નાન્તરઃ સ્તાત્સદા યેનાહં સુકૃતી ભવામિ ચ ભવામ્યાનન્દલીનાન્તરઃ

વસિષ્ઠ ઉવાચ
સ્તુત્વૈવં જામદગ્ન્યસ્તુ વિરરામ હ તત્પરમ્ ।
વિજ્ઞાતાખિલતત્ત્વાર્થો હૃષ્ટરોમા કૃતાર્થવત્

અથોવાચ પ્રસન્નાત્મા કૃષ્ણઃ કમલલોચનઃ ।
ભાર્ગવં પ્રણતં ભક્ત્યા કૃપાપાત્રં પુરસ્થિતમ્

કૃષ્મ ઉવાચ
સિદ્ધો ઽસિ ભાર્ગવેન્દ્ર ત્વં પ્રસાદાન્મમ સંપ્રતમ્ ।
અદ્ય પ્રભૃતિ વત્સાસ્મિંલ્લોકે શ્રેષ્ઠતમો ભવ

તુભ્યં વરો મયા દત્તઃ પુરા વિષ્ણુપદાશ્રમે ।
તત્સર્વં ક્રમતો ભાવ્યં સમા બહ્વીસ્ત્વયા વિભો

દયા વિધેયા દીનેષુ શ્રેય ઉત્તમમિચ્છતા ।
યોગશ્ચ સાદનીયો વૈ શત્રૂણાં નિગ્રહસ્તથા

ત્વત્સમો નાસ્તિ લોકે ઽસ્મિંસ્તેજસા ચ બલેન ચ ।
જ્ઞાનેન યશસા વાપિ સર્વશ્રેષ્ઠતમો ભવાન્

અથ સ્વગૃહમાસાદ્ય પિત્રોઃ શુશ્રૂષણં કુરુ ।
તપશ્ચર યથાકાલં તેન સિદ્ધિઃ કરસ્થિતા

રાધોત્સંગાત્સમુત્થાપ્ય ગણેશં રાધિકેશ્વરઃ ।
આલિઙ્ગ્ય ગાઢં રાસેણ મૈત્રીં તસ્ય ચકાર હ

અથોભાવપિ સંપ્રીતૌ તદા રામગણેશ્વરૌ ।
કૃષ્ણાજ્ઞયા મહાભાગૌ બભૂવતુરરિન્દમ

એતસ્મિન્નન્તરે દેવી રાધા કૃષ્ણપ્રિયા સતી ।
ઉભાભ્યાં ચ વરં પ્રાદાત્પ્રસન્નાસ્યા મુદાન્વિતા

રાધોવાચ ।
સર્વસ્ય જગતો વન્દ્યૌ દુરાધર્ષૌં પ્રિયાવહૌ ।
મદ્ભક્તૌ ચ વિશેષેણ ભવન્તૌ ભવતાં સુતૌ

ભવતોર્નામ ચૌચ્ચાર્ય યત્કાર્યં યઃ સમારભેત્ ।
સિદ્ધિં પ્રયાતુ તતસર્વં મત્પ્રસાદાદ્ધિ તસ્ય તુ

અથોવાચ જગન્માતા ભવાની ભવવલ્લભા ।
વત્સ રામ પ્રસન્નાહં તુભ્યં કં પ્રદદે વરમ્ ।
તં પ્રબ્રૂહિ મહાભાગ ભયં ત્યક્ત્વા સુદૂરતઃ ।
રામ ઉવાચ
જન્માન્ત રસહસ્રેષુ યેષુયેષુ વ્રજામ્યહમ્

કૃષ્ણયોર્ભવયોર્ભક્તો ભવિષ્યામીતિ દેહિ મે ।
અભેદેન ચ પશ્યામિ કૃષ્ણૌ ચાપિ ભવૌ તથા

પાર્વત્યુવાચ
એવમસ્તુ મહાભાગ ભક્તો ઽસિ ભવકૃષ્ણયોઃ ।
ચિરઞ્જીવી ભવાશુ ત્વં પ્રસાદાન્મમ સુવ્રત

અથોવાચ ધરાધીશઃ પ્રસન્નસ્તમુમાપતિઃ ।
પ્રણતં ભાર્ગવેન્દ્રં તુ વરાર્હં જગદીશ્વરઃ

શિવ ઉવાચ
રામભક્તો ઽસિ મે વત્સ યસ્તે દત્તો વરો મયા ।
સ ભવિષ્યતિ કાર્ત્સ્યેન સત્યમુક્તં ન ચાન્યથા

અદ્યપ્રભૃતિ લોકે ઽસ્મિન્ ભવતો બલવત્તરઃ ।
ન કો ઽપિ ભવતાદ્વત્સ તેજસ્વી ચ ભવત્પરઃ

વસિષ્ઠ ઉવાચ
અથ કૃષ્ણો ઽપ્યનુજ્ઞાપ્ય શિવં ચ નગનન્દિનીમ્ ।
ગોલોકં પ્રયયૌ યુક્તઃ શ્રીદામ્ના ચાપિ રાધયા

અથ રામો ઽપિ ધર્માત્મા ભવાનીં ચ ભવં તથા ।
સંપૂજ્ય ચાભિવાદ્યાથ પ્રદક્ષિણમુપા ક્રમીત્

ગણેશં કાર્ત્તિકેયં ચ નત્વાપૃચ્છ્ય ચ ભૂપતે ।
અકૃતવ્રણસંયુક્તો નિશ્ચક્રામ ગૃહાન્તરાત્

નિષ્ક્રમ્યમાણો રામસ્તુ નન્દીશ્વરમુખૈર્ગણૈઃ ।
નમસ્કૃતો યયૌ રાજન્સ્વગૃહં પરયા મુદા