બ્રહ્માંડ પુરાણ · અધ્યાય 2.17

ઇતિ શ્રીબ્રહ્માણ્ડે મહાપુરાણે વાયુપ્રોક્તે મધ્યભાગે તૃતીય ઉપોદ્ધાતપાદે
શ્રાદ્ધકલ્પે દાનપ્રશંસા નામ ષોડશો ઽધ્યાયઃ ॥ 16॥
બૃહસ્પતિરુવાચ
અત ઊર્દ્ધ્વં પ્રવક્ષ્યામિ શ્રાદ્ધકર્મણિ પૂજિતમ્ ।
કામ્યં નૈમિત્તિકાજસ્રં શ્રાદ્ધકર્મણિ નિત્યશઃ

પુત્રદારનિમિત્તાઃ સ્યુરષ્ટકાસ્તિસ્ન એવ તુ ।
કૃષ્ણપક્ષે વરિષ્ઠા હિ પૂર્વાખણ્ડલદેવતા

પ્રાજાપત્યા દ્વિતીયા સ્યાત્તૃતીયા વૈશ્વદેવિકા ।
આદ્યાપૂપૈઃ સદાકાર્યા માંસૈરન્યા સદા ભવેત્

શાકૈઃ કાર્યા તૃતીયા સ્યાદેવં દ્રવ્યગતો વિધિઃ ।
અત્રાપીષ્ટં પિતૄણાં વૈ નિત્યમેવ વિધીયતે

યા ચાપ્યન્યા ચતુર્થી સ્યાત્તાં ચ કુર્યાદ્વિશેષતઃ ।
આસુ શ્રાદ્ધં બુધઃ કુર્વન્સર્વસ્વેનાપિ નિત્યશઃ

ક્ષિપ્રમાપ્નોતિ હિ શ્રેયઃ પરત્રેહ ચ મોદતે ।
પિતરઃ પર્વકાલેષુ તિથિકાલેષુ દેવતાઃ

સર્વેષુ પુરુષા યાન્તિ નિપાતમિવ ધેનવઃ ।
માસાંતે પ્રતિગચ્છેયુરષ્ટકાસુ હ્યપૂજિતાઃ

મોઘાસ્તસ્ય ભવન્ત્યાશાઃ પરત્રેહ ચ સર્વશઃ ।
પૂજકાનાં સમુત્કર્ષો નાસ્તિકાનામધોગતિઃ

દેવાસ્તુ દાયિનો યાન્તિ તિર્યગ્ગચ્છન્ત્યદાયિનઃ ।
પુષ્ટિં પ્રજાં સ્મૃતિં મેધાં પુત્રાનૈશ્વર્યમેવ ચ

કુર્વાણઃ પૂજનં ચાસુ સર્વં પૂર્ણં સમશ્નુતે ।
પ્રતિપદ્ધનલાભાય લબ્ધં ચાસ્ય ન નશ્યતિ

દ્વિતીયાયાં તુ યઃ કુર્યાદ્દ્વિપદાધિંપતિર્ ભવેત્ ।
વરાર્થિનાં તૃતીયા તુ શત્રુઘ્ની પાપનાશિની

ચતુર્થ્યાં તુ પ્રકુર્વાણઃ શત્રુચ્છિદ્રાણિ પશ્યતિ ।
પઞ્ચમ્યાં ચાપિકુર્વાણઃ પ્રાપ્નોતિ મહતીં શ્રિયમ્

ષષ્ઠ્યાં શ્રાદ્ધાનિ કુર્વાણઃ સંપૂજ્યઃ સ્યાત્પ્રયત્નતઃ ।
કુરુતે યસ્તુ સપ્તમ્યાં શ્રાદ્ધાનિ સતતં નરઃ

મહીશત્વમવાપ્નોતિ ગણાનાં ચાધિપો ભવેત્ ।
સંપૂર્ણામૃદ્ધિમાપ્નોતિ યો ઽષ્ટમ્યાં કુરુતે નરઃ

શ્રાદ્ધં નવમ્યાં કર્ત્તવ્યમૈશ્વર્યં સ્ત્રીશ્ચ કાઙ્ક્ષતા ।
કુર્વન્દશમ્યાં તુ નરો બ્રાહ્મીં શ્રિયમવાપ્નુયાત્

વેદાંશ્ચૈવાપ્નુયાત્સર્વાન્વિપ્રાણાં સમતાં વ્રજેત્ ।
એકાદશ્યાં પરં દાનમૈશ્વર્ય સતતં તથા

દ્વાદશ્યાં જયલાભં ચ રાજ્યમાયુર્વસૂનિ ચ ।
પ્રજાવૃદ્ધિં પશૂન્મેધાં સ્વાતન્ત્ર્યં પુષ્ટિમુત્તમામ્

દીર્ઘમાયુરથૈશ્વર્યં કુર્વાણસ્તુ ત્રયોદશીમ્ ।
યુવાનશ્ચ ગૃહે યસ્ય મૃતાસ્તેભ્યઃ પ્રદાપયેત્

શસ્ત્રેણ વા હતા યે ચ તેષાં દદ્યાચ્ચતુર્દશીમ્ ।
અમાવાસ્યાં પ્રયત્નેન શ્રાદ્ધં કુર્યાત્સદા શુચિઃ

સર્વકામાનવાપ્નોતિ સ્વર્ગં ચાનન્તમશ્નુતે ।
તથાવિષમજાતાનાં યમલાનાં ચ સર્વશઃ

શ્રાદ્ધં દદ્યાદમાવાસ્યાં સર્વકામાનવાપ્નુયાત્ ।
મઘાસુ કુર્વઞ્છ્રાદ્ધાનિ સર્વકામાનવાપ્નુયાત્

પ્રત્યક્ષમર્ચિતાસ્તેન ભવન્તિ પિતરસ્તદા ।
પિતૃદવા મઘા યસ્માત્તસ્માત્તાસ્વક્ષયં સ્મૃતમ્