બોધિસત્ત્વાવદાનકલ્પલતા · અધ્યાય 93

શ્લાઘ્યા જયન્તિ જિનભક્તિવિશેષભાજાં શ્રદ્ધાસુધાપ્રસરનિર્ઝરશીકરાસ્ તે ।
નિશ્ચેતનો ઽપ્ય્ ઉચિતચેતનતામ્ ઇવૈતિ યઃ પૂજ્યપૂજનવિધૌ કુસુમાદિવર્ગઃ

શ્રાવસ્ત્યાં વિજનાસીનં જિનં જેતવને પુરા ।
અનાથપિણ્ડદો ઽભ્યેત્ય ભગવન્તમ્ અભાષત

ત્વદ્ભક્તિર્ ઇવ સર્વત્ર મહાર્હગુણવિશ્રુતા ।
ભગવન્ પ્રૌઢિમ્ આયાતા કન્યા મમ સુમાગધા

શ્રીમતઃ સાર્થનાથસ્ય નગરે પુણ્ડ્રવર્ધને ।
સૂનુર્ વૃષભદત્તાખ્યસ્ તત્પાણિગ્રહમ્ ઇષ્યતે

કન્યાં દદામિ તાં તસ્મૈ ભગવન્ યદિ મન્યસે ।
ત્વદધીનધનપ્રાણસ્ ત્વદાજ્ઞાશરણો હ્ય્ અહમ્

ઇત્ય્ ઉક્તે તેન ભગવાન્ વાત્સલ્યવિમલાશયઃ ।
કો દોષસ્ તનયા તસ્મૈ દીયતામ્ ઇત્ય્ અભાષત

શાસ્તુઃ શાસનમ્ આદાય સાદરં પ્રનિપત્ય તમ્ ।
અનાથપિણ્ડદઃ શ્રીમાન્ પ્રયયૌ નિજમન્દિરમ્

તતઃ સુમાગધાં કન્યાં વિભવેન મહીયસા ।
અર્હાયં સ દદૌ તસ્મૈ ભૂરિરત્નામ્બરપ્રદઃ

દત્તા દૂરતરં દેશમ્ અથ યાન્તી સુમાગધા ।
ભગવચ્ચરણસ્મૃત્યા સબાષ્પનયનાભવત્

ચિરેણ સા સમાસાદ્ય નગરં પુણ્ડ્રવર્ધનમ્ ।
શુશ્રૂષાભિરતા પત્યુઃ સદા ભર્તૃગૃહે ઽવસત્

કદાચિદ્ અથ તાં શ્વશ્રૂર્ ભોજ્યસંભારકારિણી ।
ઉવાચ ધનવત્યાખ્યા સંખ્યાતીતવ્યયોદ્યતા

પૂજ્યોપકરણં સજ્જં કુરુ સર્વં સુમાગધે ।
ગૃહાન્ નઃ પ્રાતર્ આગન્તા જગત્પૂજ્યગુણો જિનઃ

ગુરવો ગૌરવપદં પૂજ્યાઃ સર્વજનસ્ય તે ।
સમેષ્યન્તિ ક્ષપણકાઃ સંમોહક્ષપણોદ્યતાઃ ॥ કવ્ક્_93.લ્3 ॥
ઇત્ય્ ઉક્તા સા તયા તત્ર બભૂવારમ્ભતત્પરા ।
જ્ઞાત્વા ભિક્ષુગણાયેવ તાં પૂજાં પરિકલ્પિતામ્

અથાપરે ઽહ્નિ વિવિશુર્ નગ્નાઃ ક્ષપણકા ગૃહમ્ ।
ઉલ્લુઞ્ચિતકચશ્મશ્રુસંક્લેશનિશિતવ્રતાઃ

તાન્ અલજ્જાન્ અવસનાન્ અવલોક્ય સુમાગધા ।
માષશષ્પાશનાભ્યાસપીવરાન્ મહિષાન્ ઇવ

લજ્જિતા વાસસાચ્છાદ્ય વદનં ગુરુસંનિધૌ ।
ખેદનિર્વેદવિનતા શ્વશ્રૂજનમ્ અભાષત

અહો વતાયમ્ આચારઃ સુચિરાદ્ અવલોકિતઃ ।
દિગમ્બરાણામ્ અપ્ય્ અગ્રે યદ્ ઇહાસ્તે વધૂજનઃ

એતે ભવદ્ગૃહે ઽદાન્તા ભુઞ્જન્તે શૃઙ્ગવર્જિતાઃ ।
અમાનુષત્વાન્ નૈતેષાં લજ્જન્તે નૂનમ્ અઙ્ગનાઃ

અસ્થાને ભવતાં ભક્તિઃ કો ઽયમ્ ઉચ્છૃઙ્ખલઃ ક્રમઃ ।
ન ત્યક્તમ્ અશનં યેન સ કથં વસ્ત્રમ્ ઉજ્ઝતિ

કેશોન્મૂલનકર્મણૈવ નિશિતં નૈર્ઘૃણ્યમ્ આવેદિતં
કૌપીનાંશુકવર્જનેન સુજને શીલસ્ય વાર્તૈવ કા ।
દમ્ભારમ્ભભયંકરે ચ વદને ક્રોધઃ સ્વયં લક્ષ્યતે
નગ્નાનામ્ અશનૈષિણાં નિયમિનામ્ એષાં પશૂનામ્ ઇવ

યત્રૈતે પશવઃ પૂજ્યાસ્ તત્રોત્સાર્યા ભવન્તિ કે ।
અથવા દેશદોષો ઽયં ગતાનુગતિકા સ્થિતિઃ

ઇતિ બ્રુવાણાં તાં શ્વશ્રૂર્ વિષણ્ણા પ્રત્યભાષત ।
પિતુસ્ તે ભવને ભદ્રે પૂજ્યતે વદ કીદૃશઃ

સાવદન્ મત્પિતુર્ ગેહે પૂજ્યતે ભગવાન્ જિનઃ ।
કારુણ્યાત્ સર્વજગતાં કુશલાતિશયોદ્યતઃ

ધ્યાનાધીનઃ સ્તિમિતનયનઃ પૂર્ણલાવણસિન્ધુર્
નાસાવંશં વિપુલસરલં સેતુભૂતં દધાનઃ ।
ભૂષાશૂન્યપ્રસૃતરુચિમત્કર્ણપાશાભિરામઃ
કાન્ત્યૈવાસૌ કિમ્ અપિ વિદુષાં શાન્તિમ્ અન્તસ્ તનોતિ

શિરસિ સહજપ્રાજ્યાલોકપ્રસેકમયં મણિં
કરિપતિકરાકારૌ બાહૂકવત્ કનકદ્યુતિઃ ।
કરતલગતામ્ લેખાં શઙ્ખધ્વજામ્બુજમાલિકાં
શમમયમહાસાંરાજ્યાર્હં બિભર્તિ સ લક્ષણમ્

તસ્યાભિલાષજનકસ્ય મહામુનીનાં સર્વાભિલાષકલનારહિતઃ સ્વભાવઃ ।
નિઃશેષિતસ્મૃતિભુવઃ પ્રમદાશ્રયસ્ય રાગોજ્ઝિતસ્ય સુતરામ્ અધરઃ સરાગઃ

મૂર્તિર્ નિર્ભરસંગમપ્રણયિની મૈત્રી મનઃશાયિની
ક્ષાન્તિસ્ તન્મયકારિણી હૃદિ દયા ગાઢં સમાશ્લેષિણી ।
સર્વાશાભરણસ્ય ભૂરિદયિતાસક્તસ્ય સંલક્ષ્યતે
તસ્યાપૂર્વમણેર્ અનન્યમહિમા વૈરાગ્યગર્ભઃ શમઃ

પૂજ્યઃ સ ભવને ઽસ્માકં યસ્ય પ્રવ્રજ્યયા સતામ્ ।
ધત્તે શીલદુકૂલાનામ્ નિરાવરણતાં મનઃ

વિશ્વરક્ષામણેર્ યસ્ય સ્મૃત્યાપિ ભવભોગિના ।
રાગદ્વેષોગ્રદંષ્ટ્રેણ બાધ્યતે ન પુનર્ જનઃ

ઇતિ તસ્યા વચઃ શ્વશ્રૂઃ શ્રુત્વા શ્રોત્રરસાયનમ્ ।
સદ્યઃ પ્રસાદવિશદા તાં જગાદ પ્રમોદિની

અપિ તદ્દર્શનોપાયઃ કશ્ચિદ્ અસ્તિ વરાનને ।
અપિ ત્વત્પુણ્યસંબન્ધાદ્ વયમ્ અપ્ય્ અમૃતાસ્પદમ્

ઇતિ સાનુનયં શ્વશ્ર્વા સા સાદરધિયાર્થિતા ।
તં વઃ સંદર્શયામીતિ બભાષે ભક્તિમાનિની

મહાપ્રતિજ્ઞાસંભારભરનિર્વહણૈષિણી ।
સા સંશયતુલારુઢા ક્ષણં ધ્યાનપરાભવત્

તતઃ પ્રાસાદમ્ આરુહ્ય ભગવત્સેવિતાં દિશમ્ ।
પ્રણિપત્યાસૃજત્ પૂજ્યપૂજાર્હકુસુમાઞ્જલિમ્

પુષ્પધૂપોદકૈર્ અર્ચાં સા કૃત્વા તત્પદોન્મુખી ।
આનન્દબાષ્પસંરુદ્ધવિસ્તીર્ણનયનાવદત્

અનુકમ્પ્યૈવ ભગવન્ રત્નત્રયવિવર્જિતા ।
તવાશ્રમમૃગીવાહં દૂરં દેશમ્ ઇમમ્ ગતા

ત્વત્પાદપદ્મયુગલં શરણમ્ પ્રપન્નાં દૂરસ્થિતામ્ અપિ દૃશા સ્પૃશ માં દયાલો ।
વાત્સલ્યપેશલધિયાં મહતાં પ્રવાસદુરીકૃતેષુ કરુણા ન તનુત્વમ્ એતિ

ભગવન્ દાસસુતયા ત્વં મયાદ્ય નિમન્ત્રિતઃ ।
પ્રાતર્ આગમનેનૈવ માનં વિતર મે વિભો

ઇત્ય્ ઉદીર્ય તયોત્સ્ર્ષ્ટા વિચિત્રકુસુમાવલી ।
સજીવિતેવ પ્રયયૌ નભસા ભક્તિદૂતિકા

સા શ્વેતરક્તહરિતાસિતપુષ્પપાલી ખે ધૂપધૂમશબલા શનકૈઃ પ્રયાન્તી ।
બાલામ્બુદપ્રણયિની સુચિરં ચકાશે સંચાલિચાપલતિકેવ શચીધવસ્ય

અથ જેતવનં પ્રાપ્ય ક્ષણેન કુસુમાવલી ।
સા ભક્તિશાલિની શાસ્તુઃ પપાત ચરણાબ્જયોઃ

ભગવાન્ અપિ સર્વજ્ઞઃ સર્વં જ્ઞાત્વા સમીહિતમ્ ।
સુમાગધાયાઃ કારુણ્યાદ્ આનન્દમ્ અવદત્ પુરઃ

પ્રાતર્ ગન્તવ્યમ્ અસ્માભિર્ નગરં પુણ્ડ્રવર્ધનમ્ ।
સુમાગધા પ્રાર્થયતે સસંઘસ્ય મમાર્ચનમ્

શતષષ્ટ્યધિકં તત્ર યોજનાનામ્ ઇતઃ પરમ્ ।
એકેનાહ્ના ચ ગન્તવ્યં ન વિલમ્બો ઽત્ર યુજ્યતે

વ્યોમ્ના મહર્દ્ધ્યા શક્નોતિ ગન્તું યો યઃ પ્રભાવવાન્ ।
નિમન્ત્રણશલાકાં ત્વં તસ્મૈ તસ્મૈ સમર્પય

પ્રેરિતઃ સુગતેનેતિ સ ભિક્ષુભ્યો ન્યવેદયત્ ।
એકાહગમનપ્રાપ્યં શલાકાભિર્ નિમન્ત્રણમ્

શલાકાસુ ગૃહીતાસુ તત્ર સર્વૈર્ મહર્દ્ધિભિઃ ।
પૂર્ણઃ કુમ્ભોપધાનીયઃ સ્થવિરો ઽપ્ય્ અગ્રહીત્ ક્રમાત્

તેન પ્રાપ્તપ્રભાવેન શલાકાયાં પ્રસારિતે ।
પાણૌ પ્રાહ તમ્ આનન્દઃ કિંચિત્ સ્મિતસિતાનનઃ

અનાથપિણ્ડદગૃહં ન ગન્તવ્યં પદદ્વયમ્ ।
સષષ્ટિયોજનશતં દિનાર્ધેનૈવ લઙ્ઘ્યતે

ઇત્ય્ ઉક્તઃ સ્થવિરસ્ તેન વૈલક્ષ્યવિનતાનનઃ ।
અચિન્તયત્ સ્વવર્ગાગ્રે ન્યૂનભાવો હિ દુઃસહઃ

અનાદિકાલોપચિતાઃ ક્લેશજન્મજરાદયઃ ।
હન્તું સપત્નૈઃ શક્યન્તે પ્રાપ્તુમ્ ઋદ્ધિપદં કિયત્

ઇતિ ચિન્તયતસ્ તસ્ય તીવ્રસંવેગયા ધિયા ।
પ્રાદુર્ આસીત્ ક્ષણેનૈવ મહર્દ્ધિઃ શુદ્ધચેતસઃ

અથ રાત્ર્યાં વ્યતીતાયાં પ્રભાતે સર્વભિક્ષવઃ ।
નાનાત્રિદશવેશેણ વિમાનૈર્ નભસા યયુઃ

અત્રાન્તરે મહારમ્ભસમ્ભારપરિપૂરિતે ।
સુમાગધા ભર્તૃગૃહે ભગવદ્દર્શનોત્સુકા

સહ પ્રાસાદમ્ આરુહ્ય શ્વશ્રૂશ્વશુરભર્તૃભિઃ ।
તસ્થૌ કુસુમધૂપાર્ધ્યારચનાસંગ્રહોન્મુખી

ભિક્ષુર્ આજ્ઞાતકૌણ્ડિન્યસ્ તતો ઽશ્વરથમ્ આસ્થિતઃ ।
દિવ્યર્દ્ધિવિવિધાશ્ચર્યઃ પ્રથમં પ્રત્યદૃશ્યત

તં દૃષ્ટ્વા સૂર્યસંકાશં વિસ્મિતાઃ શ્વશુરાદયઃ ।
ઊચુઃ સુમાગધાં પ્રીત્યા કિમ્ એષ ભગવાન્ ઇતિ

સાવદદ્ ભગવાન્ નાયં દૃશ્યતે તરણિપ્રભઃ ।
અયમ્ આજ્ઞાતકૌણ્ડિન્યો ભિક્ષુર્ અક્ષુણ્ણદીધિતિઃ

આપતત્સુ ક્રમેણાથ રથેષુ શ્વશુરાદયઃ ।
કિમ્ અયં કિમ્ અયં ભદ્રે ભગવાન્ ઇતિ તાં જગુઃ

સાબ્રવીન્ નૈવ શાસ્તાયમ્ એતે તચ્છાસનોચિતાઃ ।
ભિક્ષવઃ પ્રશમશ્લાઘ્યાસ્ તપોદીપ્તતરત્વિષઃ

યઃ કાન્તહેમદ્રુમરમ્યશૈલશ્ર્ઙ્ગાધિરૂઢઃ પરતો ઽભ્યુપૈતિ ।
આશ્ચર્યકૃન્ મૂર્ત ઇવ પ્રભાવઃ શ્રીમાન્ મહાકાશ્યપ એષ ભિક્ષુઃ

પઞ્ચાનનસ્યન્દનમ્ આસ્થિતો યઃ સતોયજીમૂતગભીરઘોષમ્ ।
વ્યોમ્ના સમભ્યેતિ ગુનૈઃ પ્રગીતઃ સ એષ ભિક્ષુર્ ભુવિ શારિપુત્રઃ

આરુહ્ય કૈલાસમ્ ઇવાતિશુભ્રં દ્વિપમ્ ચતુર્દન્તમ્ અનન્તકાન્તિઃ ।
આયાતિ યઃ પુણ્યવતાં જગત્સુ મૌદ્ગલ્યનામા ચ સ એષ ભિક્ષુઃ

વૈદૂર્યનાલં કનકારવિન્દમ્ આરુહ્ય રત્નાઙ્કુરકેશરાઢ્યમ્ ।
ઉપૈતિ યઃ સૌરભપૂરિતાશઃ સ એષ ભિક્ષુઃ પ્રથિતો ઽનિરુદ્ધઃ

યશ્ ચામ્બરાગ્રં ગરુડાધિરૂઢઃ પક્ષાનિલોત્સારિતવારિવાહઃ ।
વિગાહતે સ્ફિતવનેન ભિક્ષુર્ મૈત્રાયણીસૂનુર્ અયં સ પૂર્ણઃ

અનન્તમ્ આસ્થાય નિતાન્તશાન્તમ્ ઈર્ષ્યાપથં સત્ત્વમહોદધિર્ યઃ ।
પ્રભામૃતૈઃ સર્પતિ તર્પિતાશઃ પ્રભાવવાન્ એષ્યજિદ્ એષ ભિક્ષુઃ

વિલોલવલ્લીવલયાભિરામં વિશાલમ્ આરુહ્ય સુવર્ણતાલમ્ ।
યઃ પુણ્યપૂર્ણદ્યુતિર્ અભ્યુપૈતિ સ એષ ભિક્ષુર્ મતિમાન્ ઉપાલી

આરુહ્ય વૈડૂર્યવિમાનશૃઙ્ગં સુવર્ણરત્નોજ્જ્વલપત્રલેખમ્ ।
લિમ્પન્ન્ ઇવાગચ્છતિ યઃ પ્રભાભિઃ કાત્યાયનો નામ સ એષ ભિક્ષુઃ

શરીરિણં ધર્મમ્ ઇવાધિરુહ્ય વિગાહતે ખં વૃષવાહનો યઃ ।
પૃષ્ઠઃ પ્રતિષ્ઠાપરિનિષ્ઠિતાનાં ગરિષ્ઠધીઃ કૌષ્ઠિલ એષ ભિક્ષુઃ

વિમાનહંસદ્યુતિભિર્ મુહૂર્તં સ્મિતોર્મિરમ્યં મુહુર્ અન્તરીક્ષમ્ ।
કુર્વન્ સમભ્યેતિ તપોનિધિર્ યઃ પિલિન્દવત્સાહ્વય એષ ભિક્ષુઃ

યો ઽયં સમુત્ફુલ્લલતાવિતાનવનાન્તરાલે વિહરન્ન્ ઉપૈતિ ।
સ શ્રોણકોટિઃ શ્રુત એષ ભિક્ષુર્ અક્ષુણ્ણલક્ષ્મીર્ ગૃહનિર્વ્યપેક્ષઃ

યશ્ ચક્રવર્તી દિવિ ભાતિ સો ઽયં શાસ્તુઃ સુતો રાહુલકાભિધાનઃ ।
હેમપ્રભાભૂષિતદિગ્વિભાગઃ સંલક્ષ્યતે મેરુર્ ઇવાન્યરૂપઃ

એતે ગિરિભ્યો ઽથ દિગન્તરેભ્યઃ ક્ષ્મામણ્ડલાદ્ વ્યોમતટાન્તરાચ્ ચ ।
આયાન્ત્ય્ અસંખ્યાદ્ભુતભિક્ષુસંઘા વિચિત્રરત્નાસનવાહનસ્થાઃ

તયા ક્રમેણેતિ નિવેદ્યમાનં તે ભિક્ષુસંઘં વિમુખં વિલોક્ય ।
યયુઃ પ્રહર્ષાદ્ભુતસંભ્રમાણાં વિધેયતાં તુલ્યમ્ અનન્યલક્ષ્મ્યાઃ

અથ જ્વલત્કાઞ્ચનચૂર્ણવર્ણં જગદ્ બભૂવાર્કશતપ્રકાશમ્ ।
અશેષસંતાપવિશેષશાન્ત્યા શીતાંશુમાલાશતશીતલં ચ

અથ ધનપતિશક્રબ્રહ્મમુખ્યૈર્ અમર્ત્યૈર્ વિપુલગગનયાત્રાદત્તસેવાનુયાત્રઃ ।
અમરપુરપુરસ્ત્રીકીર્ણપુષ્પપ્રભાવાન્ નયનપથમ્ અયાસીત્ પુણ્યભાજાં જિનેન્દ્રઃ

અષ્ટાદશદ્વારપથા પુરં તત્ સ તુલ્યમ્ અષ્ટાદશમૂર્તિર્ એવ ।
પ્રવિશ્ય ચક્રે શશિકાન્તરત્નશિખામયં વેશ્મ સુમાગધાયાઃ

અભ્યર્ચિતસ્ તત્ર બહુપ્રકારૈઃ પૂર્ણોપચારૈઃ પ્રણિપત્ય સર્વૈઃ ।
અપૂજયત્ પૌરજનઃ સમન્તાદ્ બહિશ્ ચ ભિત્તિપ્રતિબિમ્બિતં તમ્

સુમાગધાયા દયયા દયાલુઃ પૂજાં ગૃહીત્વા ભગવાન્ સસંઘઃ ।
અનુગ્રહાલોકનસંવિભાગૈઃ સર્વાન્વવાયા વિદધે પ્રસાદમ્

સુમાગધા સશ્વશુરાદિવર્ગા સહાપરૈઃ પૌરજનૈશ્ ચ સર્વાઃ ।
શાસ્તુસ્ તયા દેશનયા બભૂવુઃ શુદ્ધાશયાસ્ તત્ક્ષણદૃષ્ટસત્યાઃ

સુમાગધાયાઃ કુશલાનુબન્ધં પુણ્યં પ્રભાવં વિપુલં વિલોક્ય ।
તે ભિક્ષવસ્ તત્ર કુતૂહલેન પપ્રચ્છૂ રમ્યં જિનમ્ આદિવૃત્તમ્

પૃષ્ટઃ સ તૈઃ સંસદિ સર્વદર્શી સુમાગધાયાઃ કુશલસ્ય હેતુમ્ ।
દન્તપ્રભાભિઃ કકુભાં મુખેષુ દિશન્ પ્રકાશમ્ ભગવાન્ બભાષે

વારાણસ્યામ્ અભૂત્ પૂર્વં કૃકેઃ કન્તસ્ય ભૂપતેઃ ।
સુતા કાઞ્ચનમાલાખ્યા કુચકાઞ્ચનમાલિકા

કાશ્યપાખ્યસ્ય શાસ્તુઃ સા સતતં ભક્તિશાલિની ।
પરિચર્યાં વ્યધાત્ સાર્ધં સખીનાં પઞ્ચભિઃ શતૈઃ

સ કદાચિન્ નરપતિર્ વિકૃતસ્વપ્નદર્શનાત્ ।
ભયસંશયસંભ્રાન્તઃ પપ્રચ્છ ફલકોવિદાન્

તે તં રાજસુતાદ્વેષાન્ નિમિત્તજ્ઞા બભાષિરે ।
અતિપ્રિયસ્ય હૃદયં હુત્વાગ્નૌ લભ્યતે શિવમ્

ઇતિ તેષામ્ અનાદૃત્ય વચઃ ક્રૂરતરં નૃપઃ ।
ભગવન્તં યયૌ દ્રષ્ટું કાશ્યપં દુહિતુર્ ગિરા

સ તમ્ એત્યાવદત્ સ્વપ્નઃ સવિકારઃ પરં મયા ।
દૃષ્ટો ઽદ્ય સર્વં સર્વજ્ઞ તત્ફલં વક્તુમ્ અર્હસિ

વાતાયનેન નિર્ગચ્છન્ રુદ્ધપુચ્છો મયા ગજઃ ।
તૃષિતસ્ય તથા પશ્ચાત્ કુપો ધાવન્ વિલોકિતઃ

તૃપ્તશ્ ચ શક્તુપ્રસ્થેન મૌક્તિપ્રસ્થવિક્રયઃ ।
સમીકૃતાનિ દૃષ્ટાનિ કુદારૂણિ ચ ચન્દનૈઃ

કલભેન મહાહસ્તી સમાહૂતસ્ તથાહવે ।
પરાન્ અશુચિલિપ્તાઙ્ગઃ પ્રલિમ્પન્ વિપ્લુતઃ કપિઃ

સ્ફીતરાજ્યામ્ અભિષિક્તશ્ ચ કુચાપલનિધિઃ કપિઃ ।
પટો ઽષ્ટાદશભિઃ કૃષ્ટઃ પુરુષૈર્ અપ્ય્ અસંક્ષયઃ

રમ્યપુષ્પફલારામશ્ ચૌરૈર્ અપિ વિલુણ્ઠિતઃ ।
દ્વેષોપહાસકલહાસક્તશ્ ચ વિપુલો જનઃ

સ્વપ્નાદ્ભુતાનામ્ એતેષાં મન્યે ઘોરતરં ફલમ્ ।
ઇતિ પૃષ્ટઃ ક્ષિતિભુજા ભગવાન્ કાશ્યપો ઽબ્રવીત્

શતાયુષિ જને શાસ્તા શાન્તઃ શાક્યમુનિર્ જિનઃ ।
ભવિષ્યત્ય્ અમૃતામ્ભોધિઃ સ દ્ર્ષ્ટઃ કુઞ્જરસ્ ત્વયા

તસ્યાપિ પશ્ચિમે કાલે શ્રાવકાઃ કલિસંશ્રયાત્ ।
ત્યક્તશીલગુણાચારા ભવિષ્યન્તિ સવિપ્લવાઃ

અપક્વાલ્પવિવેકાનાં બલાત્ તે ગૃહવાસિનામ્ ।
સ્વયં સેવાં સમાલમ્બ્ય કરિષ્યન્ત્ય્ એવ દેશનામ્

અર્થનીયો ઽર્થિભાવેન યસ્માત્ સેવાસુ ધાવતિ ।
તૃષિતસ્ય વ્રજન્ પશ્ચાત્ કૂપસ્ તસ્માદ્ વિલોકિતઃ

તે કરિષ્યન્તિ લોભાન્ધઃ સંમોહોપહતાઃ પરમ્ ।
બોધ્યઙ્ગમુક્તાપ્રસ્થસ્ય શક્તુપ્રસ્થેન વિક્રયમ્ ॥ કવ્ક્_93.લોઓ ॥
તીર્થવાક્યકુદારૂણિ બુદ્ધભાષિતચન્દનૈઃ ।
સામ્યમ્ આપાદયિષ્યન્તિ તે મૌગ્ધ્યાદ્ અવિશેષિણઃ

ક્વચિદ્ ભદ્રં સમાસાદ્ય વિનીતં ભિક્ષુકુઞ્જરમ્ ।
દુઃશીલકલભો ભિક્ષુઃ સ્પર્ધયા ધિક્ કરિષ્યતિ

ચાપલાશુચિલિપ્તાઙ્ગઃ સુશીલાન્ ભિક્ષુમર્કટઃ ।
અનુલિમ્પન્ સ્વદોષેણ કરિષ્યત્ય્ આત્મસન્નિભાન્

ષણ્ડકસ્યાભિષેકશ્ ચ ભવિષ્યતિ કપેર્ ઇવ ।
સંબુદ્ધશાસનપટં કૃષ્યમાણં ન નંક્ષ્યતિ

સંઘદ્રવ્યફલારામેષ્વ્ અપિ યાસ્યન્તિ ચૌરતામ્ ।
મિથઃ કલહશીલાશ્ ચ ભવિષ્યન્ત્ય્ અપવાદિનઃ

તવ સ્વપ્નવિપાકાન્તે ફલાન્ય્ એતાનિ ભૂતલે ।
ઇતિ શાસ્તુર્ વચઃ શ્રુત્વા વિસ્મિતો ઽભૂન્ મહીપતિઃ

સાનુગસ્યાથ નૃપતેઃ સ શાસ્તા ધર્મદેશનામ્ ।
કૃત્વા કાઞ્ચનમાલાયા દિદેશ કુશલાર્હતામ્ ॥ કવ્ક્_93.લ્07 ॥
જન્માન્તલે ચકારાર્ચાં સ્તૂપે નારઙ્ગમાલયા ।
સા તેન સુકૃતેનૈવ જાતા હેમસ્રજાઙ્કિતા

સેયં સુમાગધા પુણ્યપ્રભાવેણ મહીયસા ।
પ્રાપ્તાદ્ય જનકાયસ્ય સમ્યક્ કુશલસેતુતામ્

અધિધાયેતિ ભગવાન્ નભસા ભિક્ષુભિઃ સહ ।
રુચા સંપૂરયન્ન્ આશાં યયૌ જેતવનં જિનઃ ॥ કવ્ક્_93.લ્લ્0 ॥
પુંસાં સત્કુલભૂતયે બલવતી મિથ્યૈવ પુત્રસ્પૃહા
સૂનુશ્ ચેદ્ અગુણસ્ તદ્ એવ વિફલં તત્ કિં ન સર્વં કુલમ્ ।
સા કન્યા કિલ જાયતે ગુણવતી પુણ્યપ્રભાવાદ્ યયા
સંસારોરુસરિત્પતૌ કુલયુગમ્ નાવ્ એવ સંતાર્યતે