બોધસાર · અધ્યાય 42

[પ્. 651-]
ચર્યાચતુષ્ટયી
જાત્યા યદ્યપિ ગૌરમેવ વદનં રૂપસ્ય નાસ્તિ ક્ષતિસ્તત્કિં કજ્જલકાલિમા મુખતલે સંલાપનીયો બુધૈઃ ।
અસ્તુ બ્રહ્મવિદઃ કૃતૈરપિ ન તૈર્દુષ્કર્મભિશ્ચેત્ક્ષતિઃ કિં કામાદિકદર્થિતા વરમહો નિઃસઙ્ગસૌખ્યં વરમ્

વિદ્યૈવાધિગતા સદાઽમૃતમયી વિદ્યાવતા તત્સુખં સ્થેયં વર્ત્મનિ સઙ્ગદોષરહિતે સઙ્ગઃ પુનઃ કીદૃશઃ ।
કિં ભૂષાઽસ્ય વરા સ્થિતિઃ સ્તુતિમયી સા રાજસિંહાસને દ્વારિ દ્વારિ કપર્દિકાર્થમટનં કિં વાઽસ્ય રાજ્ઞો વરમ્

શિષ્ટાચારપથં વિના યદિ ભવેદાત્મપ્રબોધો મહાંસ્ત્યાજ્યસ્તર્હિ તુ સર્વદૈવ વિદુષા વર્ણાશ્રમાણાં ક્રમઃ ।
વર્ત્મ જ્ઞસ્ય વિલક્ષણં યદિ કૃતાત્કિં ચાકૃતાત્કર્મણઃ સંગૃહ્ણાતુ જનાંસ્તદા મુનિજનસ્તેનાપિ નાસ્ય ક્ષતિઃ

દત્તોઽસાવૃષભો જડશ્ચ ભરતો મઙ્કિશ્ચ સંવર્ત્તકઃ કર્મભ્રષ્ટપથં ગતાઃ કથમમી ચેત્પૂર્વપક્ષસ્તવ ।
સાધો જાગરિતાન્પ્રતીદમુદિતં પશ્યન્તિ શૃણ્વન્તિ યે નિદ્રાન્ધા ન વિલોકયન્તિ ન પુનઃ શૃણ્વન્તિ વાચ્યા ન તે