બોધસાર · અધ્યાય 40

[પ્. 644-]
જાતસાક્ષાત્કારં શિષ્યં પ્રતિ શ્રીગુરોઃ પ્રશ્નામૃતમ્ ।
નિત્યાનુભૂતમપિ યન્નાનુભૂતત્વમાગતમ્ ।
અનુભૂતિરસસ્પર્શૈરનુભૂતં પરં પદમ્

પ્રત્યક્ષલક્ષણૈરેવ પરાગ્વૃત્તિવિલક્ષણૈઃ ।
સાક્ષાત્કૃતઃ શિવઃ સાક્ષાત્સચ્ચિદાનન્દલક્ષણૈઃ

યશોદાગીતમધુરૈર્મૃદુવેદાન્તભાષિતૈઃ ।
લાલિતઃ પ્રાપિતો નિદ્રાં મુકુન્દ ઇવ મોદસે

નવનીતરસગ્રાસૈશ્ચમત્કારૈઃ સ્વસંવિદામ્ ।
અન્તરાપ્યાયિતો બાલમુકુન્દ ઇવ ખેલસિ

સ્વાત્મનિ પ્રલયં નીત્વા દૃશ્યમેકાકિતાં ગતઃ ।
કિં નૃત્યસિ નિજાનન્દે મહાદેવ ઇવાત્મનિ

સાયઙ્કાલે સમાધ્યાખ્યે સ્નિગ્ધાં સર્વાઙ્ગસુન્દરીમ્ ।
નિજશક્તિમુમાં પશ્યન્મહેશ ઇવ નૃત્યસિ

દૃશ્યં નિપીય ગરલં પાચયિત્વા તદાત્મનિ ।
મૃત્ત્યુઞ્જયપદં પ્રાપ્તઃ કિં હૃષ્યસિ હરો યથા

યથા સંમુખતાં નીત્વા મુકુરે મુખમીક્ષિતમ્ ।
અખણ્ડવૃત્તૌ ચ તથા સ્વરૂપં કિં વિલોકિતમ્

બહિરન્તર્હરિં પશ્યન્માયાં પશ્યઞ્જગન્મયીમ્ ।
વિસ્મયં પરમં યાસિ માર્કણ્ડેય ઇવાત્મનિ