બોધસાર · અધ્યાય 4.2

[પ્. 34-]
કાયવિડમ્બના
યં ભૂષયન્તિ કનકૈર્વસનૈશ્ચન્દનૈરપિ ।
અવિચારત એવાયં કાયો રમ્યત્વમાગતઃ

અસ્ય ક્રવ્યાદભક્ષ્યસ્ય કૃશાનોરિન્ધનસ્ય ચ ।
પરિણામકૃશસ્યૈવ કેન કાયસ્ય રમ્યતા

કલેર્વરમિદં સ્થાનં વિગ્રહો મૂર્ત્તિમાનસૌ ।
પઞ્ચભૂતનિવાસોઽયં કથં તત્ર સુખી ભવેત્

કારાગૃહં ગર્ભવાસો બાલ્યં કેવલમૂઢતા ।
તત્રાપિ દુઃસહાત્યન્તં પરાધીનતયા સ્થિતિઃ

કામબાણૈર્યત્ર પીડા કામિનીવિરહજ્વરઃ ।
પુષ્કલા પાપસંપત્તિર્યૌવનં વિપદાં વનમ્

ઉન્નતાઽનતતાં યાતો જરાક્ષારવિધૂસરઃ ।
પુરાણકૂષ્માણ્ડસમઃ કાયો વૃદ્ધસ્ય ગર્હિતઃ

મરણસ્ય તુ કિં વાચ્યં મૃત્યુદૂતભયં તતઃ ।
નરકે તુ મહદ્દુઃખં સ્વર્ગે પતનજં ભયમ્

ઉત્તમાધમભાવેન તત્રાપ્યસ્તિ વિડમ્બના ।
યદિ પશ્વાદિયોનિઃ સ્યાત્તદા દુઃખસ્ય કા કથા

પુનર્જન્મ પુનર્મૃત્યુઃ પુનર્દુખં પુનર્ભયમ્ ।
ન જાનાતિ ગતિં જન્તુર્નિમગ્નો મોહસાગરે