બોધસાર · અધ્યાય 33

[પ્. 596-]
તુરીયતુલસીપત્રપૂજા
તુરીયતુલસીપત્રૈર્વિષ્ણુપૂજા નિરૂપ્યતે ।
પ્રેમપ્રધાનભાવેન શૃઙ્ગારરસરૂપિણી

તત્ર ગોપીવાક્યમ્
દૃષ્ટ્યા મયા મધુરયા કલિતોઽધુનાઽયં યત્કામિનીજનમનોહરણો મુકુન્દઃ ।
તં ચિન્તયામિ હૃદયે ન સુખં ગૃહેઽસ્મિંસ્ તસ્મિન્વને ભવતુ તેન સહૈવ વાસઃ

ગોપાલિકાઽસ્મિ ચતુરા ન ચ મે મનીષા દેહશ્રિતા વિવિધગોરસવાસના મે ।
કિમ્વા વિધેયમિતિ ચિન્તયતી સ્થિતાઽહં તાવદ્બલાન્મિલિત એવ મયા મુકુન્દઃ

એકાકિની બત ગતાઽસ્મિ વને નિશીથે કુઞ્જે નિલીય રમણસ્ય રસો ગૃહીતઃ ।
ચિત્રં ભજામિ કલયામિ ન તત્ર હેતું સર્વાઃ પ્રસન્નવદના યદિમા વયસ્યાઃ

કિં વર્ણયામિ પુરતઃ કિલ કસ્ય વર્ણ્યં કિં વર્ણિતેન સખિ વર્ણયિતું ન શક્યમ્ ।
અઙ્ગાનિ મે વિગલિતાનિ સહૈવ નીવ્યા દષ્ટેઽધરે રતિરસે રતિનાયકેન

નન્વેતદેવ સુકૃતં ફલિતં મદીયં યત્કામિનીષુ રસલંપટ એષ કૃષ્ણઃ ।
લક્ષ્મીપતેરિતરથા ન ભવેદકસ્માદ્ અસ્માસુ ગોપવનિતાસુ કથાપ્રસઙ્ગઃ

તુરીયતુલસીપત્રૈર્વનમાલી સુપૂજિતઃ ।
અસ્મિન્વને મહામિષ્ટં યત્ફલં તત્પ્રયચ્છતિ