બોધસાર · અધ્યાય 16.14

[પ્. 364-]
અથ સહોમાઙ્ગહોમનિર્ણયઃ ।
એવં સમાપ્ય વિધિના પ્રાતઃ સંધ્યાવિધિં મુનિઃ ।
હોમસ્યાવસરં જ્ઞાત્વા યજ્ઞશાલાં તતો વિશેત્

યજ્ઞશાલા ભૂમિકા સ્યાત્તૃતીયા તનુમાનસા ।
સવ્યાર્હાન્સવ્યતઃ કુર્યાદસવ્યાર્હાનસવ્યતઃ ।
સંચરેત તથા નૈવ પ્રાયશ્ચિત્તીયતે યથા

અથ કર્માતિપાતઃ સ્યાદ્દુર્ગત્વાદ્બ્રહ્મકર્મણઃ ।
પ્રાયશ્ચિત્તવિધિં જ્ઞાત્વા તચ્ચ સદ્યઃ સમાચરેત્

કર્માતિપાતે પ્રાયશ્ચિતં
તત્કાલમિતિ વચનાત્પ્રાયશ્ચિત્તાનિ

અથ પ્રાયશ્ચિત્તાનિ ।
ક્ષમયૈવ જયેત્ક્રોધં સત્યેનૈવાનૃતં જયેત્ ।
અશ્રદ્ધાં શ્રદ્ધયા જિત્ત્વા દાનૈઃ કૃપણતાં જયેત્

ઇતીમે સેતુસામોક્તાશ્ચત્વારઃ સેતવો દૃઢાઃ ।
ઉપલક્ષણમેવૈતદન્યાનપિ તથા જયેત્

ઉત્થાનેન જયેન્નિદ્રાં કામં સઙ્કલ્પવર્જનાત્ ।
સન્તોષેણ જયેલ્લોભં મોહં બોધદૃશા જયેત્

મદમત્સરમુખ્યાંશ્ચ સર્વભૂતાત્મભાવનાત્ ।
અન્યાનપિ જયેદ્દોષાન્નિત્યાનિત્યવિચારણાત્

લયે સમ્બોધયેચ્ચિત્તં વિક્ષિપ્તં શમયેત્પુનઃ ।
સકષાયં વિજાનીયાત્સમપ્રાપ્તં ન ચાલયેત્

નાસ્વાદયેદ્રસં તત્ર નિઃસઙ્ગઃ પ્રજ્ઞયા ભવેત્ ।
વિશેદેકાગ્રયા બુદ્ધ્યા સિદ્ધિમેવમવાપ્નુયાત્

ઉદ્ધૃતે ગાર્હપત્યાગ્નૌ તત્તત્સંસ્કારસંસ્કૃતે ।
સત્યરૂપઃ સ્વયં યજ્વા શ્રદ્ધા પત્ની પતિવ્રતા

ગૃહં દેહઃ પતિર્જીવશ્છાદિતો મોહભસ્મના ।
જીવસ્ય ગાર્હપત્યાગ્નેસ્તદુદ્ધરણમુત્તમમ્

દ્વે આહુતી જુહોત્યેતે અગ્નિહોત્રવિધાનતઃ ।
મમતાં પ્રથમં હુત્વાઽહન્તાં ચ જુહુયાત્તતઃ

હુતે ચેદાહુતી એતે સર્વમેતદ્ધુતં ભવેત્ ।
શ્રદ્ધાપત્નીસમેતાનાં મુમુક્ષાગૃહવાસિનામ્