બોધસાર · અધ્યાય 1

[પ્. 2-]
બોધસારઃ
ઓં કિઞ્ચિત્કુતૂહલેનૈવ વિદુષાં પ્રિયકામ્યયા ।
મઙ્ગલાચરણં કૃત્વા બોધસારો નિરૂપ્યતે

અનન્તશક્તિસન્દોહપૂર્ણસ્ય પરમાત્મનઃ ।
વિઘ્નવિધ્વંસિનીં શક્તિં ગણરાજમુપાસ્મહે

યા પ્રકાશવિમર્શાભ્યાં સ્વરૂપાવસ્થિતિઙ્ગતા ।
સ્મરામિ તામહં ભક્ત્યા જ્ઞાનશક્તિં સરસ્વતીમ્

શ્રીગુરૂન્પરમાનન્દસ્વરૂપાનભિવાદયે ।
તાપત્રયાપહા યેષાં કૃપા બ્રહ્મામૃતપ્રપા

અથ ગુરુસ્તવઃ
મદમોહાભિધક્રૂરમધુકૈટભજિષ્ણવે ।
મોક્ષલક્ષ્મીનિવાસાય નમઃ શ્રીગુરુવિષ્ણવે

ગુણૈર્ગૌરવમાયાતા હરિબ્રહ્મહરાસ્ત્રયઃ ।
ગુણાતીતતયાઽસ્માકં ગુરવો ગુરુતાઙ્ગતાઃ

પુરાન્તકહરો રુદ્રઃ કંસકેશિહરો હરિઃ ।
ચણ્ડમુણ્ડહરા ચણ્ડી સર્વદ્વન્દ્વહરો ગુરુઃ

યચ્છન્તિ દેવતાસ્તુષ્ટા ધનમાયુઃ સુતં યશઃ ।
જ્ઞાનં કે નામ દાસ્યન્તિ વિના શ્રીગુરુપાદુકામ્

જયતિ શ્રીગુરૂણાં હિ ચરણાબ્જરજોગુણઃ ।
હતાસ્ત્રયો યદેકેન રજઃસત્ત્વતમોગુણાઃ

તાર્યા વયં તરિર્બોધસ્તરણીયો ભવાર્ણવઃ ।
તત્કર્ણધારરૂપેણ તારકં શ્રીગુરું ભજે

તારકસ્યોપદેશેન ગુરુર્ભૂત્વા વિમુક્તિદઃ ।
કાશ્યામપીશ્વરસ્તસ્માદીશ્વરાદધિકો ગુરુઃ

ગુરોરનુગ્રહાદીશ ઈશ્વરાનુગ્રહાદ્ગુરુઃ ।
શ્રીગુરોર્દર્શનં હેતુઃ પરં ત્વીશ્વરદર્શને

ઈશ્વરઃ સર્વહેતુત્વાદ્ધેતુઃસંસારમોક્ષાયોઃ ।
મોક્ષસ્યૈવ ગુરુસ્તસ્માન્નાસ્તિ તત્વં ગુરોઃ પરમ્

વિનાઽપિ ક્ષેત્રમાહાત્મ્યં ગુરુમાહાત્મ્યતઃ કિલ ।
વિમુક્તિર્યત્ર કુત્રાપિ ન કાશ્યાં ગુરુણા વિના

ક્ષમ્યતામિતિ કિં વાચ્યં પ્રસીદેતિ કિમુચ્યતામ્ ।
ક્ષમાપ્રસાદસંપૂર્ણઃ સ્વભાવાદેવ મે ગુરુઃ