ભલ્લટશતક · શ્લોક 1-20

તાં ભવાનીં ભવાનીત ક્લેશનાશવિશારદામ્
શારદાં શારદામ્ભોદ સિતસિંહાસનાં નમઃ ॥

યુષ્માકમ્ અમ્બરમણેઃ પ્રથમે મયૂખાસ્ તે મઙ્ગલં વિદધતૂદયરાગભાજઃ
કુર્વન્તિ યે દિવસજન્મમહોત્સવેષુ સિન્દૂરપાટલમુખીર્ ઇવ દિક્પુરન્ધ્રીઃ ॥

બદ્ધા યદ્ અર્પણરસેણ વિમર્દપૂર્વમ્ અર્થાન્ કથં ઝટિતિ તાન્ પ્રકૃતાન્ ન દદ્યુઃ
ચૌરા ઇવાતિમૃદવો મહતાં કવીનામ્ અર્થાન્તરાણ્ય્ અપિ હઠાદ્ વિતરન્તિ શબ્દાઃ ॥

કાચો મણિર્ મણિઃ કાચો યેષાં તે ઽન્યે હિ દેહિનઃ
સન્તિ તે સુધિયો યેષાં કાચઃ કાચો મણિર્ મણિઃ ॥

નન્વ્ આશ્રયસ્થિતિર્ ઇયં તવ કાલકૂટ કેનોત્તરોત્તરવિશિષ્ટપદોપદિષ્ટા
પ્રાગ્ અર્ણવસ્ય હૃદયે વૃષલક્ષ્મણો ઽથ કણ્ઠે ઽધુના વસસિ વાચિ પુનઃ ખલાનામ્ ॥

દ્રવિણમ્ આપદિ ભૂષણમ્ ઉત્સવે શરણમ્ આત્મભયે નિશિ દીપકઃ
બહુવિધાભ્યુપકારભરક્ષમો ભવતિ કો ઽપિ ભવાન્ ઇવ સન્મણિઃ ॥

શ્રીર્ વિશૃઙ્ખલખલાભિસારિકા વર્ત્મભિર્ ઘનતમોમલીમસૈઃ
શબ્દમાત્રમ્ અપિ સોઢુમ્ અક્ષમા ભૂષણસ્ય ગુણિનઃ સમુત્થિતમ્ ॥

માને નેચ્છતિ વારયત્ય્ ઉપશમે ક્ષ્મામ્ આલિખન્ત્યાં હ્રિયાં સ્વાતન્ત્ર્યે પરિવૃત્ય તિષ્ઠતિ કરૌ વ્યાધૂય ધૈર્યં ગતે
તૃષ્ણે ત્વામ્ અનુબધ્નતા ફલમ્ ઇયત્પ્રાપ્તં જનેનામુના યઃ સ્પૃષ્ટો ન પદા સ એવ ચરણૌ સ્પ્રષ્ટું ન સંમન્યતે ॥

પતતુ વારિણિ યાતુ દિગન્તરં વિશતુ વહ્નિમ્ અથ વ્રજતુ ક્ષિતિમ્
રવિર્ અસાવ્ ઇયતાસ્ય ગુણેષુ કા સકલલોકચમત્કૃતિષુ ક્ષતિઃ ॥

સદ્વૃત્તયઃ સદસદર્થવિવેકિનો યે તે પશ્ય કીદૃશમ્ અમું સમુદાહરન્તિ
ચૌરાસતીપ્રભૃતયો બ્રુવતે યદ્ અસ્ય તદ્ ગૃહ્યતે યદિ કૃતં તદ્ અહસ્કરેણ ॥

પાતઃ પૂષ્ણો ભવતિ મહતે નોપતાપાય યસ્માત્ કાલે પ્રાપ્તે ક ઇહ ન યયુર્ યાન્તિ યાસ્યન્તિ વાસ્તમ્*
એતાવત્ તુ વ્યથયતિતરાં લોકબાહ્યૈસ્ તમોભિસ્ તસ્મિન્ન્ એવ પ્રકૃતિમહતિ વ્યોમ્નિ લબ્ધો ઽવકાશઃ ॥

પઙ્ક્તૌ વિશન્તુ ગણિતાઃ પ્રતિલોમવૃત્ત્યા પૂર્વે ભવેયુર્ ઇયતાપ્ય્ અથવા ત્રપેરન્
સન્તો ઽપ્ય્ અસન્ત ઇવ ચેત્ પ્રતિભાન્તિ ભાનોર્ ભાસાવૃતે નભસિ શીતમયૂખમુખ્યાઃ ॥

ગતે તસ્મિન્ ભનૌ ત્રિભુવનસમુન્મેષવિરહ વ્યથાં ચન્દ્રો નેષ્યત્ય્ અનુચિતમ્ અતો નાસ્ત્ય્ અસદૃશમ્
ઇદં ચેતસ્તાપં જનયતિતરામ્ અત્ર યદ્ અમી પ્રદીપાઃ સંજાતાસ્ તિમિરહતિબદ્ધોધુરશિખાઃ ॥

સૂર્યાદ્ અન્યત્ર યચ્ ચન્દ્રે ઽપ્ય્ અર્થાસંસ્પર્શિ તત્ કૃતમ્
ખદ્યોત ઇતિ કીતસ્ય નામ તુષ્ટેન કેન ચિત્ ॥

કીટમણે દિનમ્ અધુના તરણિકરાન્તરિતચારુસિતકિરણમ્
ઘનસન્તમસમલીમસ દશદિશિ નિશિ યદ્ વિરાજસિ તદ્ અન્યત્ ॥

સત્ત્વાન્તઃસ્ફુરિતાય વા કૃતગુણાધ્યારોપતુચ્છાય વા તસ્મૈ કાતરમોહનાય મહસો લેશાય મા સ્વસ્તિ ભૂત્
યચ્છાયાચ્છુરણારુણેન ખચતા ખદ્યોતના ખદ્યોતનામ્નામુના કીટેનાહિતયા હિ જઙ્ગમમણિભ્રાન્ત્યા વિડમ્બ્યામહે ॥

દન્તાન્તકુન્તમુખસન્તતપાતઘાત સન્તાડિતોન્નતગિરિર્ ગજ એવ વેત્તિ
પઞ્ચાસ્યપાણિપવિપઞ્જરપાતપીડાં ન ક્રોષ્ટુકઃ શ્વશિશુહુઙ્કૃતિનષ્ટચેષ્ટઃ ॥

અત્યુન્નતિવ્યસનિનઃ શિરસો ઽધુનૈષ સ્વસ્યૈવ ચાતકશિશુઃ પ્રણયં વિધત્તામ્
અસ્યૈતદ્ ઇચ્છતિ યદિ પ્રતતાસુ દિક્ષુ તાઃ સ્વચ્છશીતમધુરાઃ ક્વ નુ નામ નાપઃ ॥

સો ઽપૂર્વઃ રસનાવિપર્યયવિધિસ્ તત્ કર્ણયોશ્ ચાપલં દૃષ્ટિઃ સા મદવિસ્મૃતસ્વપરદિક્ કિં ભૂયસોક્તેન વા
ઇત્થં નિશ્ચિતવાન્ અસિ ભ્રમર હે યદ્ વારણો ઽદ્યાપ્ય્ અસા* અન્તઃશૂન્યકરો નિષેયત ઇતિ ભ્રાતઃ ક એષ ગ્રહઃ ॥

તદ્ વૈદગ્ધ્યં સમુચિતપયસ્તોયતત્ત્વં વિવેક્તું સંલાપાસ્ તે સ ચ મૃદુપદન્યાસહૃદ્યો વિલાસઃ
આસ્તાં તાવદ્ બક યદિ તથા વેત્થિ કિં ચિચ્ છ્લથાંસસ્ તૂષ્ણીમ્ એવાસિતુમ્ અપિ સખે ત્વં કથં મે ન હંસઃ ॥