ભગવદ્ગીતા · અધ્યાય 99

શ્રીધરઃ -
નિર્ગુણોપાસનસ્યૈવં સ-ગુણોપાસનસ્ય ચ ।
શ્રેયઃ કતરદ્ ઇત્ય્ એતન્ નિર્ણેતું દ્વાદશોદ્યમઃ ॥
પૂર્વાધ્યાયાન્તે મત્-કર્મ-કૃન્ મત્-પરમ [ગીતા 11.55] ઇત્ય્ એવં ભક્તિ-નિષ્ઠસ્ય શ્રેષ્ઠત્વમ્ ઉક્તમ્ । કૌન્તેય પ્રતિજાનીહીત્ય્ [ગીતા 9.31] આદિના ચ તત્ર તત્ર તસ્યૈવ શ્રેષ્ઠત્વં નિર્ણીતમ્ । તથા તેષાં જ્ઞાની નિત્ય-યુક્ત એક-ભક્તિર્ વિશિષ્યત [ગીતા 7.17] ઇત્ય્ આદિના સર્વં જ્ઞાન-પ્લવેનૈવ વૃજિનં સન્તરિષ્યસિ [ગીતા 4.36] ઇત્ય્ આદિના ચ જ્ઞાન-નિષ્ઠસ્ય શ્રેષ્ઠત્વમ્ ઉક્તમ્ । એવમ્ ઉભયોઃ શ્રૈષ્ઠ્યે ઽપિ વિશેષ-જિજ્ઞાસયા શ્રી-ભગવન્તં પ્રત્ય્ અર્જુન ઉવાચ એવમ્ ઇતિ । એવં સર્વ-કર્માર્પણાદિના સતત-યુક્તાસ્ ત્વન્-નિષ્ઠાઃ સન્તો યે ભક્તાસ્ ત્વાં વિશ્વ-રૂપં સર્વજ્ઞં સર્વ-શક્તિં
પર્યુપાસતે ધ્યાયન્તિ । યે ચાપ્ય્ અક્ષરં બ્રહ્માવ્યક્તં નિર્વિશેષમ્ ઉપાસતે । તેષામ્ ઉભયેષાં મધ્યે કે ઽતિશયેન યોગ-વિદો ઽતિશ્રેષ્ઠા ઇત્ય્ અર્થઃ