ભગવદ્ગીતા · અધ્યાય 69

મધુસૂદનઃ - અધિયજ્ઞો યજ્ઞમ્ અધિગતો દેવતાત્મા વા પર-બ્રહ્મ વા । સ ચ કથં કેન પ્રકારેણ ચિન્તનીયઃ । કિં તાદાત્મ્યેન કિં વાત્યન્તાભેદેન । સર્વથાપિ સ કિમ્ અસ્મિન્ દેહે વર્તતે તતો બહિર્ વા । દેહે ચેત્ સ કો ઽત્ર બુદ્ધ્યાદિસ્ તદ્-વ્યતિરિક્તો વા । અધિયજ્ઞઃ કથં કો ઽત્રેતિ ન પ્રશ્ન-દ્વયમ્ । કિન્તુ સપ્રકાર એક એવ પ્રશ્ન ઇતિ દ્રષ્ટવ્યમ્ । પરમ-કારુણિકત્વાદ્ આયાસેનાપિ સર્વોપદ્રવ-નિવારકસ્ય ભગવતો ઽનાયાસેન મત્-સનેહોપદ્રવ-નિવારણમ્ ઈષત્કરમ્ ઉચિતમ્ એવેતિ સૂચયન્ સમ્બોધયતિ હે મધુસૂદનેતિ ।
પ્રયાણ-કાલે ચ સર્વ-કરણ-ગ્રામ-વૈયાગ્ર્યાચ્ ચિત્ત-સમાધાનાનુપપત્તેઃ કથં કેન પ્રકારેણ નિયતાત્મભિઃ સમાહિત-ચિત્તૈર્જ્ઞેયો ઽસીત્ય્ ઉક્ત-શઙ્કા-સૂચનાર્થશ્ ચકારઃ । એતત્ સર્વં સર્વજ્ઞત્વાત્ પરમ-કારુણિકત્વાચ્ ચ શરણાગતં માં પ્રતિ કથયેત્ય્ અભિપ્રાયઃ