ભગવદ્ગીતા · અધ્યાય 25

બલદેવઃ :
તૃતીયે કર્મ-નિષ્કામં વિસ્તરેણોપવર્ણિતમ્ ।
કામાદેર્ વિજયોપાયો દુર્જયસ્યાપિ દર્શિતઃ ॥
પૂર્વત્ર કૃપાલુઃ પાર્થસારથિર્ અજ્ઞાન-કર્દમ-નિમગ્નં જગત્ સ્વાત્મ-જ્ઞાનોપાસનોપદેશેન સમુદ્દિધીર્ષુસ્ તદ્-અઙ્ગ-ભૂતાં જીવાત્મ-યાથાત્મ્ય-બુદ્ધિમ્ ઉપદિશ્ય તદ્-ઉપાયતયા નિષ્કામકમ્ અબુદ્ધિમ્ ઉપદિષ્ટવાન્ । અયમ્ એવાર્થો વિનિશ્ચયાય ચતુર્ભિર્ અધ્યાયૈર્ વિધાન્તરૈર્ વર્ણ્યતે । તત્ર કર્મ-બુદ્ધિ-નિષ્પાદ્યત્વાજ્ જીવાત્મ-બુદ્ધેઃ શ્રેષ્ઠં સ્થિતમ્ । તત્રાર્જુનઃ પૃચ્છતિ જ્યાયસીતિ । કર્મણા નિષ્કામાદ્ અપિ ચેત્ તવ તત્-સાધ્યત્વાત્ જીવાત્મ-બુદ્ધિર્ જ્યાયસી શ્રેષ્ઠા મતા । તર્હિ તત્-સિદ્ધયે માં ઘોરે હિંસાદ્ય્-અનેકાયાસે કર્મણિ કિં નિયોજયસિ તસ્માદ્ યુદ્ધસ્વેત્ય્ આદિના કથં પ્રેરયસિ । આત્માનુભવ-હેતુ-ભૂતા ખલુ સા બુદ્ધિર્ નિખિલેન્દ્રિય-વ્યાપાર-વિરતિ-સાધ્યા
તદ્-અર્થં તત્-સ્વજાતીયાઃ શમાદય એવ યુજ્યેરન્ ન તુ સર્વેન્દ્રિય-વ્યાપાર-રૂપાણિ તદ્-વિજાતીયાનિ કર્માણીતિ ભાવઃ । હે જનાર્દન શ્રેયો ઽર્થિ-જન-યાચનીય, હે કેશવ વિધિ-રુદ્ર-વશ-કારિન્ ।
ક ઇતિ બ્રહ્મણો નામ ઈશો ઽહં સર્વ-દેહિનામ્ ।
આવાં તવાઙ્ગ-સમ્ભૂતૌ તસ્માત્ કેશવ-નામ-ભાગ્ ॥
ઇતિ હરિ-વંશે કૃષ્ણં પ્રતિ રુદ્રોક્તિઃ । દુર્લઙ્ઘ્યાજ્ઞસ્ ત્વં શ્રેયો ઽર્થિના મયાભ્યર્થિતો મમ શ્રેયો નિશ્ચિત્ય બ્રૂહીતિ ભાવઃ

ભ્ગ્ 3.2
વ્યામિશ્રેણૈવ વાક્યેન બુદ્ધિં મોહયસીવ મે ।
તદ્ એકં વદ નિશ્ચિત્ય યેન શ્રેયો ઽહમ્ આપ્નુયામ્